KDADALAK: Atu hasa’e konesimentu feto no feto defisiensia sira kona ba oinsá atu jere sira nia rendimetu rasik no ajuda hodi deskreve sira nia mehi individu, Organizasaun Kdadalak Sulimutuk Institute (KSI), fasilita formasaun Rai Osan ba Mudansa (ROMANSA) ba membru grupu E’Papana no grupu Fitun Tasi durante loron haat iha Autoridade Atauro.
Entre grupu rua ne’e, grupu E’Papana ho membru hamutuk ema na’in 10 mesak feto de’it. Aliende ne’e, grupu Fitun Tasi ho membru hamutuk na’in 10, ne’ebé kompostu husi mane na’in rua (2) no feto na’in valu (8).
ROMANSA hanesan dalan ida atu feto rural sira liu husi rai no empresta osan ne’ebé mak fasil hodi realiza mehi ema ida nian, liu husi osan funan ne’ebé Ki’ik, nune’e fasil ba membru hotu bele asesu hodi emprestimu, hanorin mos atu jere no rai osan rasik liu husi rendimentu ne’ebé hetan husi servisu lor-loron nian.
Relasiona ho grupu foun rua ne’ebé dadaun ne’e KSI estabelese, ida ne’e hatudu katak iha ona grupu ROMANSA lima (5) ne’ebé KSI halo akomapañamentu, tanba antes ne’e eziste ona grupu tolu (3) mak mak hanesan, grupu Bele Kria, Bele Hadia no Haburas.
Molok estabelese grupu ne’e, ekipa servisu KSI hamutuk ho parseiru RHTO fasilita uluk formasaun ba membru grupu sira kona ba métodu no mata dalan Romansa nian, liu husi realiza mehi, hari estrutura no regulamentu internal , nune’e membru sira bele hatene lala’ok Romansa nian hodi bele envolve iha grupu rai osan ba mudansa.
Hafoin formasaun kontinua kedas ho lansamentu atividade Romansa ba grupu foun rua no hahú kedas rai osan ba semana dahuluk nian. Ne’e duni, iha grupu E’Papana membru sira onesege rai osan ba semana dahuluk nian hamutuk $ 74.00 no grupu Fitun Tasi hamutuk $ 48.50.
Resultadu espetativa ne’ebé sei atinje mak hanesan, komunidade sira bele ona rai no jere rasik sira nia rendimentu loro-loron nian hodi bele hadia sira nia moris no hametin ekonomia familia. (**)
