KDADALAK: Kooperativa nu’udar pilar importante ida iha prosesu dezenvolvimentu ekonomia nasaun, tanba ne’e hanesan nasaun foun, Timor Leste presiza tebes hari ka forma grupu kooperativa sira iha area rural.
Relasiona ho asuntu ne’e, iha lorom 25 Maiu 2022 organizasaun Kdadalak Sulimutuk Institute (KSI) hala’o enkontru ho komunidade iha Aldeia Ogues, Suku Ogues, Postu Administrativu Maucatar, Munisipiu Covalima hodi estabelese grupu kooperativa hanesan meus ida hodi dezenvolve sustentabilidade ekonomia komunitaru.
Vise Diretur KSI, Pedro Brito Fernandes iha ninia intervensaun hateten, objetivu hari grupu kooperativa ida ne’e ho hanoin ida oinsá atu bele hadia ekonomia povu iha area rural.
Aliende ne’e, oinsá atu integra grupu kooperativa ida ne’e ba iha Uniaun Agrikultór Covalima (UNARCO). Grupu kooperativa ida ne’e forma husi membru grupu viveirus Nadak Haburas ne’ebé sai hanesan baze UNARCO.
Nia haktuir, tinan barak ona KSI servisu hamutuk ho komunidade sira iha area rural liu husi kria grupu ortikultura, grupu viveirus komunitariu, grupu produs mina nu’u virjen, grupu koperativa komunitaria no halo advokasia ba problema hirak ne’ebé agrikultór sira enfrenta.
Aliende ida ne’e, implementa mós program Tara Bandu iha area tarjetu ne’ebé KSI hala’o intervensaun, fasilita formasaun ba grupu agrikultór sira, inklui estabelese Uniaun Agrikultór iha Munisipiu Covalima, Manufahi, Liquiça, Ermera no tuir planu sei estabelese mós Uniaun Agrikultór Bobonaro.
Entertantu Sekertariu grupu kooperativa Aldeia Ogues, Bendito Sarmento Amaral hateten, nia parte sente orgullu ho programa ne’ebé implementa husi KSI, liu husi kria kooperativa baze no kria sentru viveirus.
"Ami kontenti simu KSI iha fatin ne'e, tanba foin primeiraves organizasaun KSI maka mai fó apoiu komunidade sira iha fatin ne’e, ne’e duni husu atu akompaña nafatin ami hodi fó susesu ba programa hirak ne’ebé implementa ona,” informa Bendito.
Iha biban ne’e, KSI apoiu mós fini Buanaga ba grupu viverus Nadak Haburas. Total partisipante ne’ebé marka prezensa iha enkontru ne’e hamutuk ema na’in 10 ne’ebé kompostu husi feto na’in 2 no mane na’in 8.
