Notisia

KSI Fasilita Formasaun Jestaun Finansas no Kobo ba Dirijente UNARCO

KDADALAK: Atu garante organizasaun ka grupu ida nia ezistensia ba tempu naruk presiza iha jestaun finansas ne’ebé adekuadu, akuntabilidade no transparensia, tanba ne’e durante loron rua (2) nia laran, hahú husi loron 28-29 Maiu 2024, Kdadalak Sulimutuk Institute (KSI) fasilita formasaun book keeping ba dirijente Uniaun Agrikultór Munisipiu Covalima (UNARCO).

Formasaun ne’ebé hala’o iha baze Lokeu, partisipa husi estrutura ezekutivu UNARCO no membru komite baze sira hamutuk ema na’in 20, ne’ebé kompostu husi mane na’in 15 no feto na’in 5.

Objetivu husi formasaun ne’e, atu fahe esperiensia ba malu kona ba oinsá bele maneja livru sira, hodi nune’e dirijente uniaun ho membru sira bele hatene importansia husi utilizasaun livru hirak ne’e.

Durante formasaun, fasilitador Marcela Soares iha ninia aprezentasaun tenta lori partisipante sira atu koñese di’ak livru hirak ne’ebé konsidera importante no sai nu’udar mata dalan hodi suporta organizasaun ka grupu nia atividade. Livru hirak ne’e mak hanesan, livru kas (Cash book), livru lista riku soin (asset list), livru bainaka (visitor list), livru nota, livru agenda surat tama no sai, livru kios kooperativa ka livru fa’an no sosa sasan, livru kooperativa membru, inklui livru monitorizasaun.

Hafoin hala’o aprezentasaun no esplika importansia husi livru hirak ne’e, fasilitador orienta mós partisipante sira hala’o diskusaun iha grupu no pratika priense livru cash book, livru lista riku soin, livru nota nomós livru kios kooperativa.

Bainhira hala’o pratika priense livru hirak ne’e, partisipante husi grupu ida-idak hetan mós oportunidade hodi halo aprezentasaun. Ne’e duni, husi sira nia rejultadu aprezentasaun ne’e deskobre katak, maioria partisipante iha koñesimentu natoon kona ba jestaun finansas nian, maske sei iha buat balun ne’ebé presiza hadia di’ak liu tan.

Partisipante Adelino Tilman iha ninia rekomendasaun husu ba KSI atu kontinua fasilita formasaun jestaun finansas ba estrutura no membru UNARCO, tanba formasaun ida ne’e importante hodi garante ejistensia Uniaun nian.

“Tuir ami nia observasaun metodu fasilita di’ak tebes, tanba fó oportunidade barak liu ba partisipante sira hodi halo diskusaun no hato’o perguntas. Maibé, problema iha tempu tanba loron rua ne’e la sufisiente ba ami atu kumpriende lalais buat hotu,”informa Adelino Tilman.

Rekomendasaun seluk, kuaze partisipante hotu orgullu no apresia ho prezensa KSI ne’ebé fasilita ona formasaun jestaun finansas ba estruturua UNARCO, tanba ho formasaun ida ne’e bele aumenta membru no dirijente Uniaun nia kapasidade iha area finansas nian.

Formasaun Kobotoolbox

Aliende tuir formasaun jestaun finansas nian, dirijente ho membru UNARCO hetan mós formasaun kona ba Importansia husi Kolesaun Dadus Uza Plataforma dijitál Kobotoolbox.

Kolesaun dadus mak prosesu prinsipál ida iha peskiza sientifika, liu-liu relasiona ho seksaun espasu. Kualidade primeiru husi ligasaun ne'e hetan liu husi prosesu prosesamentu imediatu iha kampu ka liu husi prosesu intervista kle'an ka liu husi audiénsia badak ida ba problema sira ne'ebé iha.

Iha era teknolojia ohin loron, iha plataforma balun ne'ebé bele ajuda prosesu halibur dadus ho efetivu, lalais no bele fornese informasaun ne'ebé loos. Plataforma ida-ne'e hanesan ho formuláriu google ne'ebé apropriadu, survey no plataforma sira hanesan ne'e nu’udar instrumentu ba kolesaun dadus. Entre plataforma sira-ne'e iha plataforma ida ne’ebé hanaran Kobotoolbox (Computer-Asisted Personal Entreview) ne'ebé iha opensource no sai hanesan rezultadu husi dezenvolvimentu ne’ebe hetan husi esperiénsia kampu kona ba halibur dadus.

Kobo sai hanesan plataforma ida-ne'ebé forte liu hodi uza iha atividade kolesaun dadus, tanba fasil atu uza no ninia prosesu simples. Metodu ida-ne'e di'ak liu bainhira kompara ho prosesu halibur dadus ho manuál ka uza surat-tahan.

Objetivu husi formasaun ne’e, atu introdus ba membru Uniaun sira katak, utilizasaun plataforma dijitál kobotoolbox iha prosesu kolesaun dadus ne’e importante tebes, tanba bele hafasil uniaun nia servisu iha prosesu foti dadus kona ba membru uniaun nian no baze sira.

Aliende ne’e bele fasilita membru uniaun sira iha prosesu foti dadus bainhira akontese dezastre ruma ba to’os nain sira, hafoin bele uza dadus sira ne’e hanesan relatoriu ida hodi halo advokasia.

Vise Diretur KSI, Pedro Brito iha ninia intervensun hateten, formasaun hirak ne’e parte husi kontribuisaun KSI nian hodi hametin no garante sustentabilidade Uniaun iha futuru. Tanba, liu husi formasaun maka bele kapasita no hasa’e koñesimentu membru sira nian, nune’e bele garante transparansia, akuntabilidade no responsabilidade.

Entertantu Prezidente UNARCO, João Gusmão hateten, formasaun ne’e parte ida husi kapasitasaun ba membru uniaun sira hodi aumenta sira nia koñesimentu iha area finansas nian, tanba ne’e partisipante sira ne’ebé sente duvida ho materia balun tenke husu ida ne’e ligadu ho orsamentu (**)

 

 

Related Articles