Notisia

Selebra Loron Mundial Ambiente EPA Betano Organiza Tour Agroekolojia 

Selebra Loron Mundial Ambiente EPA Betano Organiza Tour Agroekolojia 

Antroposéntriku iha edukasaun atuál kria tiha ona egoismu umanu nian a’as liu hasoru ekolojia. Ema konsidera ekolojia nudar objetu no komodita ne’ebé bele explora sem-limites ba demanda merkadu no interese ekonomia deit. Forma edukasaun ida ne’e mak kauza dezénvolvimentu destrutivu, iha ne’ebé ema utiliza materiais kimiku sira estraga rai bokur, poluisaun ba be’e, a’ar no kauza krize ambiental ne’ebe kuñesidu ho mudansa klimatika. Tan ne’e, tinan-tinan mundu tomak selebra 05 Juñu nudar loron mundial ba ambiente hodi refleta no konsientizasaun popular kona-ba ezisténsia ekolojia no umanidade. Ema no ekolojia tenki moris iha nuansa ida resiproku no solidariu, iha ne’ebé ema halo papél ativa ba kuida ekolojia nudar parte integrante iha vida kotidiana.  

Nudar parte husi selebrasaun loron mundial ambiente, iha loron 06 – 07 Maiu 2024, estudante Eskola Popular Agroecolojia Betano - EPAB organiza agroecology tour ba postu administrativu Alas no Fatuberliu, munisipiu Manufahi. Vizita estudu ne’e atu lori estudante sira aprende no deskobre pratika real agroecolojia ne’ebé Governu lokál no kamponeza lokal sira implementa iha baze. Agroekolojia tenki siénsia, pratika ida no esensial liu sai movimentu ida atu promove relasaun mutua ema no natureza iha prosesu produsaun aihan, atividades agrikula no konservasaun ekolojia nudar esforsu ba asegura balansu ekolojiku no sustentabilidade planeta nian. 

Tour ida ne’e kontribui makas ba inspira joven kamponeza sira ho pratika oin-oin agroecolojia ne’ebé kamponeza sira implementa, nune’e mos aprende modelu organizasaun baze ne’ebé kamponeza sira konstrui atu bele asegura expansaun inisiativas agroecolojiku ba fatin barak iha Timor-Leste. Tour ne’e akompaña direita husi ekipa Kdadalak Sulimutuk Institute-KSI no Uniaun Agrikultores Manufahi – UAMM. 

Esperansa iha Jovén✊! Ita fiar jovén bele halo mudansa✊!

Related Articles