MANUFAHI: Iha Kongresu Dahuluk Uniaun Agrikultór Munisipiu Manufahi, membru komite konsolidasaun nasional, Maria Madalena Bidau Soares ‘Kasian’ deklara, Timor-Leste matenek iha funu, maibé fraku iha dezenvolvimentu.
Durante nia intervensaun, Veterana ‘Kasian’ alerta ba kamponeze sira iha Munisipiu Manufahi katak, tempu to’o ona atu tau forsa hamutuk hodi luta ba povu nia moris di’ak, liu husi dezenvolve setór agrikultura.
Maibé, bainhira ita ko’alia kona ba setór agrikultura konserteza ko’alia mós kona ba rai, ne’e duni ejizensia Reforma Agraria importante tebes iha prosesu ida ne’e, tanba liu husi Reforma Agraria maka ita bele hetan rai hodi uza ba halo to’os no natar.
Aproveita oportunidade ida ne’e, eis gerileira Falintil ne’e husu ba kamponeze sira atu labele fa’an rai, tanba aktu fa’an rai ne’e sei fó risku ba ita nia oan no beioan sira nia futuru.
“Uluk ita luta hodi libeta rai ida ne’e, la’os atu fa’an fali, maibé oinsá maka bele uza rai ida ne’e ho kuidadu no halo produsaun iha rai ne’e nia leten, nune’e bele hadia ekonomia familia,” deklara Vaterana ‘Kasian’ bainhira hala’o deskursu iha Kongresu Dahuluk Uniaun Agrikultór Munisipiu Manufahi, ne’ebé realiza iha salaun Administrasaun Munisipiu iha loron, 25 Janeiru 2022.
Nia fó hanoin, Timor-Leste ezisti hanesan nasaun independente ida, maibé povu kuandu laiha rai hodi dezenvolve ekonomia, konserteza ita sei buka tane liman nafatin ba nasaun seluk. “Bainhira ita nafatin tane liman ba ema seluk, sira sei dehan ba ita katak, imi hatene de’it maka luta ba ukun rasik an, maibé la hatene dezenvolve imi nia ekonomia iha rai laran, entaun buat hotu sei mai husi rai liur no imi nia osan sei ba hotu rai liur no povu kontinua moris ki’ak nafatin,” Kasian kestiona ho lian makas.
Hare ba situasaun hirak ne’e, kamponezes hotu tenke brani no fuan bo’ot hodi servisu makas liu tan, nune’e bele hasa’e produsaun hodi dudu prosesu dezenvolvimentu ekonomia iha rai laran.
Nia mós husu ba kamponeze sira, ferik ka katuas, joven feto ka mane ne’ebé remata ona sira nia estudu mais la hetan servisu, di’ak liu fila mai hamutuk ho maluk agrikultór sira hodi servisu iha to’os no natar, nune’e bele hetan aihan naton hodi han no karik balun bele lori ba fa’an.
“Joven sira tenke organiza malu, labele dependente demais ba inan-aman, maibé oinsá maka bele moris independente hodi kontribui netik buat rum aba familia no nasaun ida ne’e,” hakotu veteran ‘Kasian’.
