Iha loron Segunda-feira [12/01/2026], ekipa FES - UNAER kontinua haforsa movimentu ekonomia solidária liu husi fasilitasaun Formasaun Bazika Kooperativa iha Baze Hatali, Suku Humboe.
Formasaun ida-ne’e hanesan espasu aprendizajen no diskusaun ne’ebé importante atu hasae konhesimentu membrus sira kona-ba lalais kooperativa, valores no prinsipiu fundamentál, no mos hametin estrutura no governansa kooperativa iha nivel baze. Liu husi prosesu ida-ne’e, membrus sira mos motiva atu hamoris servisu hamutuk no solidariedade iha grupu laran.
Objetivu seluk ne’ebé signifikante husi formasaun ida-ne’e mak prepara baze kooperativa sira atu asesu servisu finanseiru, inklui abertura konta bankária, ne’ebé sei ajuda kooperativa sira sai liu transparente, organizadu, no sustentável iha tempu naruk.
Atividade ne’e hetan partisipasaun husi reprezentante APHEDA no mos autoridades komunitária, inklui Chefe Suku Humboe, ne’ebé hatudu apoiu no kompromisu ba dezenvolvimentu kooperativa iha nivel lokal.
Formasaun ida-ne’e involve hamutuk partisipante 21, ne’ebé kompostu husi mane 9 no feto 12. Partisipasaun feto ne’ebé aas reflete kompromisu movimentu ekonomia solidária atu promove inkluzaun no igualdade iha prosesu dezenvolvimentu ekonomiku komunitária.
Liu husi formasaun kontinua hanesan ida-ne’e, FES - UNAER reafirma sira-nia papel atu hametin kapasidade kooperativa baze, hodi harii ekonomia komunitária ne’ebé forte, justa, no tu’u ba solidariedade.
