Maubisse, Ainaro – Iha tempu ne'ebé agrikultór sira enfrenta dezafiu oioin, hahú husi mudansa klimátika, asesu ba merkadu to'o politika públika ne'ebé seidauk responde tomak ba nesesidade komunidade rural sira, agrikultór Ainaro foti pasu importante ida atu hametin nia voz kolektiva.
Iha loron 5 Juñu 2026, Salão Paróquia Maubisse transforma sai fatin enkontru ba esperansa no solidariedade. Agrikultór sira husi suku no postu administrativu oioin iha Munisípiu Ainaro hamutuk iha atividade konsolidasaun ho tema “Konsolidasaun Grupu Agrikultores ba Estabelese Uniaun Agrikultores Munisípiu Ainaro.”
Ba partisipante barak, enkontru ne'e la'ós deit reuniaun ida. Ne'e sai momentu istóriku ida atu hahú harii organizasaun ne'ebé bele reprezenta interese agrikultór sira iha futuru.
Atmosfera solidariedade no entusiasmo bele sente durante atividade tomak. Hamutuk partisipante nain 104 marka prezensa, kompostu husi feto nain 32 no mane nain 72. Sira reprezenta grupu agrikultór, organizasaun komunidade baze, kooperativa no instituisaun sira ne'ebé durante tinan barak servisu hamutuk atu promove dezenvolvimentu agrikultura sustentável iha Ainaro.
Instituisaun no organizasaun sira hanesan Kdadalak Sulimutuk Institute (KSI), Institutu Edukasaun Popular (IEP), Fundasaun MAHARU, RAEBIA, PARCIC, Cooperativa Unidade Café Nain Maubisse (COCAMAU), HBO no Komité Haut-Sanan marka prezensa atu fó apoiu ba prosesu konsolidasaun ida ne'e.
Iha sesaun abertura, solidariedade entre movimentu sira sai mensajen sentral. Elisabeth Lino de Araujo, Country Representative APHEDA iha Timor-Leste, destaca ligasaun entre movimentu agrikultór no movimentu traballadór iha mundu tomak. Nia hateten katak luta ba justisa sosial, direitu ekonomiku no moris dignu la'ós responsabilidade grupu ida deit, maibé sai objetivu komún ba komunidade sira ne'ebé hakarak mudansa.
Reflesaun importante seluk mai husi Administrador Postu Administrativu Maubisse, ne'ebé desafia partisipante sira atu hanoin kona-ba papel agrikultór iha prosesu desentralizasaun. Iha nia intervensaun, nia husu se agrikultór sira sei nafatin sai objetu politika ka bele transforma an sai sujeitu estratéjiku ne'ebé partisipa diretamente iha tomada desizaun ba dezenvolvimentu lokal.
Diskusaun sira kontinua ho aprezentasaun temática kona-ba oportunidade no dezafiu integrasaun ASEAN ba agrikultór Timor-Leste, papel Estadu iha fortalese organizasaun sosiedade sivíl, valor Laudato Si' ba kuidadu ambiente no esperiénsia husi Uniaun Agrikultores Ermera iha organizasaun no advokasia reforma agrária.
Maibé liu husi aprezentasaun formal sira, valor boot liu husi enkontru ne'e mak oportunidade ba agrikultór sira atu ko'alia kona-ba realidade ne'ebé sira hasoru loroloron. Problema asesu ba merkadu, inseguransa ba rai, impaktu mudansa klimátika no nesesidade atu hametin organizasaun sai tópiku principal iha diskusaun grupu sira.
Durante debate no troka esperiénsia sira, konsiensia kolektiva aumenta katak dezafiu sira ne'ebé agrikultór enfrenta la bele rezolve individualmente. Presiza organizasaun ida ne'ebé forte, demokrátika no sustentável atu sai voz hamutuk ba komunidade agrikultora sira iha Ainaro.
Iha remate atividade, partisipante sira hetan konsensu importante ida. Ho vontade hamutuk, sira konkorda atu hahú prosesu estabelesimentu Uniaun Agrikultores Munisípiu Ainaro, hanesan plataforma ida atu hametin solidariedade, promove agrikultura sustentável no aumenta partisipasaun agrikultór sira iha formulasaun politika no tomada desizaun ne'ebé afeta setor agrikultura.
Desizaun ida ne'e marka hahú kapitulu foun ida ba movimentu agrikultór iha Ainaro. Husi to'os no aldeia sira, agrikultór sira agora hahú organiza an atu harii voz ida ne'ebé forte liu, hodi garante katak interese no aspirasaun komunidade rural sira bele rona iha nivel lokal no nasional.
Ba agrikultór sira iha Ainaro, uniaun ne'e la'ós deit estrutura organizativa ida. Ne'e hanesan símbolu esperansa, solidariedade no kompromisu hamutuk atu harii futuru agrikultura ne'ebé justu, inkluzivu no sustentável ba gerasaun ohin no gerasaun sira tuir mai.
