Gleno, Ermera – Federasaun Ekonomia Solidaria FES) hala’o enkontru avaliasaun anual ho membru kooperativa base sira iha sede UNAER, Gleno, Ermera. Enkontru ne’e involve reprezentante husi komite base sira husi postu diferente ne’ebé mak sai membru iha federasaun, atu halo refleksaun kona-ba progresu servisu durante tinan ida liu ba no planeia estratéjia ba tinan tuir mai.
Enkontru ida ne’e sai espasu importante ba membru sira atu fahe esperiénsia, diskute dezafiu, no identifika oportunidade foun atu hametin movimentu ekonomia Solidaria iha Timor-Leste. Durante diskusaun, partisipante sira halo avaliasaun ba atividade sira ne’ebé durante tinan liu ba implementa ona, inklui produzaun, prosesamentu no merkadu ba produtu agríkola, liu-liu kafe organiku ne’ebé sai produtu prinsipál husi membru kooperativa sira.
Responsible FES Jenito Santana hatete katak enkontru avaliasaun anual importante tebes atu garante transparénsia no partisipasaun husi membru sira iha prosesu desizaun federasaun.
“Enkontru ida ne’e la’ós deit atu haree fali buat ne’ebé ita halo ona, maibé mos atu aprende hamutuk husi esperiénsia no buka dalan foun atu hametin ekonomia solidariedade iha ita nia komunidade sira,” hatete nia durante enkontru.
Reprezentante husi kooperativa base sira mos fahe sira nia esperiénsia kona-ba benefísiu ne’ebé sira hetan liu husi federasaun, liu-liu iha asesu merkadu ba produtu agríkola.
Membru ida husi kooperativa base Nunrem Domingos Soares Martins hatete katak kolaborasaun iha federasaun ajuda agrikultor sira atu hetan oportunidade merkadu kafe organiku ne’ebé diak liu.
“Antes ami fa’an ami nia produtu kafe organiku iha merkadu lokal no komprador lokal deit, maibé agora liu husi federasaun ami bele asesu merkadu ne’ebé luan liu, inklui merkadu justu iha rai-liur. Ida ne’e ajuda aumenta rendimentu família agrikultor sira,” hatete nia.
Durante enkontru, partisipante sira mos diskute kona-ba estratéjia atu hametin jestaun kooperativa, aumenta kualidade produtu, no kontinua habelar rede merkadu liu husi kolaborasaun ho parseiru nasionál no internasional.
FES ne’ebé harii husi rede kooperativa base sira agora sai hanesan plataforma importante atu liga produsaun agrikultor sira ho merkadu solidariedade. Inisiativa ida ne’e kontribui atu hametin ekonomia komunidade rural sira no promove modelu ekonomia ne’ebé justu no sustentavel.
Ho realizasaun enkontru avaliasaun anual ne’e, FES espera atu kontinua hametin solidariedade entre membru kooperativa base sira no promove kolaborasaun atu hadia moris agrikultor sira iha Timor-Leste.
