RAILAKO, Ermera: Uma kain 16 husi aldeia Titibuti iha suku Matata, postu administrativu Railako, munisípiu Ermera, agradese ba Kdadalak Sulimutuk Institute (KSI) ho parseiru OXFAM Timor-Leste ne’ebé responde preokupasaun komunidade nia laran, hodi halo konstrusaun tanki bee moos.
Tanki bee ida ne’e, ho medida 260m x 360m, parte husi programa El Niño ne’ebé implementa husi KSI, ho objetivu atu halibur bee moos hodi hatán ba necessidade bee husi komunidade ne’ebé nia tinan barak hela iha situasaun difisil ba bee moos.
Iha inagurasaun loron 16 Dezembru 2024, Country Diretor husi OXFAM Timor-Leste, Pankas Anand, hatete katak KSI ho OXFAM hanesan fasilitador de’it, maibé komunidade rasik maka no’obre no kuida tanki ne’e. Nia hatete mós katak importante tebes atu proteje bee matan sira ne’ebé iha, hodi garante bee ba futuru.
“Bainhira ita ko’alia kona ba protesaun bee, servisu ida ne’e seidauk remata. Ita tenke kontinua proteje bee matan sira, tanba se la proteje, bee ne’e sei la kontinua hametin sustentabilidade,” hatete Pankas Anand.
Iha resposta ba perguntas kona ba bee matan, nia akonselha komunidade atu kuda ai-horis no halo konservasaun iha área bee matan. Nia hatete katak kuidadu no proteje bee matan bele fó benefísiu ba tempu naruk.
“Maski ita konsegue dada bee, tenke no’obre mos atu utiliza bee ne’e ho responsabilidade. Bainhira la iha jestaun di’ak, bee mos bele nakfila ba situasaun ki’ak,” nia explica.
Bee ho Ki’ak
Anand mós hatete katak falta bee bele hasa’e moris ki’ak iha komunidade Timor-Leste. Kuaze 42% populasaun moris iha lina ki’ak, tanba bainhira falta bee, saúde ho ekonomia familia bele hetan impaktu la di’ak.
Ba situasaun ne’e, nia akonselha atu halo kampaña kona ba konsiensia komunitária kona ba protesaun bee no oinsá bele hetan bee moos.
“Protesaun ba bee matan bele garante moris di’ak ba oan-sira iha futuru. Sustentabilidade mak objetivo ne’ebé tenke ita asegura,” nia deklara.
Esforso Hamutuk iha Titibuti
Vise Diretor KSI, Pedro Brito, hatete katak komunidade nia kontribuisaun ne’ebé forte hodi halo konstrusaun tanki bee, maka fó esperansa katak komunidade sei kuida no utiliza bee ne’e ho maneira di’ak.
Atividade KSI iha Ermera la’os de’it kona ba konstrusaun tanki bee, maibé mós inklui konservasaun rai, kria terasu, produsaun adubu no pesticida orgániku, no distribusaun jerigen, balde, ho fini modo ba benefisariu sira.
KSI mós implementa atividade hodi hametin reziliensia komunidade hasoru impaktu mudansa klimatika, hodi hasae renda ekonomia familia liu pratika agrikultura integradu.
Desde situasaun COVID-19, KSI kontinua apoiu komunidade Matata liu programa El Niño. Iha programa ne’e, KSI prioridade ba aldeia rua, Titibuti no Kolako, ho benefisariu uma kain 25 iha aldeia ida-idak.
Atividade implementa ona maka hanesan konservasaun bee matan, kria irigasaun, produsaun adubu orgániku, no distribusaun jerigen no balde. Tanki bee iha Titibuti ne’ebé inagura ona sei fó kontribuisaun importante ba komunidade hodi enfrenta impaktu mudansa klimatika no hametin sustentabilidade ba moris di’ak.
