Notisia

UNARCO Hahú Konsolida Baze Hodi  Prepara ba Kongresu Daruak

UNARCO Hahú Konsolida Baze Hodi Prepara ba Kongresu Daruak

 

KDADALAK: Dadauk ne’e ekipa konsolidasaun ne’ebé kompostu husi Uniaun Agrikultór Covalima (UNARCO), Kdadalak Sulimutuk Institute (KSI) no Institutu Edukasaun Popular (IEP), hahú hala’o rekonsolidasaun hodi hametin estrutura iha baze hodi prepara ba kongresu daruak uniaun nian ne’ebé tuir planu sei realiza iha fulan Jullu tinan ne’e.

Kamponeza rural nia involvimentu iha organizasaun baze nu’udar partisipasaun iha edukasaun politika hodi hametin unidade no konsolia forsa kamponeza nian ba ejistensia hasoru forma explorasaun no exploitasaun oin-oin ne’ebé hanehan kamponeza sira ho sistematiku durante tempu naruk iha dimensaun ekonomia, politika, sosial, ekolojia no kultura hodi kria injustisa hasoru umanidade no natureza.

Ho nune’e, kamponeza rural Munisipiu Covalima iha period hirak liu ba konsolida malu hodi estabelese organizasaun masa hanaran UNARCO manifesta iha estatutu hodi fó mandate ba Komite ezeketivu durante tinan 4. Nune’e, period mandate to’o ona nia rohan, tan ne’e rekere rekonsolidasaun baze hodi prepara ba kongresu daruk nian.

Bazeia ba situasaun ne’e hotu, KSI nu’udar organizasaun sosial baze ho kamponeza sira ne’ebé sai membru ba Komite diretiva ba UNARCO hamutuk ho membru diretiva seluk no komite ezekutivu diskute hodi deside organiza rekonsolidasaun baze ba prepar kongresu nian.

Rekonsolidasaun baze nu’udar aprosimasaun estratejiku husi organizasaun kamponeza rural hodi hametin hikas espiritu ba rejistensia koletivu nian hasoru sistema exploitasaun ne’ebé kamponeza sira hasoru durante tempu naruk.

Objetivu husi rekonsolidasaun ne’e, aliende atu hametin estrutura baze, ekipa konsolidasaun hamutuk ho kamponeza sira hala’o analiza kritiku ba situasaun estrutural ne’ebé kamponeza sira hasoru iha baze, inklui hala’o identifikasaun ba forma oin-oin ne’ebé kontribui ba hametin espiritu luta kamponeze sira nian.

Seluk fali, atu buka identifika grupu hira mak dadaun ne’e sei ejiste hela no hirak mak la ejiste ona, hodi nune’e bele hatama iha baze de dadus unian nian molok hakat ba kongresu. Konsolidasaun ne’e hala’o iha zona hitu (7) Munisipiu Covalima mak hanesan, Zona Fatululik, Maukatar, Tilomar, Fatumea, Zumalai, Fohorem no Suai-Vila.

Rejultadu espetativa ne’eb’e sei atinje husi rekonsolidasaun ne’e, analiza ona situasaun estrutural ne’ebé kamponeza hasoru iha baze, identifika ona forma oin-oin ne’ebé kontribui ba hametin espiritu luta kamponeza nian, identifika ona dezafiu sira ne’ebé komite baze no grupu sira hasoru no dezaña ona planu hodi estabelese komisaun organizadora ba preparasaun hasoru kongresu UNARCO daruak nian.

Durante hala’o rekonsolidasaun baze preokupasaun no dezafiu lubuk ida mak membru grupu sira hato’o, liu-liu ligadu problema prodasaun, problema merkadu inklui kestiona kona ba komite zona balun ne’ebé la ativu.*

 

Related Articles