“Hafoin Hala’o Konservasaun, Ami La Sosa Ona Bee”

KDADALAK: Tinan barak nia laran komunidade Lokeu Foho, Suku Debos, Postu Administrativu Suai Vila, Munisipiu Covalima hamutuk uma kain 80 resin enfrenta problema bee moos.

Situasaun ne’e obriga komunidade sira tenke la’o kuaze kilometru 2 hodi ba kuru bee iha mota no balun tenke sosa bee kada bidon ho folin $ 1.50.

Responde ba preokupasaun ne’e, komunidade Lokeu Foho hamutuk ho organizasaun parseiro Uniaun Agrikultór Covalima (UNARCO), Kdadalak Silumutuk Institute (KSI), Institute Edukasaun Popular (IEP) no Permatil desidi hala’o konservasaun ba bee matan kabitan.

Iha atividade konservasaun ne’e, komunidade sira konsege kee debu natural, kria travasaun no kuda aihoris, hodi nune’e bele hamoris fila-fali bee matan sira.

Rejultadu husi atividade ne’e, komunidade Lokeu Foho fasil ona asesu ba bee, tanba bee pesu ne’ebé durante ne’e sira konsumu hahú iha mudansa no tempu bailoron bee posu refere la maran ona.

“Uluk seidauk halo konservasaun, ami susar tebes asesu bee moos. Maibé, agora bee iha ona no ami la sosa ona bee,” deklara Maria Gusmão nu’udar benefisariu ne’ebé asesu ba bee posu iha area bee matan kabitan.

Nia haktuir, bee ne’e utiliza ba nesesidade loro-loron nian mak hanesan, tein, hemu, fase ropa, haris, rega aihoris, inklui uza ba atividade hortikultura nian.

Atu garante sustentabilidade bee ba tempu naruk, komunidade Lokeu Foho sempre organiza malu hodi hamos foer sira iha area bee matan kabitan, inklui kontrola aihoris sira ne’ebé kuda iha area konservasaun nian. (**)