Ermera: Hafoin remata hala’o kampaña vasinasaun iha Suku Ponilala, Postu Administrativu Ermera, Munisipiu Ermera, Ministru Administrasaun Estatal, Miguel Pereira de Carvalho simbolikamente entrega aihan baziku ba komunidade vulneravel iha suku Ponilala ne’ebé apoiu husi organizasaun OXFAM ho kolaborasaun husi Kdadalak Sulimutuk Institute (KSI).
Antes entrega aihan baziku ho simbolikamente ba benefisariu sira, Ministru Estatal konsege hala’o diskusaun badak ho Vise Diretur KSI, Pedro Brito Fernandes iha minutu balun nia laran, hodi ko’alia kona ba objetivu husi ajuda hirak ne’e no meius ne’ebé maka KSI ho ninia parseiru sira implementa.
Durante diskusaun, Ministru Miguel Pereira de Carvalho husu ba KSI atu hare tempu ruma hakat ba iha ministeriu ESTATAL atu ko’alia ka halo diskusaun ruma kona ba prosesu distribuisaun aihan baziku ne’ebé durante ne’e KSI ho ninia parseiru sira implementa iha terenu. Ministru mós husu ba KSI atu apoiu no hola parte iha prosesu distribuisaun, karik atividade programa sesta bazika iha kontinuasaun.
“Ha’u fiar imi iha makina distribuisaun ne’ebé di’ak, ne’e duni karik programa sesta bazika iha kontinuasaun, ita bo’ot sira bele apoiu iha parte distribuisaun,” esplika Ministru Miguel Pereira de Carvalho iha Suku Ponilala, foin lalais.
Entertantu Xefi Suku Ponilala, Amaro S. dos Santos iha ninia intervensaun hateten, ita halibur hamutuk iha fatin ne’e atu hala’o distribuisaun aihan baziku ba ema vulneravel sira ne’ebé apoiu husi parsero OXFAM no KSI.
Nia haktuir, prezensa KSI iha fatin ne’e la’os foin primeiraves, maibé desde tinan 2000 liu husi programa advokasia ba asuntu rai no reforma agraria, liu-liu hodi defende toos nain sira nia direitu ba rai no plantasaun.
Aliende ida ne’e, iha meadu tinan 2009, KSI implemeta mós programa apoiu uma ba komunidade kbit laek sira iha Aldeia Sakoko, Lekesi, Maudiu no Fatukeru. Maibé, ohin sira mai hodi apoiu aihan baziku ba ema kbit laek no maluk defisiente sira relasiona ona ho situasaun Covid-19.
Vise Diretur KSI, Pedro Brito Fernandes iha ninia intervensaun hateten, pakote aihan bazika ne’ebé KSI ho ninia parsero oferese ba grupu vulneravel sira ne’e ninia kuantidade oituan de’it, maibé fiar katak apoiu hirak ne’e bele ajuda maluk vulneravel sira durante situasaun estadu emerjensia.
Pakote aihan hirak ne’ebé KSI distribui maka hanesan fos, masin midar, mina, susu ben no masin. Ne’e duni, kada xefi familia iha direitu atu hetan fos 30kg saku 1, mina litru 5 masa 1, masin midar 2kg, masin falun 11 no susu ben lata 2.
Iha sorin seluk, benefisariu Fernando Soares husi Aldeia Sakoko, Suku Ponilala hateten, nia parte sente kontenti no agradese ba organizasaun KSI, OXFAM ho ninia parsero sira ne’ebé apoiu ona aihan ba komunidade kbit laek no defisiente sira.
“Maski oituan ka barak ami agradese ona, tanba ami la hasai osan hodi sosa mais ida ne’e ajuda de’it. Ami mós husu ba KSI ho ninia parseiru sira karik bele kontinua ajuda ami kbit laek sira iha futuru,” dehan Fernando.
