KSI-OXFAM Kontinua Instala Tanke Fase Liman ba Eskola no Merkadu

KSI-OXFAM Kontinua Instala Tanke Fase Liman ba Eskola no Merkadu

KDADALAK: Fase liman ho sabaun nu’udar meius prevensaun ida ba surtu Covid-19. Ne’e duni, liu husi programa Australia Humanitarian Project (AHP Recovered), Kdadalak Sulimutuk Institute (KSI) servisu hamutuk ho organizasaun konsorsiu sira maka hanesan, OXFAM, CARE Internasional, Plan Internasional, Word Vision no AUSAID kontinua distribui no instala tanke fase liman (prefill) ba iha merkadu no eskola iha Munisipiu Liquiça no Ermera.      

Iha Munisipiu Ermera agora daudauk KSI instala ona tanke fase liman iha mini merkadu Kamaelpun, suku Lihu no sentru rai produtu lokál suku Matata. Aléinde ne’e, instala mós tanke fase liman nian iha eskola EBF Nu. 203 Fitun Naroman Sakoko, Suku Ponilala, eskola EBF Nu. 187 Lequeci, Suku Poetete nomós eskola EBF Nu. 196 Leguimea, Suku Leguimea.

Iha Munisipiu Liquiça daudauk ne’e instala ona tanke fase liman nian iha mini merkadu Lauhata no merkadu tradisionál Suku Maubaralisa.

Relasiona ho program ida ne’e, Xefe Aldeia Kamaelpun, Suku Lihu, Postu Administrativu Railako, Munisipiu Ermera, Paul Oliveira de Jesus agradese ba Kdadalak Sulimutuk Institute (KSI), Oxfam ho organizasaun konsorsiu sira ne’ebé fó apoiu hodi instala tanke fase liman nian (prefill) iha mini merkadu Kamaelpun.

“Ha’u sei organiza komunidade, liu-liu sira ne’ebé fa’an produtu lokál iha fatin ne’e, oinsá bele arranja mangeira hodi dada bee tama tanke laran, nune’e loron-loron ema mai sosa produtu ruma tenke fase liman,” deklara Xefe Aldeia Kamaelpun, Paul Oliveira de Jesus, foin lalais.

Nia relata, antes ne’e husi parte governu apoiu ona tanke fase liman nian iha merkadu Munisipál Railako, maibé ba mini merkadu sira ne’e foin maka KSI ho Oxfam maka apoiu.

“Apoiu ne’ebé ami hetan maka hanesan, tanke fase liman (prefill) unit ida no sabaun dos rua. Ami promote sei kuidadu no asegura tanke ida ne’e ho di’ak, nune’e komunidade sira bele utiliza ba tempu naruk,” tenik nia.

Durante moras Covid-19 mosu, eskola Ensinu Báziku Filial (EBF) Nu. 203 Fitun Naroman Sakoko enxe bee iha masa-jeriken litru lima hodi tau iha sala oin hodi estudante sira uza fase liman. Iha organizasaun parseria balun apoiu balde, maibé hare ba númeru estudante ne’ebé barak, entaun ladún sufisiente, ne’e duni agradese ba organizasaun KSI ho OXFAM ne’ebé apoiu ona tanke fase liman nian.  

Dezde tinan 2000 eskola EBF Nu. 203 Fitun Naroman Sakoko ladún hetan ajuda ba buat sira hanesan ne’e, maibé foin primeiraves iha situasaun Covid-19 maka organizasaun parseria sira mai ajuda.

“Hanesan professor ami agradese ba ekipa servisu KSI no OXFAM, maski ho kondisaun kondisaun estrada ne’ebé at mais ho esforsu tomak konsege lori duni sasán to’o iha eskola ida ne’e,”

Buat ne’ebé to’o ona iha eskola, parte eskola sei koordena ho komunidade sira ne’ebé hela besik iha area eskola atu tau matan mós ba tanke fase liman, liu-liu iha tempu oras eskola nian remata, tanba sasán hirak ne’e mós komunidade sira nia oan maka uza.

Nia haktuir, kona ba bee iha tempu udan laiha problema, tanba husi parte eskola bele halo kadoras hodi uza udan been no bele kuru husi torneira hodi enxe. Maibé, iha tempu bailoron bee laiha, parte eskola sei husu ba estudante ida-idak bele kuru bee husi uma tau iha aqua depois lori mai enxe iha tanke hodi sira bele uza.

Obrigadu ba organizasaun Kdadalak Sulimutuk Institute (KSI) no OXFAM ne’ebé apoiu ona tanke fase liman no sabaun dos rua (2) ba eskola Ensinu Báziku Filial (EBF) Nu. 197 Liqueci, Suku Poetete, tanba ho ajuda ida ne’e bele fasilita estudante sira fase liman loron-loron.

“Ami sente kontente no agradese ho ajuda hirak ne’ebé oferese ba eskola ida ne’e, ami la hare ba valor sasán ne’e bo’ot ka ki’ik, maibé husi parte eskola sente kontente no simu ho liman rua, tanba iha situasaun udan, estrada at mais ekipa ida ne’e ho pasiénsia konsege mai to’o iha fatin ne’e hodi instala tanke fase liman nian,” informa koordenadór eskola EBF Nu 197 Lequeci, Mariano Babo.

Bainhira sasán ema haruka mai ona, hakarak ka lakohi parte eskola tenke kontrola no oinsá bele enxe bee, nune’e estudante sira bele uza fase liman loron-loron. Aleinde ne’e parte eskola mós iha sei asegura no kuidadu sira hirak ne’e labele hetan estragus.

Bainhira Timor-Leste hasoru moras Covid-19, antes ne’e CARE Internasional no governu mai ajuda ona sasán protesaun nian balun maka hanesan balde, hand spryer, máskara no hand sanitizer, maibé agora Covid-19 la’o hela ne’e duni husu ba organizasaun parseria sira no governu atu ajuda mós máskara ba estudante sira.

Koordenador eskola Ensinu Baziku Filial Nu. 196 Lequimea, Julio Ximenes hateten, iha inisiu Timor-Leste hasoru moras Covid-19, ajuda ne’ebé ami hetan husi Governu no CARE Internasional maka hanesan, balde, byclean, sabaun balun, handspryer no maskara, maibé ajuda hirak ne’e la sufisiente tanba númeru alunus barak.

Ezemplu, balde ne’ebé tau iha sala oin natoon de’it, máskara ba estudante sira laiha, inklui sabaun mós laiha ona, ne’e duni agradese tanba agora daudauk ami nia eskola EBF Nu. 196 Leguimea hetan tan apoiu husi organizasaun KSI ho OXFAM hodi instala tanke fase liman (prefill) ne’ebé kompletu ninia fatin no sabaun dos rua (2).

“Ami presiza duni tanke fase liman nian, nune’e bele fasilita estudante sira fase liman loron-loron. Atu kontrola sasán ne’e, husi parte eskola sei koordena ho membru APTL nain lima (5) ne’ebé hela besik area eskola atu kontrola tanke ne’e hodi labele hetan estragus,”

Buat seluk ne’ebé agora daudauk estudante sira presiza liu maka máskara tanba máskara ne’ebé uluk husi parte governu fahe agora at hotu ona. (**)


Print  

Related Articles