KDADALAK: Bee matan Ahi-garan nu’udar ikon ida iha Aldeia Tuneru, Suku Ilatlaun, Postu Administrativu Bobonaro, Munisipiu Bobonaro, ne’ebé fornese ona bee ba komunidade sira iha tinan barak nia laran. Bee matan ne’e iha foho okos no bainhira konserva halo di’ak bele sai mós fatin turistiku tanba iha paizajen ne’ebé furak.
Maske nune’e, ambiente iha area bee matan Ahi-garan hahú hetan ameasa, liu-liu iha tempu bailoron (Agostu-Outobru 2024) bee matan refere tenki maran. Situasaun ne’e halo komunidade uma kain kuaze 25 resun labele asesu ba bee moos no sei fó impaktu ba vida moris komunidade nian sai vulneravel liu.
Aliende ne’e, impaktu husi mudansa klimatika ne’ebé Timor-Leste hasoru fó risku mós ba bee matan Ahi-garan, tanba ai-laran komesa menus ba bebeik no akontese rai monu tanba komunidade sira kontinua tesi ai arbiru.
Relasiona ho situasaun ne’e, durante loron rua (2) nia laran, hahú husi loron 1-2 Outobru 2024, ekipa servisu Kdadalak Sulimutuk Institute (KSI) hamutuk ho estudante Eskola Popular Agroekolojia (EPA) no komunidade Suku Ilatlaun, hala’o atividade konservasaun bee no rai iha area bee matan Ahi-garan liu husi ke’e debu, kria travasaun no tuir planu sei kuda mos ai-oan iha tempu udan monu rai.
Objetivu ke’e debu atu bele armazena udan-been, nune’e udan been sei infiltra tun ba rai okos hodi fó moris fali ba bee matan sira ne’ebé maran ona. Metodu ida ne’e introdus ho forma tradisionál mak hanesan, hala’o serimonia kultural oho fahi hodi uza nia ran hikis ba bee matan ne’ebé atu konserva nu’udar simbolu loke dalan. Material ne’ebé uza iha atividade mak hanesan, ai-suak, enxada, kanuru suru-rai, karau-dikur no seluk seluk tan.
Maske atividade ke’e debu ne’e la utiliza ekipa pezadu sira, maibé ekipa servisu KSI ho komunidade garante katak bee matan ne’ebé sira konserva sei hetan rejultadu positivu no sei hafasil komunidade sira asesu bee moos ba tempu naruk. Iha atividade konservasaun ne’e, KSI hamutuk ho komunidade suku Ilatlaun konsege ke’e debu bo’ot ida (1), debu ki’ik hodi lasu bee rua (2) no travasaun hamutuk 11. Debu bo’ot ho medida 14x3m2 ho ninia naruk (kedalaman) metru 2 resin. Nune’e mós, debu ki’ik hodi lasu bee ho medida 2x2m2 ho ninia naruk (kedalaman) metru 1.
Total partisipante ne’ebé hola parte iha atividade ne’e hamutuk ema na’in 31, ne’ebé kompostu husi mane ema nain 24 no feto nain 7. Husi numeru ne’e hatudu katak partisipasaun komunidade nian ladun masimu, tanba tuir tarjetu partisipante hamutuk ema na’in 50.
Fasilitador Rosantino Andrade hateten, meus hodi hamoris hikas bee matan sira mak ita presiza rehabilita debu natural, kria fali debu foun (debu buatan), halo travasaun ba kadalak sira, inklui kuda aihoris hodi konserva bee no rai, hodi nune’e bele hametin komunidade nia rejilensia hasoru impaktu mudansa kliamtika.
“Bainhira ita hamoris fali bee matan sira, konserteza ajuda ona ita nia inan feto sira sei la ba kuru bee iha fatin dook. Tan ne’e, atividade konservasaun bee no rai importante tebes ba komunidade rural sira, nune’e bele habelar liu tan ba komunidade sira seluk,” eskarese Rosantino.
Entertantu, Lourenço A. Barreto, Dirijente Komite Zona Bobonaro iha ninia intervensaun hateten, agradese ho inisiativa KSI ne’ebé tulun ona komunidade suku Ilatlaun hodi halo atividade konservasaun ba bee matan Ahi-garan no espera iha tempu bailoron bee matan ida ne’e sei la maran.
Maske iha atividade kee debu no kria travasaun partisipasaun komunidade nian ladun masimu, maibé nia parte promete sei organiza komunidade sira kuda ai-oan no halo lutu haleu bee matan bainhira tempu udan. Material sira ne’ebé uza hodi hala’o atividade KSI entrega ba grupu Halimar hodi asegura. Material hirak ne’e mak hanesan, ai-suak 4, kanuru sura rai 4, enxada 5, karau dikur 5 no gerobak 1. (**)
