Notisia

To’os Na’in Bobonaro Konsidera Governu La Seriu Investe iha Setor Agrikultura

To’os Na’in Bobonaro Konsidera Governu La Seriu Investe iha Setor Agrikultura

KDADALAK: Kuaze kada tinan Orsamentu Jeral Estadu (OJE) ne’ebé aloka ba setor agrikultura nafatin laiha mudansa, tanba to’o agora governu la hatudu seriedade hodi investe ba setor agrikultura.

Realidade hirak ne’e ita bele nota liu husi proposta Orsamentu Jeral Estadu ne’ebé governu aloka ba Ministériu Agrikultura Pekuaria Peskas no Floresta (MAPPF), tanba orsamentu ne’ebé governu preve ba Ministeriu refere iha kada tinan ki’ik tebes kompara ho orsamentu husi Ministeriu sira seluk. Ezemplu ida mak iha proposta OJE 2024 governu preve de’it 2.1%. 

Hatan ba kestaun ne’e, Prezidente Uniaun Agrikultor Munisipiu Bobonaro (UAMB), Raimerio Jacinto iha ninia intervensaun hateten, hare ba situasaun ne’ebé agora dadaun Timor-Leste infrenta, governu tenke hanoin ona oinsá atu investe ba setor agrikultura hodi nune’e bele hasa’e produsaun iha rai laran.

“Ami hanoin governu tenke tau prioridade ba setor produtivu sira, liu-liu setor agrikultura, tanba setor ida ne’e nu’udar pilar importante  atu ajuda hodi hadia povu nia moris no dezenvolve ekonomia rai laran,” informa Raimero ba mediak Kdadalak hafoin partisipa inkontru konsolidasaun baze ho estrutura UAMB iha Suku Ritabou, Postu Administrativu Maliana, Munisipiu Bobonaro, foin lalais. 

Nia haktuir, tinan barak nia laran setor agrikultura iha Timor-Leste la hatudu mudansa ne’ebé signifikativu, rai produtivu barak mak sei abandona, infraestrutura baziku sira hanesan irigasaun iha fatin barak seidauk funsiona ho di’ak no produsaun rai laran hahú menus ba bebeik, tanba governu rasik ladun tau atensaun ba setor ida ne’e.

“Loron ruma Timor-Leste sei hasoru krize aihan, se bainhira governu la seriu investe ba setór agrikultura. Tanba, situasaun balun hatudu dadaun ona iha fulan hirak nia laran ligadu ho folin fos ne’ebé sa’e iha merkadu halo povu barak mak halerik, tanba ita sei depedénsia maka'as ba importasaun husi rai li'ur,” nia kestiona.

Entertantu, to’os na’in husi Suku Batugade, Postu Administrativu Balibo, Munisipiu Bobonaro, Vicente do Rosario hateten, bainhira governu hakarak dezenvolve setór agrikultura, governu tenke tau orsamentu ne’ebá nato’on hodi resolve problema ne’ebé agrikultór sira infrenta, liu-liu oinsá bele apoiu trator ba grupu agrikultór sira, hadia irigasaun sira ne’ebé at, inklui fasilita formasaun ba membru grupu agrikultór sira iha area rurais, nune’e sira bele iha koñesimentu nato’on hodi bele hasa’e produsaun iha rai laran.

“Hakarak atu dehan katak povu Batugadu ne’e maioria mak moris husi vida agrikultura, maibé numeru ki’ik liu mak halo servisu iha to’os no natar, tanba kondisaun ekonomia ne’ebé obriga no heli besik liu fronteira, entaun ema barak prefere halo atividade negosiu (bisnis),” dehan Vicente.

Situasaun ne’e halo rai produtivu barak mak abandona no irigasaun ne’ebé iha bee sulin estraga de’it. Tan ne’e, husu ba governu central atu koordena ho autoridade munsipiu sira oinsá bele orienta komunidade sira hodi kaer servisu iha natar hodi nune’e bele dezenvolve setor agrikultura.

Uluk tempu Indonesia kada tinan komunidade sira iha Suku Batugade barak mak hala’o servisu iha natar, maibé agora natar barak mak abandona, liu-liu iha Aldeia Nu’u Badak ho Batugade, pior liu tan balun fa’an ona sira nia natar fatin.

Antes ne’e, publikasaun iha media nasaun balun, organizasaun sosiedade sivil sira ne’ebé hamahan an iha koligasaun Agrikultura kestiona makas ho politika governu ne’ebé ladun tau prioridade ba setor produtivu sira.

"Governante sira dala barak ko’alia kona ba sétor agrikultura, edukasaun, saúde, beemos no setor baziku sira ne'ebe bele ajuda hadia povu nia moris, maibé iha Osamentu Jéral estadu governu la hatudu politika ne’ebé seriu hodi investe iha setor importante sira ne'e," informa Peskizadór La'o Hamutuk ba Asuntu Agrikultura no Ekonómia, Mariano Ferreira banihira hala’o konferensia imprensa iha Fudansaun Haburas, Farol, foin lalais.

Related Articles