Liu husi programa Australia Humanitarian Partnership (AHP) Covid-19 Response, ho tulun husi parseiru Australian Aid, OXFAM kolabora ho Kdadalak Sulimutuk Institute (KSI) apoiu aihan bazika ba ema vulneravel sira iha Munisipiu Liquiça no Ermera.
Iha Munisipiu Liquiça area ne’ebé sai tarjetu ba implementasaun programa ne’e maka hanesan, Suku Maubaralisa, Suku Fahilebo, Suku Lisadila, Suku Vatovou no Suku Lauhata. Nune’e mós, iha Munisipiu Ermera kompostu husi Suku Lihu Suku Matata, Suku Poetete, Suku Ponilala no Suku Leguimea.
Total benefisariu ne’ebé asesu ba aihan baziku ne’e hamutuk xefe familia 925 no kada xefe familia iha direitu hetan fos 30kg karon ida, masin midar 2kg, mina litru 5 ida, susu ben lata 3 no masin falun 11.
Benefisariu Abel de Araujo husi Aldeia Lisa Lara, Suku Maubaralisa, Postu Administrativu Maubara, Munisipiu Liquiça hateten, nia sente kontenti no agradese ba apoiu hirak ne’e, tanba bele ajuda ona povu kbit la’ek sira.
“Ami la hare ba kuantidade sasan, maibé ida ne’e ajuda ona tebes ami, tanba ami la hasai osan mais simu ho gratuita de’it,” dehan benefisariu, Abel de Araujo hafoin simu pakote aihan bazika iha Sede Suku Maubaralisa.
Partisipa iha atividade ne’e, Xefe Suku ho ninia estrutura suku, benefisariu, OPS no ekipa servisu husi KSI. Atividade ne’e hetan apoiu fundus husi Australian Humanitarian Partnership (AHP), Australian Aid, OXFAM no implementa husi KSI.
