KDADALAK: Loron, 22 Setembru 2022, Kdadalak Sulimutuk Institute (KSI) simu estajiariu na’in haat (4) husi sentru formasaun Knua Buka Hatene (KBH) hodi hala’o estajiu durante fulan tolu (3).
Durante hala’o estajiu iha KSI, estajiariu hirak ne’e sei aprende kona ba servisu Administrasaun finansas, inklui mós sei akompaña programa sira ba iha baze hodi servisu hamutuk ho komunidade sira.
Estajiariu na’in 4 ne’e kompostu husi feto na’in 2 no mane na’in 2 maka hanesan, Natalia Soares husi Munisipiu Lautem, Dominikus J.P Marçal husi Munisipiu Manufahi, Ines DE. A Carvalho Munisipiu Dili no José Maria Martins husi Munisipiu Manatutu.
Hafoin simbolikamente entrega estajiariu sira ba KSI, fasilitador ne’ebé akompaña estajiariu sira deklara, lori estrutura KBH nia naran agradese ba organizasaun KSI ne’ebé kontinua fó oportunidade ba estajiariu sira husi KBH hala’o estajiu iha fatin ne’e no esperaka katak durante estajiu iha KSI, estajiariu sira bele aprende buat barak, liu-liu ligadu ho area administrasaun finansas nian.
“Husu ba alin estajiariu sira uza oportunidade ida ne’e ho di’ak hodi buka aprende, nune’e bele aumenta ita bo’ot sira nia kapasidade no koñesimentu. Aliende ne’e husu ba estajiariu sira atu kumpri nafatin regras ka regulamentu ne’ebé organizasaun nian, tanba ho disiplina maka bele hetan susesu iha futuru,” informa fasilitador ne’e.
Entertantu Vise Prezidente KSI, Pedro Brito hateten, desde uluk kedas KSI ho KBH iha koperasaun servisu ne’ebé di’ak tebes no situasaun ida ne’e kontinu metin to’o ohin loron.
“KSI hanesan fatin atu aprende hamutuk, tanba ne’e KSI nia odamatan nakloke ba joven sira ne’ebé hakarak atu aprende buat ruma hodi dezenvolve sira nia an. Aliende simu estajiariu sira husi KBH, durante ne’e KSI mós simu estajiariu sira husi Universidade Nasional Timor-Leste (UNTL), liu-liu husi Departamentu Komunikasaun Sosial no Dezenvolvimentu Komunitariu.
