PONILALA: Molok abertura atividade Akampamentu Popular Reforma Agraria iha Suku Ponilala, Administrador Postu Administrativu Ermera, Munisipiu Ermera, Alexandre dos Santos deklara, hanesan aman nia parte apoiu luta povu Ermera ba reforma agraria, tanba konsidera ida ne’e luta komun.
“Luta ida ne’e labele ita mesak de’it, maibé envolve mós lideransa sira, hadomi rai ne’e ka la’e, se hadomi rai ne’e entaun mai ita hamutuk. Ha’u apoiu imi nia luta ba reforma agraria hodi hadia rai ne’e, nune’e bele ajusta pensamentu koletivismu hodi hetan rejultadu ne’ebé koletivu,” dehan Administrador Postu Administrativu Ermera, Munisipiu Ermera, Alexandre dos Santos, bainhira hala’o intervensaun iha abertura Akampamentu Popular Reforma Agraria ne’ebé organiza koletiva husi organizasaun Kdadalak Sulimutuk Institute, UNAER no IEFS iha Suku Ponilala, loron 23 Juñu 2022.
Nia haktuir, bainhira ita mai ho pensamentu individualista konserteza ninia rejultadu sei laiha, tanba reprezenta de’it ema ida nia oponiaun.
Agradese ba to’os na’in sira ne’ebé mai husi munisipiu seluk, tanba forsa ida kona ba reforma agraria maka to’os na’in sira. Maibé, ko’alia kona ba reforma agraria ita hasoru hela dezafiu bo’ot ida no la fasil hanesan ita ko’alia, tanba dala ruma ita ko’alia no halo buat di’ak mós ema dehan la di’ak.
Realidade agora ne’e ita hasoru hela dezafiu bo’ot konaba degradasaun, ne’e duni atividade ida ne’e importante tebes ba ita hotu atu partisipa, tanba liu husi atividade ida ne’e maka ita bele konserva bee matan no debu sira, nune’e bele garante sustentabilidade ekonomia ba ema hotu.
Nia konsidera bee no rai mak sentru ba moris, tanba ita ema nia moris depende liu ba bee no rai. Ne’e duni, ita presiza luta hodi defende rai ida ne’e.
Konstituisaun artigu 141 hateten, Timor oan maka sai na’in ba rai mais dala barak ita politiza fali buat sira ne’e hodi tau as interese politika, maibé fiar katak ita bo’ot sira sei nafatin luta ba buat ne’ebé loos.
“Hakarak fó hatene ba ita bo’ot sira katak, luta ne’ebé loos sempre hasoru dezafiu, tanba dala ruma politika na’in sira, Deputadu no lider partidu politiku sira la gosta ita bainhira ko’alia kona ba reforma agraria, maibé ida ne’e normal tanba ita nia luta ba buat ne’ebé loos no fiar katak loron ruma lia loos ne’e sei mosu mai,” hakotu Administradór Postu Ermera.
