Iha períodu ne'ebé maioria agrikultor kafé sira prepara an atu simu tempu koleita, situasaun iha tinan ida ne'e diferente husi tinan sira anteriores. Iha área produsaun kafé orgániku ne'ebé Federasaun Ekonomia Solidaria (FES) apoia, ai-kafé barak la produz fuan tuir nivel ne'ebé esperadu. Mudansa klimátika no kondisaun tempu durante períodu funan no formasaun fuan konsidera hanesan fator prinsipal ne'ebé afeta produsaun kafé iha tinan ida ne'e.
Atu komprende situasaun ida ne'e ho kle'an liu no asegura kualidade kafé ne'ebé sei tama ba merkadu, ekipa FES kontinua hala'o monitorizasaun direta ba membru grupu baze sira iha área produsaun. Vizita sira ne'e la'ós deit atu avalia rezultadu final, maibé mos atu acompanha prosesu tomak husi preparasaun to'o prosesamentu kafé orgániku.
Durante atividade monitorizasaun, ekipa FES observa no avalia forma ne'ebé agrikultor sira hala'o seleksaun kafé fuan, limpeza, no prosesu seca kafé. Maske kuantidade produsaun menus, kualidade nafatin sai prioridade principal. Ba maioria agrikultor sira, mantein padraun orgániku no kualidade produtu importante tebes tanba aspetu ida ne'e mak garante valor merkadu no aumenta konfiansa husi sosa na'in sira.
“Ita observa katak produsaun kafé iha tinan ida ne'e reduz signifikativamente kompara ho tinan sira anteriores. Maibé membru sira kontinua demonstra dedikasaun no responsabilidade atu garante katak kafé ne'ebé produz nafatin iha padraun kualidade aas,” hateten membru ida husi ekipa monitorizasaun FES.
Aleinde monitoriza prosesamentu, ekipa FES mos hala'o observasaun ba estimativa produsaun kafé ba temporada ida ne'e no prepara mekanizmu atu apoia prosesu sosa kafé. Dadus no informasaun ne'ebé rekolla durante monitorizasaun sei sai baze importante ba planeamentu prosesu sosa, atu garante transparénsia no facilita koordinasaun entre grupu baze sira no parte relevante sira ne'ebé envolve iha komersializasaun.
Maski enfrenta desafiu husi menus produsaun, esperansa no kompromisu agrikultor sira nafatin forte. Ba sira, kafé orgániku ho kualidade aas la'ós deit fonte rendimentu, maibé mos rezultadu husi servisu maka'as, kuidadu no dedikasaun ne'ebé halo durante tinan tomak.
Liuhosi monitorizasaun regular ida ne'e, FES reafirma nia kompromisu atu servisu hamutuk ho agrikultor sira hodi fortalece produsaun kafé orgániku sustentável, aumenta kualidade produtu lokal, no kontribui ba melhoria moris família agrikultora sira iha área rurál.
