KDADALAK: Pandemia Covid-19 hamosu problema ne’ebé seriu iha Timor-Lese, tanba aliende fó ameasa ba ema nia saude, situasaun ne’e prejudika mós agrikultór sira nia servisu iha area rurais, liu-liu agrikultór balun labele halo produsaun no balun lakon merkadu.
Atu rekopera situasaun ne’ebé agrikultór sira enfrenta, liu husi programa Australia Humanitarian Partnership (AHP) Covid-19 Response, organizasaun parseiru Australian Aid, OXFAM no Kdadalak Sulimutuk Institute (KSI) fó apoiu pakote fini ba agrikultór sira iha Munisipiu Liquiça no Ermera.
Objetivu husi atividade ne’e, atu tulun agrikultór sira oinsá bele hadia rendimetu ekonomia familia liu husi hasa’e produsaun iha rai laran, aliende ne’e, bele garantia agrikultura sustentavel, tanba maioria povu Timor-Leste moris husi vida agrikultór.
Bazeia ba lista distribuisaun ne’ebé iha, kuaze benefisariu hamutuk 675 maka hetan apoiu pakote fini husi organizasaun parseiru Australian Aid, OXFAM ne’ebé kolabora ho KSI. Area tarjetu ba implementasaun programa ne’e hamutuk suku sanulu (10) ne’ebé kompostu husi Suku lima (5) iha Munisipiu Ermera maka hanesan, Suku Lihu benefisariu hamutuk xefi familia 68, Suku Matata benefisariu hamutuk xefe familia 68, Suku Poetete benefisariu hamutuk xefe familia 68, Suku Ponilala benefisariu hamutuk xefe familia 68 no Suku Leguimea benefisariu hamutuk xefe familia 68.
Nune’e mós, Suku lima (5) iha Munisipiu Liquiça kompostu husi Suku Fahilebo benefisariu hamutuk xefe familia 67, Suku Lisadila benefisariu hamutuk xefe familia 67, Suku Vatovou benefisariu hamutuk xefe familia 67, Suku Lauhata benefisariu hamutuk xefe familia 67 no Suku Maubaralisa benefisariu hamutuk xefi familia 67.
Item ba pakote fini maka hanesan, fini batar, fini modo mutin, kanko, brinjela, alfase no lis, inklui gembor no balde. Maibé, antes ida ne’e, sira mós hetan apoiu fatin ba rai fini no fatin ba rai aihan nian.
Benefisariu Jacob Monis husi Aldeia Daru-lema, Suku Lisadila, Postu Administrativu Maubara, Munisipiu Liquiça hateten, maski fini ne’ebé sira hetan naton de’it, maibé nu’udar agrikultór sente kontenti ho apoiu ida ne’e, tanba durante ne’e defisil tebes ba sira atu asesu ba fini.
“Fini ne’ebé ami simu naton de’it, maibé ida ne’e ajuda tebes ona ami tanba sei la sosa tan fini. Fini hirak ne’e ami sei lori ba kuda, liu-liu fini batar. Maibé, kona ba fini modo seidauk bele kuda tanba tempu liu ona, ne’e duni ami sei rai halo di’ak no to’o nia tempu maka foin bele kuda,” dehan Jacob Martins hafoin simu pakote fini iha Sede Suku Lisadila.
