Ainaro, 9 Jullu 2026
Iha dader ida ne’ebé nakonu ho entuziasmu no esperansa, lian agrikultor sira husi suku no aldeia oioin iha Ainaro hasoru malu iha Salaun Maharu. Sira mai ho esperiénsia ne’ebé diferente, maibé ho objetivu ida de’it: hametin uniaun agrikultores iha Munisípiu Ainaro.
Durante loron tomak, partisipante 24 husi organizasaun baze no parseiru sira diskute, troka hanoin no buka dalan atu agrikultor sira bele sai atór prinsípál iha dezenvolvimentu. Iha remata enkontru nian, sira toma desizaun importante ida: estabelese Komite Konsolidasaun Baze (Komisaun Organizadora) atu lidera preparasaun ba Kongresu Dahuluk Uniaun Agrikultór Munisípiu Ainaro.
Partisipante sira mai husi Baze HAMOR, Tatiri, Fortales, FHF, Alumni Eskola Popular Agroekolojia Betano, NGO MAHARU, IEP, KSI, COCAMAU, Komite Haut-Sanan no organizasaun seluk tan. Dadus partisipasaun hatudu katak maioria mak joven, 13 husi ema 24, no enkontru ne’e mos hatuur komitmentu atu aumenta reprezentasaun feto iha etapa tuirmai.
“Ko’alia ho lian ida”
Durante diskusaun, agrikultor sira hateten katak durante tempu naruk sira senti vulneravel, menus protesaun institusionál no dala barak la hetan fatin atu partisipa iha desizaun públiku. Sira mos levanta preokupasaun kona-ba falta kontrolu sosial ba polítika governu ne’ebé afeta diretamente sira-nia moris no produtividade.
Bento Barros “Sakunar”, delegadu KNRA iha Ainaro, hateten: “Uniaun mak ai-hun mahon ba agrikultor hotu iha munisípiu. Iha ne’ebá mak ita bele hamrik hamutuk, ko’alia ho lian ida, no defende ita-nia direitu.”
Lian ne’e hetan apoiu husi partisipante barak, ne’ebé haree uniaun hanesan instrumentu atu hametin solidariedade entre grupu baze sira.
Lideransa husi agrikultor rasik
Komisaun Organizadora ne’ebé estabelese hili estrutura ho konsensu:
-
Prezidente: Eusebiu Lopes (Komite Haut-Sanan)
-
Vise-Prezidente: Domingos M. Carlos (FHF)
-
Sekretáriu: Domingos Tilman (COCAMAU)
-
Tezoreira: Natalia da C. Barreto (FHF)
Membro seluk sira mos prontu atu kaer responsabilidade iha seksaun funsionál sira durante prosesu konsolidasaun.
Dadus inisiál hatudu katak iha grupu baze 112 husi rede COCAMAU, KSI, MAHARU no IEP ne’ebé sei sai fundasaun ba mobilizasaun delegadu ba Kongresu Dahuluk.
Husi diskusaun ba asaun
Enkontru la para de’it iha deklarasaun. Komisaun Organizadora aprova planu asaun konkretu ba Jullu no Agustu 2026:
-
13 Jullu: Submisaun dadus kompletu grupu baze sira
-
21–24 Jullu: Briefing no koordenasaun
-
28 Jullu – 7 Agostu: Konsolidasaun Baze Faze I iha kada grupu
-
11 Agostu: Avaliasaun no planeamentu ba faze tuirmai
Objetivu prinsípál mak garante katak delegadu sira ne’ebé partisipa iha Kongresu mai husi grupu ne’ebé sólidu, demokrátiku no iha vizaun hamutuk ba futuru agrikultura Ainaro nian.
Movimentu ida ba Ainaro tomak
Atmosfera iha Salaun Maharu hatudu katak prosesu ida-ne’e la’ós propriedade organizasaun ida de’it. Ne’e movimentu ida ne’ebé moris husi vontade agrikultor sira rasik atu organiza an, fortalese sira-nia lian no partisipa ativamente iha dezenvolvimentu munisípiu.
KSI kontinua fó apoiu tékniku ba prosesu ne’e, maibé lideransa no desizaun sira hela iha liman agrikultor sira.
Hakat hamutuk, organiza hamutuk, no hametin lian agrikultor Ainaro!
“Eduka Agrikultor ho Organizasaun, Eduka Ukun Nain ho Rezistensia.”
