Covalima-Iha ámbitu kongresu toos na’in ba loron daruak nian, toos na’in sira défini naran ba organizasaun maka Uniaun agrikultóres Covalima habadak UNARCO liu husi prosesu diskusaun ne’ebé naruk entre toos na’in kongresista sira.
Iha loron daruak kongresu toos na’in Covalima, hahú ho ajenda diskusaun ba estatutu organizasaun nian. Iha ámbitu diskusaun nian ne’ebé partisipativu tebes ho debates entre kongresista sira nebe mak maioria feto hodi fo ideas no sujestaun ba kada artigu sira iha draft estatutu no konsege halo aprovasaun final ba estatutu ho votu maioria husi númeru kongresista ne’ebé marka prezensa.
UNARCO nu’udar organizasaun mahon ba grupu toos nain ho baze 70 ne’ebé kompostu husi Postu Administrativu 7 iha munisipiu Covalima ho membru hamutuk ema 1078 (feto 537 no mane 506). Husi numeru membru ne’ebé iha reprezentante sira ne’ebé maka tuir kongresu hamutuk kuaze ema besik 300 resin.
Tuir agenda, kongresu ne’e hala’o durante loron 3, hahú husi 10 -13 Dezembru 2019. Tema jeral husi kongresu ne’e mak, “Reafirma Espiritu Hakawak Hodi Hametin Direitu Toos Nain Sira Ba Moris Dignu, Prosperu no Igualitariu.”
