KSI Kontra Polítika WTO

KSI Kontra Polítika WTO

KDADALAK: Nu’udar organizasaun movimentu ne’ebé servisu besik liu ho komunidade sira iha area rural, Kdadalak Sulimutuk Institute (KSI) observa katak dezenvolvimentu setór produtivu sira, liu-liu iha setór agrikultura, kooperativa no indústria sei frazil tebes, tan ne’e Timor-Leste presiza tetu halo didi’ak bainhira deside sai membru ba Organizasaun Mundial komérsiu (OMK) ka Word Trade Organization (WTO), nune’e iha futuru labele hamosu problema ba povu no nasaun ne’e. 

Estadu Timor-Leste tuir loloos buka alternativa seluk hodi dezenvolve rasik ninia ekonomia tuir situasaun no kontestu Timor nian, duke hanoin maka tama ba WTO ne’ebé laiha benefísiu ba povu no esperiénsia moruk nasaun seluk hatudu katak agrikultór barak maka sai vítima ba polítika WTO nian, ida ne’e tuir loloos sai hanesan referénsia ba Timor-Leste. Tanba ne’e, dezde uluk kedas KSI kontra politiks WTO no la aseita Timor-Leste adere ba organizasaun refere.

Realidade hatudu polítika WTO nian maka promove no haburas sistema ekonomia kapitalizmu nian, sistema kapitalizmu global ne’ebé ohin loron maka sai abut ba injustisa sosiál entre klase sosiál riku no kiak iha mundu, hamosu funu no hamosu krize global ba ekolojia no ambiente ne’ebé maka fo impaktu boot liu ba iha nasaun no povu kiak sira. 

Objetivu WTO ne’e atu kontrola no estabelese akordu hodi hamosu regulamentu komérsiu ba nasun hirak ne’ebé sai nu’udar membru. Aleinde ne’e, sira mós mai ho polítika ida oinsá atu diversifika tan sira nia riku soin hodi bele hetan lukru ba sira nia an no sira la preokupa ho nasaun ki’ik sira seluk, tanba sira mai ho polítika ida oinsá bele domina ita nia merkadu, setór potensiál sira no super industrial husi rai ida ba rai seluk.

Relasiona ho proposta deliberasaun mandatu negosiasaun adesaun Timor-Leste ba organizasaun Mundial komérsiu ne’ebé aprezenta husi Ministériu Koordenadór Asuntu Ekonómiku (MKAE), Joaquim Amaral no hetan ona aprovasaun husi Konsellu Ministru (KM) iha fulan Novembru tinan kotuk hamosu preokupasaun bo’ot ba sosiedade sivíl sira, inklui Kdadalak Sulimutuk Institute (KSI), tanba konsidera polítika ne’e sei investe problema ba nasaun no jerasaun tuir mai.

Diretór KSI Jenito Santana hateten, ekonomikamente Timor-Leste sei la hetan benefísiu husi polítika WTO no ita sei sai nafatin vítima tanba produtu husi rai seluk sei mai domina produtu rai laran.

Kuandu Timor-Leste sai ona membru WTO konserteza ita sei kompete ho nasaun membru hirak seluk iha setór hotu-hotu, ezemplu Timor-Leste presiza harii infrastrutura boot hodi ema mai halo investimentu, maibé ita laiha osan entaun ita ba deve hodi harii investimentu hirak hanesan estrada, ponte, uma, aeroportu no buat seluk, depois ita hetan osan husi investimentu hirak ne’e maka ita selu fali ema nian osan, maibé ida ne’e ita bele ka la’e.? 

Orsamentu Jerál Estadu de’it mós ezekuta la hotu, sasán deve hela de’it no dezenvolvimentu iha rai laran hakdasak, ne’e duni presiza kuidadu. Tuir loloos governu fokus no hanoin oinsá atu dezenvolve ita nia setór potensiál sira, nune’e hadi’a uluk ekonomia iha rai laran.

Santan haktuir, karik Timor-Leste sai duni membru WTO, ita prepara atu hasoru risku ka ninia impaktu iha futuru, tanba kompetisaun ekonomia ita labele no ita sei la hetan buat ruma husi ne’e, entaun ema husi nasaun seluk hanesan, Xina, Pakistan, Bangladés no Indonézia maka mai hodi domina ekonomia rai laran hodi fó servisu ba Timor oan fulan ida simu de’it salariu $ 80 ka USD100, piór liu tan laiha kontratu servisu. 

Nu’udar nasaun foun ne’ebé ho maioria populasaun moris husi vida agrikultór Timor-Leste tenke kuidadu ho situasaun hirak ne’e, tanba realidade hatudu Timor-Leste seidauk sai membru WTO mós agora daudauk ita nia ekonomia ema hahú domina ona, sasán ka produtu husi rai li’ur hahú dudu sees produtu rai laran no kuaze fatin estratéjiku hirak iha kapitál Dili to’o Munisipiu ema Xineza maka uza hodi loke loja ka super merkadu.

Husi indikasaun hirak ne’e nota katak, Timor-Leste seidauk preparadu atu tama ba membru WTO, intermus rekursu humanus no produtu ne’ebé maka ita iha, tanba faktu hatudu iha implementasaun programa sesta bázika produtu iha rai laran la sufisiente (la to’o) atu distribui ba komunidade sira, ne’e duni tenke sosa mós ai-han importasaun ne’ebé mai husi rai li’ur, ezemplu ida maka fós.       

Dala ruma ema balun hanoin katak ita nia produtu ne’ebé atu lori ba kompete iha merkadu internasional ida maka kafé, maibé atu dehan katak ita seidauk tama membru organizasaun mundiál komérsiu ka WTO mós agora daudauk ita esporta hela kafé ba rai li’ur no ida ne’e akontese ona dezde Timor-Leste seidauk ukun rasik an no nasaun barak maka agora sosa hela ita nia kafé. 

Polítika husi organizasaun mundiál komérsiu ka WTO deskreve mós regulamentu balun, liu-liu agrimentu kona ba setór agrikultura nian ne’ebé hateten, organizasaun ne’e prontu apoiu bainhira ita nia produsaun iha rai laran hakarak hetan inisiativa, maibé produsaun hirak ne’e orsida sira maka tenke sosa. Seluk fali, subsídiu ne’ebé iha sei la fó vantajen ba produsaun iha rai laran, tanba ho persentajen ne’ebé la hanesan, ezemplu iha rai laran subsídiu 30% maibé iha rai li’ur redús ba 24%, entaun ita labele asesu livre ba produsaun ne’ebé iha.  

Klaru katak ninia impaktu direitamente sei akontese privatizasaun no setór agrikultura sei dependente ba kompañia ne’ebé prodús fini, pestisida kímiku, adubu kímiku no buat seluk tan ne’ebé bele fó ameasa ba produsaun agrikultura iha rai laran. (**)


Print  

Related Articles