Iha organizasaun ida, atividade barak bele lao loroloron. Maibé pergunta importante ida sempre mosu: “Programa sira ne’e realmente lao tuir planu ka lae?” Atu responde pergunta ida ne’e, Monitoring no Evaluasaun (M&E) sai hanesan instrumentu importante atu sukat progresu, haree rezultadu no aprende husi prosesu implementasaun.
Ho hanoin ida ne’e, durante loron rua nia laran, hahú husi 10 to’o 11 Maiu 2026, Kdadalak Sulimutuk Institute (KSI) realiza formasaun kona-ba Monitoring no Evaluasaun ba staff sira, ho objetivu atu hasa’e kapasidade no abilidade iha monitorizasaun atividade no sukat rezultadu programa sira.
Formasaun ne’e hala’o iha knua KSI, Fatumeta, Suku Bairo-Pite, no partisipa husi ema nain 17, kompostu husi mane nain 9 no feto nain 8. Partisipante sira mai husi área servisu oioin, inklui staff kampu, staff programa, ekipa media, Monitoring no Evaluasaun (M&E), administrasaun lojístiku no ekipa finansa.
Durante formasaun, atmosfera aprendizagem senti dinamiku no interativu. Partisipante sira la’ós deit rona teoria, maibé mos diskute diretamente kona-ba realidade no dezafiu ne’ebé sira hasoru iha terrenu durante implementasaun atividade.
Iha sesaun ida, fasilitador husu partisipante sira atu reflete kona-ba importánsia dadus iha organizasaun. Diskusaun ne’e lori partisipante sira komprende katak Monitoring no Evaluasaun la’ós deit kona-ba halo relatóriu, maibé kona-ba oinsá organizasaun bele aprende husi atividade sira rasik no halo desizaun ne’ebé di’ak liu.
Formasaun ne’e fasilita husi Mateus Soares, ne’ebé fahe nia matenek no esperiénsia kona-ba implementasaun Monitoring no Evaluasaun iha organizasaun. Ho maneira fasil no prátiku, nia orienta partisipante sira kona-ba konseitu básiku M&E, métodu rekolla dadus, uza indikator hodi sukat progresu atividade no oinsá halo análize no relatóriu hosi rezultadu programa sira.
Liu husi teoria, partisipante sira mos simu oportunidade atu aprende diretamente kona-ba oinsá dezenvolve database participant list, kria MEL tracking progress no prepara lista distribuisaun hodi suporta monitorizasaun no dokumentasaun atividade sira ho sistema ne’ebé di’ak no organizadu.
Ba barak husi partisipante sira, sesaun prátika ne’e sai parte ida ne’ebé interesante liu. Sira komprende katak dokumentasaun no dadus ne’ebé organiza ho di’ak bele ajuda organizasaun haree klaru progresu atividade no sukat mudansa ne’ebé akontese iha komunidade.
“Koñesimentu ida ne’e importante tebes tanba ajuda ami la’o ho evidénsia, la’ós deit ho observasaun,” dehan partisipante ida durante diskusaun grupu.
Ho realizasaun formasaun ida ne’e, KSI espera katak staff sira bele aumenta tan kapasidade iha área Monitoring no Evaluasaun, hodi suporta tomada desizaun ne’ebé efetivu no hadi’a kualidade programa no projetu sira iha futuru.
Liuhusi fortalese sistema monitorizasaun no aprendizajen organizasional, KSI acredita katak mudansa ne’ebé di’ak hahú husi kapasidade atu rona, observa no aprende husi realidade iha terrenu.
