ERMERA(Kdadalak)-Atu garantia ejistensia Movimentu Uniaun Agrikultor Ermera (UNAER) iha futuru, daudauk ne’e dirijente UNAER hamutuk ho ninia parseria, Kdadalak Sulimutuk Institute (KSI) komesa tun ba iha baze hodi hala’o inkontru ho membru komite baze sira.
Kinta-Feira, (29/09) Vise Prezidente Movimentu Uniaun Agrikultor Ermera (UNAER), Alberto Guterres dos Santos hamutuk ho ekipa servisu Kdadalak Sulimutuk Institute (KSI) ne’ebé lidera husi, Daniel Santos hala’o inkontru ho membru komite baze Zona Hatulia A hodi ko’alia kona ba planu no preparasaun ba III Kongresu UNAER nian.
Tuir planu III Kongresu UNAER nian sei hala’o iha Munisipiu Ermera fulan Fevereiru tinan 2017. Objetivu husi Kongresu ne’e, atu hili estrutura no lideransa foun UNAER nian hodi lidera movimentu ida ne’e durante tinan lima nia laran.
Publiku tomak hatene, tinan barak nia laran UNAER eziste iha Munisipiu Ermera hodi defende direitu povu agrikultor sira kona ba rai no plantasaun no durante ne’e UNAER konsege reforma ona rai no plantasaun balun ne’ebé uluk kolonial sira hadau hodi fahe fila-fali ba komunidade sira.
Relasiona ho asuntu ida ne’e, Daniel Santos hateten, pontus importante rua mak koa’lia iha inkontru ida ne’e. Primeiru diskuti kona ba preparasaun Kongresu UNAER nian ne’ebé tuir planu sei realiza iha fulan Fevereiru tinan oin no segundu ko’alia kona ba planu simu estudante foun iha Institute Ekonomia Fulidaidai-Slulu (IEFS)
“ohin ami mai iha ne’e hodi hala’o inkontru ho membru komite baze sira hodi deside saida mak sira atu halo no saida mak ami hanesan Sekertariadu prepara bainhira hala’o kongresu UAER nian ba dala tolu.” dehan Manajer Programa ba Asuntu Advokasia ne’e.
Iha inkontru ne’e komite baze sira husi zona Hatulia A ne’ebé kompostu husi, komite baze Manusae, Gou-io, Mertutu, Talo no Manutasi hamutuk ho ekipa servisu KSI nomós UNAER deside katak, membru komite baze sira sei halo kon
Aliende ida ne’e, Daniel husu mós ba kada komite baze sira atu delega ema na’in rua hodi ba eskola iha Institute Ekonomia Fulidaidai-Slulu hodi nune’e aprende no hakbit kapasidade toos na’in sira para kontinua ativa hodi halo mudansa iha baze hirak ne’ebé sai hanesan baze UNAER nian tuir filosofia ne’eb’e mak eskola opta, “ hamutuk ita prepara rekursu umanu hodi fila ba suku dezenvolve komunidade rural.”
Entertantu Vise Prezidente UNAER, Alberto Guterres dos Santos hateten, objetivu husi kongresu ne’e atu hili dirijente ka lideransa foun hodi nune’e bele kontinua luta UNAER nian. Maibé, ema sira ne’ebé atu ba tuur iha estrutura tenke kaer metin espiritu volontarismu no partisipativu.
“Ko’alia kona ba kongresu konserteza ita atu deskuti kona ba vida UNAER nian iha futuru, maibé atu garantia kongresu ne’e bele la’o diak ita presiza hala’o preparasaun, liu-liu kona ba fatin ne’ebé uza hodi halo kongresu, mobilizasaun masa, prepara transporte no akomodasaun” dehan Vise Prezidente UNAER iha ninia deskursu bainhira halo inkontru ho komite baze sira ih Zona Hatulia A.
Nia haktuir, ho razaun hirak ne’e hotu mak presiza halo inkontru ho komite baze sira para atu bele fahe servisu ba malu hodi nune’e kongresu bele la’o di’ak. Tuir planu kontinuasaun husi inkontru ida ne’e sei hala’o iha semana ida ne’e nia laran iha zona Hatulia B nian. (**)
