Opiniaun

Ekonomia Solidariu; Luta ba futuru ida justu

Ekonomia Solidariu; Luta ba futuru ida justu

Ohin loron, ema barak hatene katak pratika ekonomia kapitalismu ka liberal halo ema nia moris no planeta ne’e hanesan objetu ida. Sistema ida ne'e la sustentavel iha ambiente no sosialmente la justu, tanba la konsege garante kondisaun moris ne'ebé dignu ba ema hotu iha fatin ne’ebé de'it iha planeta ida ne’e. Carlos Askunze, REAS-Rede España Ekonomia Solidariedade.

Aliende ne’e, la tulun povu klase baixa sira atu liberta a’an husi kiak. Nune’e mós, la konsege liberta klase proletariadu husi formas explorasaun no esploitasaun oin-oin liu husi meius monopoliu, injustisa merkadu hasoru produtór sira, akumulasaun kapital, violasaun direitu serbisu-na’in, dezigualdade sosial no seluk-seluk tan.

Iha kontestu Timor-Leste nian, vizaun ekonomia ne’ebé haktuir iha Planu Estratéjiku Dezenvolvimentu Nasional (PEDN), konsidera nu’udar prosesu ida atu prodús kondisaun-produsaun nesasária hodi transforma Timor-Leste sai nasaun kapitalizmu indústriál ka transformasaun ba modu produsaun kapitalista nian, ne’ebé implika prosesu proletarizasaun no dominasaun rai nu’udar kondisaun absoluta ba transformasaun refere. (Yazalde Manaka Savio, Vizaun Ekonómia PEDN no Teoria Akumulasaun Primitiva Karl Marx). Tanba, kuaze dekade rua ona Timor-Leste hamrik nu’udar pais independente, maibé sistema ekonomia iha Timor nafatin seidauk hatudu mudansa ne’ebé signifikativu, tanba konseitu ekonomia ne’ebé Timor-Leste adopta la apar ho karakteristika Timor nian, ne’e duni defisil atu atinji ekonomia ida ne’ebé prosperu ba komunidade.

Iha mundu tomak agora dadauk mosu ona esplozisaun ba prátika ekonómika solidariu, tanba iha razaun oi-oin, inklui kondisaun moris ema nian ne'ebé aat liu no hodi hakle'an kiak, tanba tuir lójika kapitalizmu nian, ema no sosiedade sai rekursu ba sira atu esplora, sira-nia valór iha forma servisu ka relasaun sosiál nian ba hamenus valór iha maximu lukru, degradasaun ambientál ne'ebé kle'an, provoka husi modelu ekonómiku lineár ida ne'ebé estrativu, intensivu no luan hodi lori ba poluisaun no mudansa klimátika.

Iha kontestu ida ne’e, mosu ona inisiativa kona ba ekonómika solidariu ne'ebé hahú deskobre fila-fali prátika ne'ebé laiha tempu no hahalok kulturál sira, hodi renova no adapta ba kontestu agora nian liu husi uzu teknolojia foun no rekursu modernu, rejenerativu no reziliente sira seluk.

Ekonomia Solidariedade Sosial (Social Solidarity Economy) inklui prátika oi-oin ne'ebé luan liu husi dimensaun ekonómiku, sosiál, ambientál, polítiku, komunitáriu ka holistiku. Ekonimia Solidariu respeita esperiénsia lokál oin-oin, istória, kultura no realidade polítika ekonomia no diferensa iha definisaun. Maski nune’e, iha vizaun jerál ida-ne'ebé komún ho valór no prinsípiu sira ne'ebé hetan iha mundu tomak.

Termu "Ekonomia Solidariu” komesa uza iha tinan 90 nia rohan, hafoin sorumutu dahuluk kona ba saida mak sei sai rede RIPESS ne’ebé hala'o iha Lima, Peru, loron 4 Jullu 1997. Iha momentu ne’e, nasaun 30 konkorda kona ba integrasaun forte entre estrutura ekonomia sosiál ne'ebé tradisionál liu (empreza koletiva - setór ekonomia solidariedade nian ida) no aprosimasaun ne'ebé holistiku no alternativu ba prátika ekonomia solidariu iha komunidade sira.

Iha nasaun barak ne'ebé ko'alia lia-Franses no lia Espanoliferu, espresaun ne'ebé uza maka "Ekonomia Sosial no Solidariu," bainhira rede RIPESS hetan anunsia formál iha Dezembru 2002, hateten katak ekonomia solidariu nia objetivu maka atu troka sistema transformativu, inklui ekonomia sosial.

Iha tinan hirak foin lalais, movimentu globál ida ne'ebé mosu daudaun - alternativu ida ne'ebé sa'e lalais liu tán, ne'ebé lidera husi sidadaun sira ho objetivu atu harii ekonomia no sosiedade ida ne'ebé bazeia ba inisiativa lokal, hetan rede globalmente, ho enkuadramentu politiku ne'ebé luan, (maibe la'ós ideolojiku), bazeia ba solidariedade, igualdade, direitu umanu no direitu ba rai, auto-determinasaun, mutualidade no kooperasaun.

Ekonomia Solidariu nu'udar alternativa ba kapitalizmu no sistema ekonómiku autoritaria sira seluk ne'ebé estadu domina. Iha Ekonomia Solidariedade Sosial ema baibain hala'o papél ativu hodi forma dimensaun hotu-hotu husi ema nia moris, ekonómiku, sosial, kulturál, polítiku no ambientál sira. Ekonomia Solidariu eziste iha setór hotu-hotu iha ekonomia produsaun, finansas, distribuisaun, troka, konsumu no governasaun. Nia mós ho objetivu atu transforma sistema sosiál no ekonómiku ne'ebé inklui setór públiku, privadu no terseiru.

Ekonomia Solidariu la'ós de'it ko’alia kona-ba ema kiak sira, maibé nia haka'as an atu halakon dezigualdade sira, inklui klase sosiedade hotu-hotu. Ekonomia Solidariu iha kapasidade atu foti prátika di'ak sira ne'ebé eziste iha ita-nia sistema ohin loron (hanesan efisiénsia, uzu teknolojia no koñesimentu) no transforma prátika sira-ne'e hodi serve komunidade nia di'ak bazeia ba valór no meta oioin.

Hare ba asepeitu hirak ne’e hotu, iha Timor-Leste ema barak hahú hanoin ona, tantu iha nivel akademiku, sosiadade sivil no organizasaun movimentu sira komesa kria diskusaun ida kritiku oinsá bele akumula ideas hodi dezaña konseitu ida ne’ebé bele dezenvolve sistema akonomia tuir kultura, sosiu ekonomiku no karakteristika Timor nian, nune’e bele hamosu alternativu ida hodi kontribui ba dezenvolvimentu ekonomia rai laran.

Iha nivel sosiedade sivil, Kdadalak Sulimutuk Institute (KSI) ho nia aliadu sira ne’ebé servisu besik liu ba komunidade iha area rurais, hanesan Uniaun Agrikultór Ermera (UNAER), Movimentu Popular Reforma Agraria Liquiça (MPRAL), Uniaun Agrikultór Covalima (UNARCO), Uniaun Agrikultór Munisipiu Manufahi (UAMM), Uniaun Agrikultór Munisipiu Bobonaro (UAMB) no grupu to’os na’in husi Munisipiu sira seluk hahú dezenvolve sistema ekonomia ida ne’ebé hanaran “Ekonomia Solidariu”, tanba konseitu ida ne’e iha valor prinsipal husi aspeitu sosiu kultura ne’ebé bele fó vantajen ba ema hotu.

Iha Timor-Leste konseitu ekonomia solidariu hahú movimenta desde tempu vizavo sira, liu husi pratika tradisaun ne’ebé uluk kedas sira hala’o hodi fahe rekursu ba malu, ajuda malu iha parte lia moris no lia mate, servisu hamutuk, halo to’os hamutuk no fahe fini ba malu. Tanba ne’e, presiza dezenvolve konseitu sira hahesan Fulidadai, Kawak, Harosan, Slulu, Taeri, Horu-horun, Kalulun no seluk tan, sai konseitu ida ba ekonomia nasional. (sita iha artigu ne’ebé hakarek husi Challys Costa Ma’apokyl kona ba Kapital Sosial no Ekonomia Solidariu iha Timor-Leste).

Nune’e mós, hakerek na’in ida husi Indonezia, Sugiarto Arif Santoso (Direktur Eksekutif IKA) iha ninia artigu hateten, ekonomia solidariu nu'udar movimentu mundiál ida atu hari ekonomia ida ne'ebé justu no sustentavel. Aliende ne’e, ekonomia solidariu presiza mudansa iha paradigma ekonómiku husi ida-ne'ebé prioritiza lukru no kresimentu ba ida-ne'ebé prioritiza moris iha armonia entre ema no natureza. Maibé, xave atu implementa prinsípiu ekonomia solidariu hodi atinje ekonomia ida ne’ebé justu no sustentavel, presiza organizasaun sira tenke servisu hamutuk hodi jere modelu ekonómia ida ne'ebé atu implementa.

Atividade hirak ne’e hanesan estratéjia ida atu hadi'a no dezenvolve ekonomia rai laran, liu husi maximiza utilizasaun produsaun lokal sira. Nune’e mós, bele ajuda hasa’e konsensia ema ida-idak nian hodi kontinua kuda no produs, atu nune’e bele fornese nesesidade loron-loron nian sein depende ba produsaun husi liur, ida ne’e sei afeita ba prezervasaun natureza hodi asegura komunidade sira nia moris di'ak.

Ekonomia Solidariu iha Kontestu Rejionál

Ekonomia solidariu nu’udar meus aprosimasaun ida ne'ebé etiku no bazeia ba valór dezenvolvimentu ekonómiku ne'ebé fó prioridade ba povu no planeta nia moris di'ak, liu fali lukru no kresimentu matan-delek.

Ekonomia solidariu ne'e inklui empreza, organizasaun no entidade sira seluk ne'ebé envolve iha atividade ekonómika, sosiál no ambientál sira hodi serve interese koletivu ne'ebé bazeia ba prinsípiu sira kooperasaun voluntáriu no asisténsia mutual, governasaun demokrátika no partisipativa, autonomia no independénsia, no prioridade ema no objetivu sosiál sira-nian liu kapitál iha distribuisaun no utilizasaun surplus ka lukru nomós rikusoin.

Entidade sira ekonomia solidariu nian aspira ba viabilidade no sustentabilidade ba tempu naruk, tranzisaun husi ekonomia informál ba ekonomia formál no funsiona iha setór hotu-hotu ekonomia nian. Sira implementa valór lubuk ida ne'ebé intrinsiku ba sira-nia funsionamentu no konsistente ho kuidadu ba ema no planeta, igualdade no justisa, interdependensia, auto-governasaun, transparénsia no akontabilidade, no atinji servisu ne'ebé di'ak no meiu moris. Bazeia ba sirkunstánsia nasionál sira, Ekonomia Solidariu ne'e inklui kooperativa, asosiasaun, sosiedade mutual, fundasaun, empreza sosiál sira, grupu auto-ajudu no entidade sira seluk ne'ebé funsiona tuir valór no prinsípiu sira husi Ekonomia solidariu.

Nu’udar krize ekonómiku sira, dezigualdade ne'ebé boot no mudansa klimátika promove debate globál ida kona-ba signifikasaun no trajetória dezenvolvimentu nian, atensaun ne'ebé boot liu foka ba "ekonomia sosiál no solidariedade" hanesan aprosimasaun ne'ebé distintu ba dezenvolvimentu sustentavel no bazeia ba direitu.

Instituisaun no organizasaun sira iha ekonomia sosiál hala'o papél importante iha promosaun ba moris no kriasaun empregu iha kombate hasoru ki’ak. Empreza sira iha ekonomia sosiál oferese fonte importante ida ba empregu, hasoru problema globál dezempregu no dezempregu.

Oras ne'e, estimativa katak movimentu kooperativa globál ne'e diretamente fornese auto-empregu produtivu ba traballador millaun atus ba atus ne'ebé mak na'in ba kooperativa produsaun no servisu sira, nune'e mós ba funsionáriu naun-membru sira no empreza kooperativa sira seluk. Kooperativa agrikultura sira kria empregu iha área sira hanesan produsaun ai-han, merkadu, kréditu, seguru no transporte. Kooperativa sira mós fornese oportunidade servisu ne'ebé ho kualidade di'ak liu ba foin-sa'e sira, feto sira, ema rai-na'in sira, ema ho defisiénsia sira no grupu marjinalizadu sira seluk.

Kooperativa sira kontribui ba hamenus kiak liu husi tau liu atensaun ba seguransa servisu ba membru empregadu no membru família empregadu sira-nian, selu saláriu kompetitivu, promove rendimentu adisionál liu husi fahe lukru, distribui dividendu no benefísiu sira seluk no suporta fasilidade komunidade sira hanesan klínika saúde no eskola sira ne'ebé halo negósiu iha setór privadu.

Kooperativa sira promove integrasaun sosiál no koezaun bainhira hasoru dezigualdade iha kapasidade sosiál sira liu husi reforsu no fó lian ba ema kiak sira nomós grupu marjinalizadu sira hodi promove organizasaun federasaun no aliansa sira.

Ezemplu inisiativa ekonomia solidariu iha Munisipiu Ermera

Ermera nu’udar munisipiu ida ne’ebé lokaliza iha parte Oeste illa Timor nian no iha potensia ba dezenvolvimentu setor agrikultura, liu-liu kafé. Maibé, saida mak akontese hafoin Timor-Leste hetan ukun rasik an, problema sosial no ekonomia povu nian nafatin laiha solusaun, ema barak kontinua moris ki’ak, balun kontinua lakon sira nia hela fatin no rai ba produsaun nian.

Situasaun ne’e akontese tanba estadu ida ne’e adopta sistema demokrasia sosial ne’ebé admite mós setor privadu, inklui politika ne’ebé produs husi ukun nain sira kontinua fó espasu ba ema osan nain no kompañia sira okupa rai produtivu barak hodi utiliza ba sira nia interese. Ezemplu, (Governu dezenvolve kontratu ho Timor Global hodi entrega plantasaun SAPT iha Fatubesi, inklui pesoal balun ne’ebé mai reklama kona ba plantasaun Aifu no fatin seluk tan iha Ermera). 

Tanba sente katak pratika obkurantismu husi ukun kolonial kontinua akontese, ne’e duni maubere oan sira, liu-liu povu iha Munisipiu Ermera hamrik hodi luta ba reforma agraria, nune’e bele lori igualidade sosial ba iha sosiedade hodi konkista prinsipiu kaer rasik kuda talin, (ita mak tenke sai na’in ba kuda ne’ebé ita kesi ka halo to’os karik tenke iha duni ita nia to’os).  

Klaramente aktu hirak ne’e hetan reasaun makas husi komunidade sira, tanba sente katak produtu politiku ne’ebé produs husi ukun nain sira la afavor ba povu ki’ik ne’ebé maioria agrikultór iha nasaun ne’e.  Tanba ne’e, komunidade lokal ho apoiu husi grupu Klibur Juventude Haburas Rai (KJHR) reforma tiha plantasaun Ramlihu no Ponilala-Ria iha Suku Ponilala, hodi nune’e fó espasu ba komunidade sira atu utiliza rai ne’e ba produsaun agrikula no produsaun kafé.

Iha inisiu tinan 2000, organizasaun Kdadalak Sulimutuk Institute (KSI) no organizasaun nasional seluk hanesan Institutu Sahe, Advokasia Liberta no organizasaun parseria sira seluk servisu hamutuk hodi fó asisténsia ba to’os nain kafe sira iha baze Sacoco, Lequise, Maudiu, Fatubesi no seluk tan hodi luta ba reforma agraria iha munisipiu Ermera.

Hafoin reforma tiha rai no plantasaun hirak ne’e, dirijente baze ho komunidade balun hahú hanoin ona oinsá bele estabelese grupu kooperativa iha baze ida-idak hodi introdus konseitu ekonomia solidariu, tanba konseitu ida ne’e iha relasaun metin ho asaun sosial sira ne’ebé mai ho prinsipiu solidaridade, sustentabilidade, diversifikasaun, demokrasia, prosperiedade nomós bele influensia komunidade sira atu servisu hamutuk hodi dezenvolve ekonomia ida ne'ebé la depende ba reseita husi liur (external).

Durante servisu ho to’os na’in sira iha munisipiu Ermera, atividade inisiu ne’ebé KSI hala’o mak peskiza kona-ba asuntu rai no uma, hala’o edukasaun popular ba komunidade, hakbi’it komuidade iha asuntu demokrasia baze, inklui estabelese rede servisu ho organizasaun nasional no internasional sira. Programa sira ne’ebe KSI hala’o, kategoria ba iha divizaun rua: dahuluk, transformasaun konflitu no ida seluk mak trasformasaun sosial. Desde servisu hamutuk ho komunidade, aktividade barak mak KSI hala’o iha baze foka ba reforsa inisiativa lokal hodi luta ba direitu sosial, ekonomia, kultura no legal nian. Tuir rezultadu evaluasaun rezulta katak komunidade sente duni vantazen barak husi servisu ne’ebé KSI hala’o hodi transforma vida moris komunidade nian (Pereira Daniel; Participatory Survey 2006 page.2).

Iha tinan 2001, Klibur Juventude Haburas Rai (KJHR) kensege hala’o ona atividade lubuk ida hodi apoiu luta ba reforma agraria. Atividade sira ne’ebé KJHR hala’o iha momentu ne’e mak hanesan, Tara Bandu, hari uma ba ema vuneravel sira, rehabilita plantasaun kafé liu husi kuda ai-oan (reflorestasaun), konservasaun bee, hala’o atividade edukasaun popular no dezenvolve kapasidade organizasaun, inklui organiza to’os na’in sira hodi rai osan (arisan).

Grupu rai osan iha momentu ne’e fahe ba rua (2), grupu ida ho naran Haburas ne’ebé kompostu husi membru hamutuk ema na’in 30 no kada membru iha obrigasaun rai osan $5.00, nune’e mós grupu Moris Foun ho membru hamutuk ema na’in 30 no kada membru iha obrigasaun rai osan $ 10.00. Atividade hirak ne’e realiza husi inisiativa to’os na’in sira, tanba ho hanoin ida katak atu muda sira nia kondisaun moris nu’udar responsabilidade ema ida-idak nian, la’os depende ka hein de’it ajuda husi liur, nune’e mós bele garante sosiedade ida ne’ebé independente no sustentavel. (sita iha livru ho titlu, Komunitas Sakoko Di Mata Kdadalak Sulimutuk Institute ne’ebé hakerek husi Daniel Pereira).

Hare ba tempu ne’ebé la’o no problema sosial barak ne’ebé mosu iha era ukun an nia laran, obriga mós dirizente KJHR ho KSI hodi hala’o reflesaun ba situasaun hirak ne’ebé afeita tebes ba vida moris komunidade nian, tan ne’e presiza estabelese movimentu kooperativas iha baze hodi hemetin ekonomia ida forte no sustentavel, nune’e bele apoiu movimentu transformasaun sosial iha komunidade ba tempu naruk.

Ho hahoin hirak ne’e, akontese sorumutu ida entre grupu KJHR, Kdadalak Sulimutuk Institute (KSI) no komunidade baze Sacoco deside hodi transforma grupu KJHR ba kooperativa ho naran Kooperativa Hamri’ik ho Ain Rasik (KOHAR) hodi hala’o misaun transformasaun ekonomiku, sosial no ekolojiku.

Kazu Kooperativa Hamriik ho Ain Rasik (KOHAR) 

Kooperativa KOHAR hahú hamri’ik iha loron 12 Maiu 2007 ho membru hamtuk ema na’in 43, kompostu husi mane 40 no feto 3. Iha tempu ne’ebá kapital inisiu ne’ebé membru sira rai ho montante U$ 607.00 nu’udar fundu hahú. Fundu ne’e utiliza ba hala’o negosiu bazeia ba planu kooperativa nian.

Durante tinan ida resin hala’o atividade negosiu, KOHAR hetan akompañamentu direita husi Kdadalak Sulimutuk Institute, maibé atividade hirak ne’e ladun hetan mudansa signifikativu, tanba jestaun interna kooperativa nian seidauk la’o di’ak, menus koñesimentu husi dirijente sira no kestaun hirak seluk tan ne’ebé iha relasaun ho servisu kooperativa nian.

Meske hasoru hela dezafiu oin-oin, maibé dirizente sira nunka lakon esperansa no kontinua organiza malu hodi buka estretejia foun oinsá atu responde dezafiu sira ne’ebé kooperativa enfrenta, tan ne’e iha tinan 2008, KSI halo lobby ho organizasaun ekonomiku sira no empreza balun hodi promove valor merkadu justu ba kafe no produtu agrikula seluk.

Husi esforsu ida ne’e, KSI ho KOHAR konsege hetan organizasaun PARCIC ne’ebé serbisu direitamente ba asuntu ekononomia no komersiu justu – fair trade, ne’ebé ikus mai PARCIC liga KOHAR ho kompañia ida ne’ebé promove komersiu justu ho naran ZENCHO husi Japaun hodi kafé robusta ho aprosimasaun komersiu justu.

Tuir artigu ne’ebé hakerek husi Leonardo Soares no Bento Salsinha ho titliu Ekonomia Slulu–Ekonomia Solidária: Estudu Kazu Kooperativa KOHAR Sacoco katak, kafé robusta ne’ebé kompañia ZENCHO sosa husi membru kafekultór KOHAR nian, kategoria ba grau rua; Grau A kada kilograma $1.25 no grau B kada kilograma $1.00, husi presu rua ne’e dedukta $0.10 centavus kada kilograma ba fundu KOHAR nu’udar kontribuisaun membru, nune’e kada kilograma kafekultór sira hetan $1.15 ba kualidade A no $0.90 ba grau B. Aleinde ne’e, bainhira kafé preparadu ona atu exporta, ZENCHO mós oferese premiu sosial – social premium $0.44 centavus kada kilograma ba kafekultor sira liu husi KOHAR.

Susesu Ne’ebé KOHAR Atinje

Aprende husi dezafiu no problema hirak ne’ebé Kooperativa Hamri’ik Ho Ain Rasik (KOHAR) enfrenta durante nia ezisténsia, ho esforsu husi dirijente no membru sira konsege halo mudansa barak ba servisu kooperativa nian, nune’e iha tinan 2014 KOHAR hamutuk ho KSI hala’o identifikasaun hodi apoiu uma semi permanente hamutuk unidades 57 ba membru kooperativa no komunidade vulneravél ne’ebé hela nia kondisaun uma la adekuadu.  Husi total uma ne’ebé konstrui, kuaze 21 uma mak entrega ba membru KOHAR no 36 uma entrega ba komunidade non-membru ne’ebé vulneravel.

Aliende ne’e, atu fasilita membru sira nia atividade diaria bele la’o efetivu no efisiente, KOHAR mós utiliza fundu premiu sosial hodi sosa makina prosesamentu kafe kulit tasak manual, sosa kalen uma nian distribui ba membru sira, inklui terpal. KOHAR mós utiliza fundu premiu sosial hodi apoiu kanalizasaun beemos ho distansia kilometru 2,9 ba komunidade uma kain 66 iha Sacoco, tanba tinan barak nia laran komunidade hirak ne’e susar tebes asesu ba beemos.

Seluk fali, KOHAR mós estabelese viveirus komunitaria permanente hodi produz ai-oan kada tinan distribui ba membru no non-membru sira hodi reabilita plantasaun kafé tuan sira, inklui mós kuda ai no ai-fuan ne’ebé iha valor ekonomiku as iha merkadu hodi diversifika rendimentu komunidade.

Relasiona ho atividade negosiu ne’ebé durante ne’e KOHAR hala’o, atualmente KOHAR nia kapital atinji ona $ 29,253.00. Fundu ne’e konsidera nu’udar kapital investimentu hodi kontinua apoiu programa hirak ne’ebé planeia ona. AleInde iha ona fundus rasik, KOHAR mós iha ona patrimoniu (asset) hanesan, kareta baskolante super HD 1, motor megapro 1, kamera digital 1, laptop 1, brankas 2, inklui fatin ba rai kafé ne’ebé bele utiliza hodi apoiu servisu kooperativa nian.

Iha intervista badak ne’ebé madia Kdadalak hala’o ho dirijente KOHAR, Bento Salsinha katak, dala barak patrimoniu hirak ne’e utiliza mós ba apoiu sosial ba membru no komunidade ne’ebé la’os membru. Ezemplu, kareta bele uza hodi transfere ema moras ho kondisaun emerjensia husi aldeia Sacoco ba klinika ka ospital, apoiu transporta komunidade nia material ka nesesidade ruma husi merkadu mai aldeia Sacoco, inklu apoiu organizasaun parseria sira nia atividade ne’ebé hala’o iha Munisipiu Ermeta  ho kustu minimu kompara ho transporte publiku sira.

Nia haktuir, jeralmente membru no komunidade sira sente hetan benefisiu husi atividade ne’ebé KOHAR hala’o, tanba ajuda tebes sira nia rendimentu ekonomia nomós bele motiva membru sira serbisu koletivu iha grupu, bele fasilita informasaun ba membru no komunidade sira ho lalais ba asuntu merkadu nian, promove merkadu justu, fó empresta ba membru sira hodi utiliza ba interese sosial hanesan suporta oan sira ba eskola, inklui hala’o sensibilizasaun ba membru no komunidade sira atu kuidadu ambiente  no atividade sosial seluk tan.

Hare husi susesu ne’ebé atinje no pratika konkreta ne’ebé iha, Kooperativa Hamri’ik ho Ain Rasik – (KOHAR) bele sai hanesan modelu ekonomia solidaria ka ekonomia slulu ne’ebé baze iha povu. Povu mak nain ba sosiu no kapital liu husi auto-jestaun, jestaun demokratika no solidaariedade. Maske nune’e, presiza enfaze iha asuntu estratejiku sira hanesan edukasaun, formasaun no konsientizaun krusial teb-tebes hodi garante partisipasaun popular, sentidu de perténsia, kapasidade jestaun no asegura sustentabilidade. 

Referénsia

  • Carlos Askunze, REAS Rede Espana Ekonomia Solidariedade
  • Yazalde Manaka Savio, Vizaun Ekonómia PEDN no Teoria Akumulasaun Primitiva Karl Marx
  • Challys Costa Ma’apokyl, Kapital Sosial no Ekonomia Solidariu iha Timor-Leste
  • Sugiarto Arif Santoso (Direktur Eksekutif IKA), Ekonomi Solidaritas Dalam Meningkatkan Keberlangsungan Organisasi Masyarakat Sipil
  • Pereira Daniel; Participatory Survey 2006 page.2).
  • Daniel Pereira, Komunitas Sakoko Di Mata Kdadalak Sulimutuk Institute.
  • Leonardo Soares no Bento Salsinha, Ekonomia Slulu–Ekonomia Solidária: Estudu Kazu Kooperativa KOHAR Sacoco.

 

 

Related Articles