DILI, KDADALAK – Tribunál Judisial Primeira Instansia Dili, liu husi Juis Ricardo Leita Godinho, deside absolve arguidu na’in rua (JMA no RLG) husi kazu krime estraga plantasaun kafé iha Kamalpun, Suku Lihu, Postu Administrativu Railako, Munisípiu Ermera.
Antes julgamentu hahú, parte lezadu Yohanes Lay deziste kazu, tanba konsidera natureza kazu ne’e semi-publiku. Tuir lei, tanba lezadu aseita hodi dada fila kazu, Tribunál omologa desizaun ne’e no absolve arguidu sira husi akuzasaun.
Advogadu privadu Julio da Silva esplika, kazu semi-publiku hanesan ne’e depende ba lezadu atu kontinua ka lae. “Tanba lezadu perdua ona arguidu sira no dame malu iha Tribunál nia oin, entaun sira livre ona husi akuzasaun,” hateten Julio.
Disputa rai ne’e entre lezadu no arguidu sira nia parte agora remata ho dalan dame malu iha Tribunál, maibé situasaun hanesan ne’e hatudu luta to’os nain sira seidauk remata, tanba problema pose rai no falta lei reforma agrária seidauk klaru.
To’os nain barak iha Munisípiu Ermera no munisípiu seluk kontinua husu Reforma Agrária atu garanti direitu ba komunidade rural, hodi prevene konflitu hanesan iha Kamalpun.
🌿⚖️ Desizaun tribunál ne’e foo sinal kona-ba nesesidade ba politika reforma Agrária ida justu no klaru, atu evita konflitu entre to’os nain sira iha tempu oin mai.
