MANUFAHI: Uniaun Agrikultór Munisipiu Manufahi (UAMM) hahú estabelese iha loron 27 Fevereiru 2022, hafoin to’os na’in no kamponeze sira realiza kongresu iha salaun Administrasaun Munisipiu Manufahi durante loron tolu (3) nia laran. Iha kongresu nee maioria kongresista sira hili Delfia Ferreira sai feto dahuluk ne’ebe lidera Uniaun agrikultor Manufahi.
Iha kongresu dahuluk Uniaun Agrikultór Munisipiu Manufahi (UAMM), maioria kongresista sira ne’ebé mai husi Postu Administrativu haat (4) iha Munisipiu Manufahi deposita konfiansa tomak ba Pakote B ne’ebé lidera husi, Delfia Ferreira nu’udar Prezidente, Paulo Spirito Santo nu’udar Sekretariu Jeral no Tomas de Andrade nu’udar Adjuntu Sekretariu Jeral hodi lidera UAMM ba periodu 2022-2027.
Antes hakat ba eleisaun hodi hili estrutura ezekutivu UAMM, kongresita sira aprezenta lista kandidatura rua, ne’ebé kandidatura husi pakote A kompostu husi, Delfia Ferreira (Prezidente), Tomas de Andrade (Sekeratiu Jeral) no Paulo Spirito Santo (Adjuntu Sekertariu Jeral). Nune’e mós iha pakote B kompostu husi, Delfia Ferreira (Prezidente), Paulo Spirito Santo (Sekeratiu Jeral) no Tomas de Andrade (Adjuntu Sekertariu Jeral).
Rejultadu husi eleisaun ne’e hatudu katak, Pakote A hetan votu 48, Pakote B hetan votu 102 no votu nulu hamutuk 7. Bazeia ba lista prezensa ne’ebé komisaun organizador rejista, numeru kongresista ne’ebé hola parte iha eleisaun ne’e hamutuk ema na’in 157 no metade (20%) husi numeru ne’e kamponeze feto.
Kongresu nu’udar mekanismu demokratiku ba organizasaun ida nia ejistensia, tanba ne’e, durante loron tolu nia laran, hahú husi loron 25-27 Fevereiru 2022, to’os na’in no kamponeze sira husi Postu Administrativu haat (4) iha Munisipiu Manufahi halibur malu iha salaun Administrasaun Munisipiu Manufahi hodi realiza Kongresu Dahuluk Uniaun Agrikultór Manufahi.
Durante kongresu, kongresista sira diskute no debates kona ba rejimentu kongresu, estatutu organizasaun, planu no programa organizasaun, aprezenta lista kandidatura, hala’o votasaun hodi hili estrutura foun ne’ebé sei lidera Uniaun Agrikultór Munisipiu Manufahi ba periodu tinan 2022 to’o 2027, inklui rona palestra husi orador sira nomós produs rezolusaun ne’ebé akumula asuntu pertenente ba luta UAMM nian.
Nu’udar organizasaun movimentu, UAMM mai konseitu politika ida hodi luta defende direitu to’os na’in no kamponezes sira, ne’ebé ligadu ho preokupasaun to’os na’in sira kona ba produsaun, merkadu ne’ebé justu no asesu ba rai.
Kongresista sira ne’ebé partisipa iha kongresu ne’e maioria mesak servisu na’in sira ne’ebé hala’o servisu iha to’os, natar, peskas, sira ne’ebé hakiak animal, grupu kreatividade sira no membru koperativa baze sira.
Durante kongresu kongresista sira ativu tebes iha diskusaun no debates kona ba planu no programa UAMM nian iha futuru, tanba kongresista sira konsiente katak hamutuk ho UNMM maka bele luta ba direitu kamponezes soberanu, sosiedade prosperu no igualitariu.
Asuntu rai no agrikultura sai mós issue importante ne’ebé kongresista sira kestiona iha kongresu nia laran, liu-liu oinsá to’os na’in sira bele asesu ba rai hodi hasa’e produsaun agrikola iha Munisipiu Manufahi. Orador iha kongresu ne’e maka hanesan, Kaza Sivil Prezidente Republika, Francisco de Vasconceilos, Akademista Antero Benedito da Silva, Reprezentante Komite Konsolidasaun Nasional, Madalena Bidau Soares ‘Kasian’, reprezentante organizasaun Rede ba Rai, reprezentante Ministeriu Turizmu Komersiu Industria no Administradór Munisipiu Manufahi, Arantes Isaac Sarmento.
