Notisia

MPRAL Hala’o Diskusaun Baze ho Grupu Juventude Haburas Ekonomia Sustentavel

MPRAL Hala’o Diskusaun Baze ho Grupu Juventude Haburas Ekonomia Sustentavel

KDADALAK: Diskusaun baze nu’udar modelu aprosimasaun estratejiku hodi hasa’e espiritu partisipasaun ema hotu nian, ne’ebé konsidera hanesan transformasaun komunitaria, ne’e duni iha 6 Augustu 2021, direjente Movimentu Popular Reforma Agraria Liquiça (MPRAL) hamutuk ho ekipa advokasia husi Kdadalak Sulimutuk Institute (KSI) hala’o diskusaun ho grupu juventude Haburas Ekonomia Sustentavel (HES). 

Objetivu husi diskusaun baze ne’e, atu fahe informasaun ba komunidade sira kona ba prinsipiu Reforma Agraria, identifika potensialidade sosiu ekonomia komunidade nian, identifika dezafiu hotu ne’ebé durante ne’e membru MPRAL enfrenta nomós dezeña planu asaun membru sira nian.

Partisipa iha diskusaun ne’e, membru grupu Haburas Ekonomia Sustentavel husi Aldeia Vatugili, Suku Maubaralisa hamutuk ema na’in 27 no ekipa servisu Advokasia KSI na’in 3. 

Vise Prezidente MPRAL, Jacinto dos Santos informa, libertasaun rai no povu tenki total no kompletu, nune’e agrikultór sira tenke iha rai hodi halo produsaun.

Tinan barak ona MPRAL ejiste iha Munisipiu Liquiça hodi defende povu nia direitu ba rai liu husi Reforma Agraria. MPRAL nia ejistensia ne’e rasik inspira husi prinsipiu luta ukun rasik an nian katak, “Liberta rai no Liberta povu.”  

Eis Koordenador Komite Baze Maubaralisa, Francisco dos Santos iha  ninia intervensaun hateten, povu Timor-Leste luta ba ukun rasik an, tanba hakarak hetan rai mais tansá ema balun laiha asesu ba rai, ne’e duni MPRAL ejiste atu reforma rai sira ne’ebé uluk kolonialista sira foti husi beiala sira.

“Ita luta no manan tiha funu, maibé ita nafatin laiha rai hodi fó moris, nune’e MPRAL ejize reforma agraria,” deklara Francisco dos Santos. 

Relasiona ho ejistensia grupu juventude Haburas Ekonomia Sustentavel, Dendra Hermawan Gonçalves hateten, grupu ne’e hahú ejiste iha loron 3 Juñu 2021 hodi haforsa luta MPRAL nian ba defende direitu povu hodi asesu ba rai. 

Nia haktuir, dadaun ne’e grupu juventude Haburas Ekonomia Sustentavel utiliza rai ho medida kuaze hektare 1 resin atu halo atividade hortikultura, inklui hakiak manu lokal no ikan.

Membru grupu Juventude Haburas Ekonomia Sustentavel, iha membru hamutuk ema na’in 39 ne’ebé kompostu husi feto 2 no mane 37. 

Atividade ne’ebé grupu ne’e hala’o ona maka hanesan, rekolla kontribuisaun membru hodi hari sekretariadu provizoriu, hala’o installasaun eletridade, selu makina hodi tesi akadiru hodi halo lutu haleu rai ne’ebé atu uza, tula mos rai henek no hamos ona terenu hodi prepra ba halo produsaun.

“Dezafiu ne’ebé grupu ne’e hasoru maka hanesan, menus material hanesan arame hodi halo lutu no laiha be’e hodi apoiu atividade hirak ne’ebé planeia ona,” dehan Hermawan iha diskusaun nia laran. 

Hatan ba preokupasaun hirak ne’e, reprezentante komite fiskalizador ba MPRAL-KSI Flavio Martins hateten, nu’udar aliadu KSI la halo promesa hodi apoiu material ruma, maibé kaer metin ba prinsipiu luta nian KSI kontinua hamutuk ho MPRAL hodi haforsa luta ba politika reforma agraria ne’ebé kontein mós atividade oi-oin, bazeia ba prinsipiu reforma agraria iha kontekstu Timor nian. 

Nune’e mós, David Nunes hateten, KSI nia lema maka belun kamponezes ba transformasaun, nune’e oinsá buka dalan atu haforsa kamponezes hotu iha area remota atu bele firme iha luta no independente.

“Importante aliadu sira tenke junta forsa hamutuk, fiar malu no hahú ona ho inisiativa balun oinsá atu organiza malu hodi halo produsaun,” tenik David Nunes.

Grupu juventude Haburas Ekonomia Sustentavel rekomenda ba KSI atu hametin liu luta ida ne’e, liu husi halo akompañamentu ba membru MPRAL sira, inklui grupu Haburas Ekonomia Sustentavel hodi facilita formasaun hodi hasa’e membru sira nia koñesimentu. 

Related Articles

Kontaktu Ami

Avenida Fatumeta (Besik Eskola Primaria)
Fatumeta
Surikmas
Dili
Timor-Leste

Email: info@kdadalak.org.tl 
Telp:

Galeria

No Albums