Notisia

KSI Fasilita Treinamentu CBDRM no PAK ba Komunidade Beilaku

KSI Fasilita Treinamentu CBDRM no PAK ba Komunidade Beilaku

KDADALAK: Ekipa servisu organizasaun Kdadalak Sulimtuk Institute (KSI) fasilita treinamentu Comunity Based Disaster Risk Manajement (CBDRM) no Planu Asaun Komunidade (PAK) ba komunidade Aldeia Beilaku, Suku Raimea, Postu Administrativu Zumalai, Munisipiu Covalima.

Objetivu husi treinamentu ne’e, fahe informasaun ba komunidade sira kona ba risku husi dezastre nomós oinsá atu hakbit komunidade sira hodi bele halo jestaun ba perigu dezastre ne’ebé maka sira enfrenta iha sira nia fatin.  

Treinamentu ne’e hala’o durante loron rua (2), hahú husi 17 Agostu to’o 18 Agostu 2021. Materia ne’ebé hato’o iha treinamentu ne’e maka hanesan, ko’alia kona ba definisaun husi dezastre, planeamentu operasional, importansia husi koordenasaun, oinsá hato’o relatoriu dezastre no ikus liu maka identifikasaun problema hodi hala’o planu asaun komunidade. Aliende ne’e estabelese mós estrutura SDMC nivel aldeia. 

Definasaun badak husi dezastre katak, estragus seriu ne’ebé impaktu husi fator natural, kauza husi hahalok ema nian hodi hamosu vitima, halakon materiais, estraga enviromentu ne’ebé nia impaktu bo’ot liu kbit komunidade nian atu hatan, hodi nune’e presija tulun husi liur.

Planu operasional katak, define asaun iha setór atividade oin-oin no deskritu ho detallu hodi hala’o operasaun responde ba emerjénsia bainhira akontese dezastre. Importansia husi koordenasaun signifika katak, identifika ema xave besik ho komunidade, nune’e bainhira mosu dezastre ruma bele informa lalais ba ema xave sira no relatoriu dezastre katak, informa atividade ne’ebé hala’o ona husi ema ida ka instituisaun, hatudu responsabilidade ba servisu ne’ebé hala’o ona, inklui hato’o informasaun ofisial liu husi hakerek.   

Fasilitadór Pedro Brito Fernandes iha ninia intervensaun hateten, nu’udar organizasaun ne’ebé servisu besik liu ho komunidade rural, Kdadalak Sulimutuk Institute (KSI) identifika mós problema balun ne’ebé durante ne’e afeta tebes ba komunidade nia moris, liu-liu ligadu ho mudansa klimatika ne’ebé sai ameasa bo’ot ba vida moris komunidade vulneravel iha tempu agora no futuru oin mai. Ne’e duni, liu husi formasaun sira hanesan ne’e bele hakbit komunidade sira hodi halo jestaun ba perigu dezastre ne’ebé maka sira enfrenta iha sira nia fatin. 

Nia haktuir, esforsu balun KSI hala’o ona, nune’e bele kontribui ba hamenus problema klimatika, liu husi aprosimasaun hirak ne’ebé maka durante ne’e KSI uza maka hanesan, aplika Tara Bandu, forma ekipa konsellu dezastre suku iha area ne’ebé KSI haknar an ba. Aliende ne’e, fasilita mós kapasitasaun ba redusaun risku dezastre liu husi uza meus jestaun rekursu natural, nune’e bele aprosima ba konservasaun natureja, uza koñesementu no rekursu ne’ebé iha hodi hamenus impaktu desastre ne’ebé bele afeta komunidade liu husi metodu CBDRM. 

“Dezastre ne’e iha ninia tipu oin-oin, ne’e duni importante tebes komunidade nia partisipasaun, tanba iha dezastre balun ne’ebé maka akontese neneik no nia tempu ne’e kleur, maibé iha dezastre balun ne’ebé akontese lalais  no iha volume estragus ne’ebé maka bo’ot liu, ne’e duni CBDRM ninia intensaun atu foka liu ba iha impoderamentu komunidade, nune’e komunidade rasik iha kbit para atu halo jestaun ba perigu dezastre ne’ebé sira enfrenta,” informa Pedro Brito Fenandes ba iha Beilaku, Suku Raimea. 

Iha fatin hanesan, Xefe grupu Hae-Oan, Luis Dos Santos hateten, nu’udar agrikultura tinan-tinan sira sempre hasoru dezastre, liu-liu ligadu ho atividade agrikola nian, tantu iha tempu udan no bailoron naruk. Iha tempu udan bainhira mota bo’ot tun konserteza sei estraga hotu sira nia hare, inklui aihoris hirak seluk ne’ebé kuda iha sira nia toos laran, nune’e mós iha tempu bailoron naruk akontese dezastre aihoris mate hotu no kuandu bee irigasaun maran sei hare sira iha natar. 

“Ko’alia kona ba dezastre iha oin barak, ezemplu, anin boot, udan boot halo bee sa’e, rai halai no dezastre seluk tan. Ba ami agrikultór dezastre ne’e sempre akontese, ne’e duni liu husi formasaun ida ne’e bele ajuda ona ami, oinsá atu jere no hato’o problema ne’ebé ami hasoru ba ema xave sira,” dehan Luis Dos Santos.

Entertantu Xefe Aldeia Beilaku, Luciano Magno hateten, formasaun kona ba jestaun risku dezastre importante tebes, nune’e bele aumenta komunidade sira nia koñesementu oinsá atu halo jestaun ba perigu dezastre ne’ebé sira rasik enfrenta.

“Bainira estabelese ona estrutura SDMC nivel aldeia nian, ida ne’e bele ajuda ona autoridade lokal sira hodi kompleta buat ne’ebé laiha, entaun ami bele koordena malu hodi lori problema ne’ebé komunidade sira enfrenta ba governu,” informa Xefe Aldeia Beilaku, Luciano Magno bainhira hala’o abertura ba formasaun ne’e.

Total partisipante ne’ebé hola parte iha formasaun ne’e hamutuk ema na’in 27 ne’ebé kompostu husi feto na’in 14 no mane 13. Tuir planu formasaun ne’e sei hala’o mós iha Aldeia Oebaba, Suku Raimea, Postu Administrativu Zumalai nomós Aldeia lima (5) iha Suku Oges, Postu Administrativu Maukatar, Munisipiu Covalima.

Related Articles

Kontaktu Ami

Avenida Fatumeta (Besik Eskola Primaria)
Fatumeta
Surikmas
Dili
Timor-Leste

Email: info@kdadalak.org.tl 
Telp:

Galeria

No Albums