KDADALAK: Inisiu implementa programa HAKBIIT iha Suku Maubaralisa, Postu Administrativu Maubara, Munisipiu Liquiça hodi hala’o atividade Rai Osan ba Mundansa (ROMANSA), to’o ohin loron, organizasaun Kdadalak Sulimutuk Institute (KSI) konsege estabelese (hari) ona grupu ROMANSA haat (4).
Entre grupu 4 ne’e maka hanesan, Moris Ki’ak ho membru hamutuk ema na’in 10, ne’ebé kompostu husi feto 8 no mane 2, tuir fali grupu Moris Foun ho membru hamutuk ema na’in 10, ne’ebé kompostu husi feto 5 no mane 5, grupu Kulau Naroman ho membru hamutuk ema na’in 13, ne’ebé kompostu husi feto 9 no mane 4 no ikus liu maka grupu Hadia Moris ho membru hamutuk ema na’in 12, ne’ebé kompostu husi feto 7 no mane 5.
Husi grupu hirak ne’e, iha grupu rua (Moris Ki’ak no Moris Foun) mak remata ona siklu dahuluk ba rai osan nian no membru sira konsege fahé ona osan hodi responde ba mehi ne’ebé mak antes ne’e membru ida-idak iha.
Iha intervista ho media KDADALAK, Field Staff ba programa HAKBIIT husi Munisipiu Liquiça, Dircia Sanhes hateten, dadauk ne’e membru grupu Moris Ki’ak no Moris Foun komesa rai fali ona sira nia osan ba siklu daruak nian no agora tama ona ba iha semana dalima nian.
“Kona ba grupu Kulau Naroman no grupu Hadia Moris, agora dadauk la’o hela iha siklu dahuluk, maibé ba grupu Kulau Naroman tama ona iha semana 21 no grupu Hadia Moris tama ona iha semana daruak,” informa Dircia Sanches ba media KDADALAK bainhira fasilita formasaun ROMANSA ba membru grupu Hadia Moris iha Maubara, foin lalais.
Nia haktuir, objetivu husi atividade ROMANSA atu empodera feto maluk sira, oinsá bele halo jestaun di’ak ba utilizasaun osan hodi nune’e bele ajuda hasa’e rendimentu familia. Aliende ne’e nu’udar meus ida hodi hanorin membru grupu sira oinsá atu jere sira nia rendimentu ho di’ak, nune’e bele atinji sira nia mehi.
Tuir mata dalan ROMANSA nian, molok membru grupu sira atu rai osan tenke tuir uluk formasaun, hodi nune’e bele hatene prosesu no lalaok ROMANSA nian. Ne’e duni, iha loron 14 Dezembru 2022, ekipa servisu KSI fasilita formasaun ba membru grupu Hadia Moris iha Suku Maubaralisa.
Nia argumenta, formasaun ne’e ho objetivu atu fasilita metodu ROMANSA ba membru grupu foun sira, orienta membru grupu foun sira hodi deside sira nia regulamentu rasik no hari mehi pesoal membru sira nian.
Durante formasaun membru grupu Hadia Moris hili mós estrutura grupu nian ne’ebé kompostu husi Xefe grupu, Rosita dos Santos, Sekretaria, Mirla Araujo, Tezoreira, Anita Amaral, ema ne’ebé toma konta xave, Joséfa dos Santos.
Aliende ne’e, membru sira desidi mós valor osan multa ba to’o tarde $ 0,50 centavos, multa ba falta $ 1.00, multa fó fila osan empresta tarde $ 2.00, multa entrega osan funan tarde $ 1.00, osan sosial $ 1.00 no opsaun ba rai osan uza metodu fiksu-volontaria, inklui desidi durasaun rai osan ba siklu dahuluk nian maka semana 48 (tinan 1)
Hafoin remata formasaun, iha loron tuir mai ekipa servisu KSI hamutuk ho estrutura no membru grupu Hadia Moris hahú kedas ho lansamentu, ne’e duni kada membru rai kedan sira nia osan ba semana dahuluk nian no total orsamentu ne’ebé sira rai iha momentu ne’e hamutuk $ 74.75.
Jeralmente atividade formasaun no lansamentu ba programa rai osan la’o di’ak no mebmru grupu sira sente kontenti ho atividade ida ne’e, maibé husi parte estrutura husu nafatin KSI atu halo akompanamentu. (**)
