Maski coincide ho loron boot, ekipa konsolidasaun baze ne’ebé kompostu husi UAMB hamutuk ho aliadu sira husi KSI no IEP kontinua halo servisu iha terenu ho espiritu solidariedade no kompromisu forte ba komunidade. Iha loron ne’e, ekipa hala’o rekonsolidasaun ikus iha grupu sira iha Dodes, Atulaun no Ritabou, Munisipiu Maliana.
Enkontru ne’e sai hanesan espasu importante ida atu membru grupu sira halibur malu, reflete kona-ba prosesu organizasaun durante ne’e no diskute hikas prioridade sira ba futuru. Iha ambiente simples maibé ativa, partisipante sira ko’alia aberta kona-ba nesesidade real ne’ebé komunidade sira enfrenta loroloron.
Diskusaun sira fokus liu ba oinsá hametin organizasaun baze no prepara planu konkretu ba oin. Membru sira partilla hanoin kona-ba dificuldade iha produsaun, asesu ba kapital no merkadu, no mos kona-ba oportunidade ne’ebé bele dezenvolve husi servisu hamutuk.
Iha enkontru ne’e, mos hahu diskusaun kona-ba potensia atu estabelese kooperativa multisektoral ida ne’ebé bele kobre area produsaun no kreditu funan ki’ik ba membru sira. Ideia ne’e simu resposta positiva husi partisipante sira tanba sira haree katak kooperativa bele sai meiu ida atu hametin ekonomia membru no ajuda komunidade sai independente liu tan.
Aleinde ne’e, partisipante sira mos partilla esperiensia no hanoin kona-ba potensia dezenvolvimentu produsaun no merkadu justu ba planta maek. Ba barak husi membru sira, planta maek la’ós deit ai-han lokal, maibé mos iha valor ekonomiku ne’ebé bele aumenta rendimentu familia sira bainhira jere ho di’ak no liga ho merkadu apropriadu.
Durante diskusaun, senti mos antusiasmu no vontade atu kontinua aprende no organiza-an. Maski hasoru limitasaun no dezafiu oioin, grupu sira hatudu katak solidariedade no servisu hamutuk sei sai forsa importante ida ba mudansa iha komunidade.
Atividade rekonsolidasaun ne’e mos reafirma importância kolaborasaun entre organizasaun baze no aliadu sira hodi kontinua acompanha prosesu organizasaun komunidade no buka dalan atu harii ekonomia alternativa ne’ebé forte no sustentável husi nivel baze.
