Maubisse, 23 Marsu 2026 — Alumnus sira husi Eskola Populár Agroekolojia Betano organiza atividade agrikultura sustentável iha aldeia Kartolu, suku Horaikiik, postu administrativu Maubisse, ho objetivu atu promove pratika agrikultura ekolojika no utiliza rekursu lokal.
Atividade ne’e lidera husi Azya no envolve membru grupu nain lima. Husi total ne’e, ema ida responsabiliza ba atividade tein, enquanto membru haat seluk halo servisu iha preparasaun rai.
Grupu ne’e foka ba produsaun adubu maran (kompostu) liuhosi preparasaun rai kuak ida atu sai fatin prosesamentu. Rai kuak ne’e iha dimensaun luan 170 sentímetru, naruk 140 sentímetru, no altura 190 sentímetru.
Segundo informasaun husi organizadór sira, produsaun adubu organiku ne’e sei utiliza atu suporta atividade to’os no hamenus dependénsia ba fertilizante kimiku, nune’e kontribui ba sustentabilidade ambiental no produtividade agrikola.
Inisiativa ne’e hanesan kontinuidade husi koñesimentu no habilidade ne’ebé alumnus sira hetan durante formasaun iha Eskola Populár Agroekolojia Betano, ne’ebé promove prinsípiu agroekolojia hanesan dalan atu asegura seguransa alimentar no proteje ambiente.
Atividade ne’e mos espera bele motiva komunidade lokal, liuliu juventude sira, atu adota pratika agrikultura sustentável iha sira-nia área.
