KDADALAK: Durante loron rua (2), hahú husi 17-18 Fevereiru 2023, organizasaun Kdadalak Sulimutuk Institute (KSI) hala’o enkonru ho estrutura Suku Maubaralisa, Postu Administrativu Maubara, Munisipiu Liquiça hodi realiza Planu Asaun Komunidade (PAK) no estabelese estrutura SDMC.
Objetivu husi atividade ne’e, atu hala’o planu asaun suku nian hodi hatan ba risku dezastre, nune’e mós evalua no buka hatene efetividade servisu DDMC no SDMC nian, karik estrutura ne’e mak ladun ativu entaun presiza reativa fila-fali.
Aliende ne’e, fahe informasaun ba komunidade sira kona ba risku dezastre nomós oinsá atu hakbit komunidade sira nia koñesimentu hodi bele halo jestaun ba perigu dezastre ne’ebé sira enfranta iha sira nia fatin.
Iha enkontru ba loron dahuluk nian, partisipante hamutuk ho ekipa servisu KSI halo Planu Asaun Komunidade hodi identifika problema ne’ebé akontese iha suku Maubaralisa, buka identifika rekursu suku no identifika atividade sira ne’ebé prioridade atu hala’o iha tempu badak.
Tipu atividade ne’ebé identifika ona iha Planu Asaun Komunidade maka hanesan, dezenvolve proposta, hari sentru viveirus iha Aldeia Vatugili ho medida 6x12m, ne’ebé sei involve ema na’in 20 (membru konsellu).
Aleinde ne’e, fasilita formasaun kona ba produs adubu organiku no pestesida organiku ne’ebé sei involve ema na’in 20, nune’e mós implementa Tara Bandu iha Suku Maubaralisa ho total benefisariu 665 uma kain.
Hafoin realiza Planu Asaun Komunidade (PAK), iha loron daruak, ekipa servisu KSI hamutuk ho partisipante sira kontinua estabelese estrutura SDMC Suku Maubaralisa, ne’ebé kompostu husi Prezidente, Xefi Suku (Anacleto da Costa, Vise Prezidente, Xefi Juventude Feto (Angelina da Silva), Konsellu, (Lia Nain, Veteranus, Katekista no OPS), Sekertaris no Finansas, PAAS (Carlos de Jesus), Offisial Informasaun, Xefi Aldeia Vatugili (Augusto da Silva), Offisial ligasaun, Delegada Lisa Lara (Estefania X. Lobato), Offisial Seguru (José Maia), Seksaun Kolesaun de Dadus, Delegadu Vatugili (Francisco Lopes), Seksaun Seguransa Alimentar, Xefi Aldeia Nunulete (Agustu de Jesus), Seksaun Suade, Delagada Vatugili (Agrefina Sanches), Rehabilitasaun no Rekoperasaun, Delegadu Lisa Lara (Valtazar Hornai), Preparasaun Prevensaun no Mitigasaun, Delegadu Darulema (Felis da Conceiçao), Salvamentu no Evaluasaun, Delegada Darulema (Efijenia Martins).
Nu’udar fasilitador, Pedro Brito Fernandes iha ninia intervensaun hateten, durante servisu ho komunidade sira iha area rural, KSI identifika mós problema balun ne’ebé afeitas tebes ba komunidade nia moris, liu-liu mudansa iklimatika ne’ebé sai ameasa bo’ot ba vida komunidade vulneravel iha tempu agora no futuru oin mai. Ne’e duni, liu husi atividade ida ne’e bele haforsa knar estrutura SDMC hodi halo jestaun ba risku dezastre ne’ebé komunidade sira enfrenta.
Pedro haktuir, esforsu lubuk ida mak KSI hala’o ona hodi kontribui ba redus risku dezastre, liu husi implementa atividade Tara Bandu, forma ekipa konsellu dezastre suku iha area ne’ebé KSI hala’o intervensaun. Aliende ne’e, fasilita treinamentu ba redusaun risku dezastre liu husi uza meus jestaun rekursu naturais, nune’e bele aprosima ba konsevasaun natureza hodi nune’e bele hamenus impaktu dezastre.
Rejultadu ne’ebé sei atinje husi atividade ida ne’e mak hanesan, iha ona planu asaun komunidade ba redusaun risku dezastre iha suku Maubaralisa no estrutura servisu DDMC no SDMC iha suku ativu fali ona.
Total pertisipante ne’ebé prezensa iha atividade ne’e hamutuk ema na’in 25, ne’ebé kompostu husi feto 7 no mane 12. Atividade ne’e realiza tamba hetan apoiu fundus husi organizasaun parseiro Oxfam-Timor Leste. (**)
