KDADALAK: Rejultadu kongresu agrikultór Bobonaro ne’ebé partisipa husi to’os na’in zona Bobonaro, Kailako, Balibo, Maliana no Atabae (la inklui Lolotoe), maioria kongresista deposita konfiansa tomak ba Raimero Jacinto (RAMBO) lidera Uniaun Agrikultór Munisipiu Bobonaro (UAMB) ba periodu 2022-2025.
Raimiro Jacinto eleitu sai Prezidente Uniaun Agrikultór Munisipiu Bobonaro hafoin pakote A ne’ebé nia lidera manan iha votasaun ho votus 82 kontra pakote B ho votus 54 no votus nulu 5 husi total votantes hamutuk 141.
Kompozisaun lista pakote A ne’ebé hetan fiar husi kongresista sira maka hanesan, Raimero Jacinto nu’udar Prezidente, Delfin da Conçeicão nu’udar Sekertariu Jeral I, Joaquim Pereira nu’udar Sekertariu Jeral II no Maria Gonsalves nu’udar Tezoreiro.
Liu husi kongresu ne’e estrutura eleitu Uniaun Agrikultór Munisipiu Bobonaro hamutuk ho delegadu kongresista sira hamosu akta rezolusaun ida hodi desidi pontu importante balun ne’ebé pertenente ho luta uniaun nian mak hanesan, Dirijente no membru hotu sei hala’o serbisu voluntariu no la buka lukru durante ejistensia, kumpre prinsipiu, valores, politika no defende Uniaun Agrikultór Munisipiu Bobonaro iha ne’ebe de’it ba interese ema hotu nian.
Aliende ne’e, halo konsientizasaun baze ho regular no levanta situasaun no kondisaun hotu ne’ebé baze sira hasoru ba publiku no instituisaun relevante, membru sira hotu iha responsabilidade koletivu ba Uniaun liu husi kontribuisaun kada membru, membru baze hotu iha dever hodi estabelese Koperativa Baze, prontu halo solidariedade politika no ekonomia iha nivel nasional, rejional no internasional nomós maksimiza utilizasaun rai no evita fa’an rai iha fatin hotu inklui kuidadu ambiente.
Nu’udar na’in ba Uniaun Agrikultór Munisipiu Bobonaro husu ita hotu nian konsiderasaun atu kumpri pontu importante hirak ne’ebé haktuir iha rezolusaun ne’e, tanba liu husi ita nia hamutuk mak ita forte hodi hasoru injustisa.
Kongresu agrikultór Bobonaro ba loron daruak ne’ebé hala’o iha Suku Holsa, Postu Administrativu Maliana, Munisipiu Bobonaro, antes hakat ba votasaun hodi hili estrutura ezekutivu Uniaun Agrikultór Munisipiu Bobonaro periodu 2022-2027, iha oras dader nian kongresista sira hili kompozisaun meza hodi lidera kongresu, depois kontinua ho sesaun diskute no aprova rejimentu kongresu nian, inklui hala’o diskusaun, aprezentasaun no aprovasaun ba estatutu uniaun nian hamutuk iha artigu 17.
Estatutu uniaun nian husi artigu 1 to’o artigu 17 maioria hetan aprovasaun husi kongresista sira ho votu afavor 141, kontra 0 no abstensaun 0, maske akontese mudansa iha artgiu balun, inklui iha artigu 1 kona ba naran organizausan nian kongresista sira aprezenta naran tolu mak hanesan, Uniaun Agrikulór Munisipiu Bobonaro (UAMB), Uniaun Agrikulór Munisipiu Bobonaro (UNAMBO), Uniaun Agrikulór Munisipiu Bobonaro (UAMBO), maibé hafoin halo votasaun maioria kongresista sira konkorda ho naran UAMB.
Hafoin eleitu sai Prezidente UAMB, Raimiro Jacinto hateten, agradese tanba hetan fiar husi kongresista sira hodi lidera uniaun ida ne’e, maibé atu atinje mehi ka luta uniaun nian presiza to’os na’in hotu nia apoiu no kolaborasaun hodi servisu hamutuk iha baze.
“Labele husik ami iha estrutura serbisu mesak, maibé to’os na’in hotu-hotu tenke apoiu luta uniaun nian, tanba ho ita nia hamutuk mak ita forte hodi rejister hasoru injusitisa,” deklara Raimiro Jacinto iha ninia deskursu hafoin simu pose.
