Notisia

KSI-RHTO Intervista Grupu ROMANSA Uza Formatu WGQ

KSI-RHTO Intervista Grupu ROMANSA Uza Formatu WGQ

KDADALAK: Atu identifika membru grupu sira ne’ebé kategoria ema ho defisiensia, iha loron 18-19 Fevereiru 2023, Kdadalak Sulimutuk Institute (KSI) hamutuk ho Raes Hadomi Timor Oan (RHTO) hala’o intervista utiliza formatu Washington Grupu Question (WGQ) ba membru grupu Rai Osan Ba Mudansa (ROMANSA) iha Suku Maubaralisa, Munisipiu Liquiça no Suku Raimea, Munisipiu Covalima.

Field Staff ba programa Hakbiit Aksaun Kolektiva ba Igualidade no Inkluzaun Timor-Leste (HAKBIIT) iha Munisipiu Liquiça, Dircia José Maria Sanches hateten, objetivu husi atividade ne’e, atu identifika ema ho defisiensia ne’ebé envolve iha grupu, nune’e bele hetan dadus kona ba ema ho defisiensia, hodi nune’e bele halo advokasia ba sira nia nesesidade para bele hetan asistensia husi instituisaun relevante sira.

Nia haktuir, progarama HAKBIIT foka liu ba enpoderamentu feto Timor-Leste iha area rural, nune’e bele responde ba nesesidade feto ho defisiensia sira ne’ebé sofre husi diskriminasaun, la hetan asesu no oportunidade oi-oin iha sosiedade nia laran nomós iha vida politika.

Dala barak mós feto nia partisipasaun menus tebes, nune’e HAKBIIT mai ho misaun ida atu empodera feto sira iha area rural no feto ho defisiensia sira iha nivel individual, komunidade, munisipiu, nasional ka Governu.

Nia informa, liu husi programa HAKBIIT atu transforma sosiedade ida ne’ebé moris iha inkuzaun sosial, nune’e ema hotu bele hola parte iha kualker atividades ne’ebé halo hamutuk ho grupu baze sira.

Bazeia ba esperensia ne’ebé iha nota katak, ema ho difisiensia barak tebes la hola parte iha implementasaun programa sira iha komunidade, tantu programa husi Governu no sosiedade sivil, tan ne’e liu husi programa HAKBIIT hakarak tebes foti isu inkluzaun sosial nu’udar prioridade hodi halo transformasaun iha sosiedade.

Nia argumenta, atividade intervista ho metodu utiliza Washington Group Question ne’e, atu identifika ema ho defisiensia iha parseiru nia area intervensaun, tanba ne’e KSI hamutuk RHTO fasilita staff kampu sira, inklui dirijente grupu oinsá bele utiliza Washington Group Question hodi intervista benefisiariu sira para bele iha dadus fiksu ba ema ho defisiensia  ne’ebé involve iha servisu grupu,

Aliende ne’e, bele halo mós intervista ba komunidade, ema ho defisiensia ne’ebé iha area intervensaun sira, nune’e dadus hirak ne’e bele sai hanesan baze de dadus hodi bele halo advokasia no intervensaun ba programa sira iha baze, nune’e bele garante aprosimasaun ida ne’ebé inkluzivu.

Iha Suku Maubaralisa intervista ne’e hala’o ba grupu ROMANSA rua (2) maka hanesan, grupu Kulau Naroman no grupu Hadia Moris ho total membru ne’ebé fó intervista hamutuk ema na’in 24, ne’ebé kompostu husi feto na’in 18 no mane 6.

Nune’e mós, Field Staff ba programa HAKBIIT iha Munisipiu Covalima, Domiciana Cardozo haktuir, atividade intervista utiliza formatu Washington Group Question ne’ebé hala’o ba membru grupu ROMANSA iha Suku Raimea, Postu Administrativu Jumalai, Munisipiu Covalima kompostu husi grupu tolu (3) maka hanesan, Buka Moris, Hamoris no Moris Hamutuk.

Husi grupu tolu ne’e total membru ne’ebé konsege intervista hamutuk ema na’in 32, ne’ebé kompostu husi mane na’in 4 no feto 28.

Rejultadu ikus husi atividade ne’e atu hetan dadus fiksu ba partisipasaun ema ho defisiensia iha atividade ROMANSA, maibé atu identifika ema na’in hira mak kategoria ema ho defisiensia no nain hirak mak la’os ema ho defisiensnia, ekipa sei hala’o analiza hamutuk ho organizasaun RHTO hafoin mak bele hatene. (**)

 

 

 

Related Articles