Membru Kooperativa Haburas Kaisave Hahú Kuda Buah Naga

Membru Kooperativa Haburas Kaisave Hahú Kuda Buah Naga

KDADALAK: Atividade kuda buah naga ne’ebé hala’o husi membru Kooperativa Haburas Kaisave (KHK) nu’udar atividade integradu ida husi programa transformasaun komunitária ne’ebé Kdadalak Sulimutuk Institute (KSI) implementa iha Suku Maubaralisa. 

Objetivu husi programa ne’e, atu dezenvolve ekonomia povu iha nivel komunidade liu husi aprende hamutuk, harii ideas no prátika kooperativa ho modelu investimentu sosiál ida ba benefísiu mutual, tanba antes ne’e KSI rasik organiza ona agrikultór sira hodi servisu hamutuk iha grupu liu husi estabelese sentru ortikultura.

Durante ne’e atividade ne’ebé KSI hamutuk ho membru grupu sira hala’o iha sentru ortikultura maka hanesan, orienta toos nain sira hodi hala’o atividade kuda modo, estabelese kooperativa hodi orienta membru grupu sira atu rai osan no hala’o atividade kuda buah naga. 

Atividade kuda buah naga inísia husi membru grupu sira no hetan apoiu fini ho material husi KSI. Material hirak ne’e maka hanesan, polipipe rollu ida, arame ne’ebé uza hodi hale’u lutu hamutuk rolu 45 nomós apoiu fini buah naga hun 270. 

Rai ne’ebé utiliza ba kuda buah naga ho medida kuaze hetares 1, aléinde ida ne’e membru sira mós komesa hamoos ona fatin refere no harii ona ai forma tuir liña hodi prepara atu kuda buah naga.

Ema hirak ne’ebé hala’o servisu iha momentu ne’e hamutuk ema na’in 12, na’in 8 nu’udar membru kooperativa, na’in 3 estajiáriu husi Universidade Nasional Timor Lorosa’e (UNTL) no na’in 1 nu’udar staff kampu KSI. Atividade ne’e hala’o durante loron rua nia laran, hahú husi loron, 15-16 Fevereiru 2021.

Atividade ba loron dahuluk nian, ekipa ida ba lalin ai ne’ebé atu uza ba rin buah naga nian no ekipa ida ke’e rai kuak. Nune’e, iha loron daruak membru sira ne’e kontinua ke’e rai kuak no total ai rin ne’ebé harii ona hamutuk 133, ne’ebé tuir planu kada ai rin sei kuda fini buah naga hun rua. 

Jacinto dos Santos iha ninia entrevista ba media KDADALAK hateten, diskusaun iha prosesu inísiu atu uza rai hetares 2, maibé hare ba kapasidade ne’ebé natoon entaun deside uza de’it hetares 1 no iha futuru maka ita hare rezultadu di’ak, membru sira bele hanoin hamutuk oinsá aumenta ba hetares 2. 

Durante ne’e ami hetan apoiu material husi KSI, hahú husi prosesu harii sentru ortikultura to’o agora ami kuda buah naga. Buat barak maka sira apoiu ona, liu-liu material ne’ebé uza hodi halo servisu, inklui fini no fura bee iha sentru. 

Aleinde hala’o atividade kuda buah naga membru sira mós kontinua kuda modo iha sentru, maski produsaun dala ruma la fó rezultadu di’ak, tanba impaktu husi bee ne’ebé meer. Mezmu enfrenta hela problema oin-oin maibé membru grupu sira nunka lakon esperansa no kontinua kometimentu hodi kuda modo nune’e bele hadi’a ekonomia família.

Jacinto klarifika, karik buah naga ne’e fó rezultadu ne’ebé di’ak, membru kooperativa sira iha hanoin atu haluan tan fatin ne’e hodi kuda buah naga, nune’e to’o tempu kolleta membru sira bele lori ba faan iha merkadu.

Dezafiu ne’ebé agora daudauk sira hasoru maka problema bee ne’ebé meer, entaun bainhira uza hodi rega modo no ai-oan sira labele buras ate balun mate, tanba rai sai masin hotu. Situasaun ne’e prejudika tebes membru sira nia rendimentu, tanba modo no ai-han seluk ne’ebé kuda iha sentru labele fó rezultadu di’ak.

Dezafiu seluk membru sira la rona, ne’e duni iha inísiu harii grupu ne’e hamutuk ema nain tolu nulu (30), maibé agora tun ba nain sanulu resin rua (12), feto walu (8) no mane nain haat (4) maka sei ativu to’o ohin loron.(**)


Print  

Related Articles