Notisia

Kongresu Daruak UNARCO “Odamatan PAM Covalima Nakloke ba Uniaun”

Kongresu Daruak UNARCO “Odamatan PAM Covalima Nakloke ba Uniaun”

COVALIMA: Hafoin hala’o abertura ba kongresu daruak Uniaun Agrikultór Covalima (UNARCO), Sekretariu Prezidente Autoridade Munisipiu (PAM) Covalima asuntu Sosial no Organizasaun Komunitaria, Filmino Cardoso hateten, odamatan PAM nakloke ba uniaun atu servisu hamutuk hodi dezenvolve setor agrikultura iha Munisipiu Covalima.

“Knar ne’ebé ha’u hala’o ligadu ho asuntu sosial no organizasaun komunitariu, ne’e duni ha’u servisu hamutuk ho parseiro, uniaun ka assosiasaun hotu hotu iha Munispiu Covalima, inkuli parte igreza. Tanba ne’e, ha’u nia odamatan nakloke ba UNARCO atu ita servisu hamutuk hodi dezenvolve Munisipiu Covalima,” informa Sekertariu Prezidente Autoridade Munisipiu Covalima, Filmino  Cardoso iha Aldeia Lokeu Foho, Suku Debos, Postu Administrativu Suai Vila, Munisipiu Covalima, 7 Jullu 2024.

Agradese tebes tanba uniaun ida ne’e mai ho programa ida hakarak promove agrikultór sira oinsá atu servisu hamutuk hodi hadia to’os na’in sira nia vida moris, tan ne’e husu ba to’os na’in hotu-hotu iha Munispiu Covalima atu organiza an iha UNARCO hodi servisu hamutuk ho entidade relevante sira oinsá atu kontribui ba dezenvolvimentu setór agrikultura.

Aliende ne’e, ejistensia UNARCO parte ida atu solusiona problema hirak ne’ebé mak durante ne’e to’os na’in sira hasoru, no oinsá atu hadia ekonomia familia liu husi hasa’e produsaun. Tanba ne’e, apela ba komunidade no agrikultór tomak iha Munisipiu Covalima mai hamutuk iha UNARCO atu nune’e bele kontribui hodi hadia rendimentu ekonomia familia liu husi hasa’e produsaun agrikola iha rai laran.

Apresia mós ba ita bo’ot sira nia esforsu tomak ne’ebé konsege hamosu ona uniaun agrikultór iha Munisipiu Covalima, ne’e duni enkoreza nafatin ita bo’ot sira atu hametin ita bo’ot sira nia estrutura no hametin unidade hodi priense dezenvolvimentu iha nasaun ne’e, liu-liu dezenvolvimetu setor agrikultura nian.

“Buat ne’ebé uniaun halo ba Munisipiu Covalima nia di’ak, hanesan autoridade ami hakarak servisu nafatin ho ita bo’ot sira, tanba ita hotu hakarak atu hadia Covalima,” tenik Filmino Cardoso.

Aliende koopera ho parte governu liu husi servisu Agrikultura Munisipal, parte Sekertariu Prezidente Autoridade Munisipiu Covalima Asuntu Sosial no Organizasaun Komunitaria sei koopera nafatin ho ita bo’ot sira nia program ne’ebé mak la’o, nafatin kontribui, liu-liu ba to’os na’in sira atu oinsá bele muda sistema agrikultura iha fatin hotu hotu.

Agradese mós ba UNARCO ne’eb’e dadaun ne’e haruka ona ita nia joven balun ba apriende (eskola) iha Betano. Tanba ida ne’e, hanesan pasu ida atu prepara rekursu uniaun nian iha futuru, hodi nune’e bele kontinua jere uniaun ida ne’e atu atinje metas ne’ebé iha.

Liu husi kongresu ida ne’e, ha’u hakarak enkoreza nafatin ita bo’ot sira atu luta hodi kompete iha merkadu, nune’e ita labele konsume naftin aihan husi rai liur, maibé oinsá ita bele promove ita nia aihan lokal hanesan bain-bain ema dehan han saida mak ita kuda no kuda saida mak ita han.

“Nu’udar Sekertariu PAM, pesoalmente ha’u apresia ho ita bo’ot sira nia programa no husu ita bo’ot sira atu kontinua luta hodi dezenvolve ita nia setor agrikultura atu labele lakon ho ema seluk,” hakotu Filmino. (**)

 

Related Articles