Notisia

Komunidade Matata Apresia ho  Programa Kriasaun Sentru Viveirus

Komunidade Matata Apresia ho Programa Kriasaun Sentru Viveirus

Responde ba problema mudansa klimatika no risku dezastre ne’ebé kontinua akontese hodi fó ameasa ba Timor-Leste nia ekolojia, dadaun ne’e organizasaun Kdadalak Sulimutuk Institute (KSI) servisu hamutuk ho parseiru Oxfam iha Timor-Leste liu husi programa AHP hodi estabelese sentru viveirus iha Suku Matata, Pastu Administrativu Railako, Munisipiu Ermera.

Programa ne’e nu’udar rekursu ida hodi responde risku dezastre no oinsá atu kuidadu ekolojia. Aliende ne’e, sai hanesan sentru koletivu ba reforsa tradisaun serbisu no aprende hamutuk iha nivel komunidade nomós nu’udar rekursu hodi haforsa ekonomia familia.

Atividade espesifiku ne’ebé hala’o durante loron tolu (3) nia laran, hahú husi 10-13 Outobru 2023 mak hanesan, konstrui sentru viveirus, preprara rai metan, raihenek, kahur rai metan, rai no raihenek hodi ense ba polybags, kria ‘bedengan’ iha sentru laran hodi forma polybags.

Partisipante ne’ebé envolve iha atividade ne’e hamutuk ema na’in 16, ne’ebé kompostu husi feto na’in 4 no mane na’in 12. Iha loron ne’e, partisipante hamutuk ho ekipa KSI hala’o identifikasaun ba fini ai horis ne’ebé presiza, prosesu instalasaun bee ba sentru viveirus no diskute kona ba mekanismu kontrollu iha sentru viveirus.

Rejultadu ne’ebé atinje husi atividade ne’e mak hanesan, suku Matata iha ona sentru viveirus rasik ne’ebé bele produs ai horis ba konversaun no mitigasun programa redusaun risku dezastre nian, iha ona sentru koletivu ba reforsa tradisaun serbisu no aprende hamutuk nu’udar mós rekursu hodi haforsa ekonomia familia iha nivel komunidade.

Tekniku Agrikultura KSI, Bento Salsinha informa, sentru vivieirus ne’ebé KSI estabelese iha Suku Matata ho medida, naruk 11 metru no luan 5,80 metru. Fini aioan ne’ebé kuda sentru viveirus Matata iha tipu rua maka hanesan, fini ai-oan ne’ebé iha valor ekonomia no fini ai-oan ne’ebé bele proteje rai no bee matan sira.

Material ne’ebé KSI apoiu ba ba komunidade Matata hodi konstrui sentru viveirus maka hanesan, Polypipe rol 1, Paranet rol 1, pollyback 10 kg, mangera rol 1, profil 110 liter unidade 1, redi pinera raihenek metru 2, secop unidade 2, kawat las box 1, mata gurinda 4 pcs, pregu 7cm 2 kg, prafuzu dos 1, besi kotak 3x3 lolon 5, besi kotak 4x4 lolon 6, besi kotak 4x6A lolon 5, raihenek ret 1, fee ba las no bomba bee unidade 1.

Entertantu Xefi Suku Matata, José da C. Trindade agradese tebes ba organizasaun KSI ne’ebé estabelese sentru viveirus komunitaria iha nivel suku, nune’e bele prepara aihoris ba programa reflorestasaun.

Nia mós rekomenda ba KSI atu kontinua hala’o akompainamentu ba atividade iha sentru viveirus no kontrollu nafatin ai horis sira.

Related Articles