Notisia

Formasaun Tekniku Agroekolojia ba Membru Grupu Romansa+ Iha Beilaco

Formasaun Tekniku Agroekolojia ba Membru Grupu Romansa+ Iha Beilaco

KDADALAK: Atu hasa’e koñesimentu membru grupu Romansa+ kona ba produs adubu organiku been no maran, Kdadalak Sulimutuk Institute (KSI) fasilita formasaun tekniku agroekolojia ba membru grupu Romansa+ iha Suku Beilaco, Postu Administrativu Zumalai, Munisipiu Covalima.

Formasaun ne’e hala’o durante loron rua (2) hahú husi 29-30 Novembru 2023, ne’ebé partisipa husi ema na’in rua nulu resin lima (25), feto sanulu resin sia (19) no mane sanulu neen (6). Partisipante hirak ne’e mai husi grupu Romansa+ Buka Moris ho Moris Hakmatek.

Objetivu husi atividade ne’e, atu hasa’ koñesimentu membru grupu sira kona ba tekniku agroekolojia, nune’e bele hasa’e variedade produsaun, halakon dependensia membru sira ba utilizasaun adubu kimiku no hasa’e rendimentu ekonomia familia.

Fasilitador Bento Salsinha iha ninia intervensaun hateten, teknika agroekologia hanesan metodu ida ne’ebé KSI obta hodi introdus ba komunidade agrikultor oinsá bele promove rekursu lokal hodi hasa’e produsaun iha rai laran.

Durante formasaun KSI fasilita tekniku baziku sira kona ba oinsá atu produs adubu organiku, pestisida organiku, halo konservasaun ba bee no rai liu husi utiliza rekursu no matenek lokal ne’ebé iha.

“Membru grupu Romansa+ maioria moris husi vida agrikultór, ne’e duni formasaun tekniku agroekolojia importante tebes ba sira, tanba liu husi formasaun ida ne’e bele kapasita hodi hasa’e membru sira nia koñesimentu fluente kona ba prepara fatin ba produsaun,” informa Bento Salsinha ba media KDADALAK foin lalais.

Metodu ne’ebé uza iha formasaun ne’e maka hanesan, hala’o aprezentasaun material tekniku agroekolojia nian, pratika produsaun adubus organiku no pestesida organiku

Entertantu Field Officer Munisipiu Covalima, Domiciana Cardozo hateten, rejultadu ne’ebé atinje husi formasaun ne’e mak hanesan, membru grupu Romansa+ ne’ebé kompostu husi grupu Buka Moris ho Moris Hakmatek iha ona koñesimentu naton kona ba oinsá atu produs rasik adubu organiku been no maran, inklui produs rasik pastesida organiku.

Rejultadu seluk, bele ajuda membru grupu sira atu halo poupansa ba osan hodi labele dependente ba adubu kimiku. Aliende ne’e, tulun membru sira hodi rekopera fila fali rai hirak ne’ebé durante ne’e hetan estagus husi adubu kimiku.

“Isu ne’ebé deskute durante formasaun maka hanesan, oinsá membru sira bele hahú produs rasik adubu organiku maran no been, inklui diskute mós kona ba vantajen husi utilizasaun adubu organiku no desvantajen husi utilizasaun adubu kimiku,” informa Domiciana.

Material prima sira ne’ebé uza hodi produs adubus organiku maran maka hanesan, ai gamal tahan, hudi kain,karau ten, ahuk desan, ai kafe tahan, hare kulit, du’ut maran, ai ut. Kona ba adubu been maka hanesan, hudi tasak, aidila tasak, aimanas, liis mutin, fore naruk, ai hanek tahan, lantoro tahan, husi nia laran, nu’u been, foos been no karau ten bokon. (**)

Related Articles