Notisia

 Kontinua Distribui Ekipamentu Protesaun Individual, Xefe Suku Vatuvou Agradese ba KSI no OXFAM

Kontinua Distribui Ekipamentu Protesaun Individual, Xefe Suku Vatuvou Agradese ba KSI no OXFAM

KDADALAK: Xefe Suku Vatovou, Postu Administrativu Maubara, Munisipiu Liquiça, Gabriela D. C Pereira Geronimo deklara, nia parte agradese ba organizasaun OXFAM no Kdadalak Sulimutuk Institute (KSI) ne’ebé kontinua fó apoiu ekipamentu protesaun individual ba komunidade iha Suku refere.

Antes ne’e, OFXAM serbisu hamutuk ho Kdadalak Sulimutuk Institute (KSI) apoiu ona ekipamentu protesaun individual, inklui apoiu nesesidade bazika, maibé liu husi sorumutuk reflesaun ba progama responde surtu Covid-19 iha Munisipiu Liquiça mosu rekomendasaun ne’ebé hato’o husi benefisiariu no lider komunitariu sira, tan ne’e iha loron, 30 Abril 2021 kontinua fó apoiu ekipamentu protesaun individual ba komunidade Suku Vatuvou, Maubaralisa no Vaviquina

“Bainhira governu deside aplika serka sanitaria iha Munisipiu Liquiça ajuda hirak ne’e mós to’o kedas iha ami nia suku, entaun ami sente kontenti tanba ho apoiu material hirak ne’e bele fasilita komunidade sira hodi luta kontra ejistensia surtu Covid-19,” informa Xefe Suku Vatovou, Gabriela D. C Pereira Geronimo ba media KDADALAK liu husi via telefone. 

Material hirak ne’e maka hanesan, maskara 1407, sabaun 630, hand sanitizer 77 no balde 39. “Maskara ida agora ne’e di’ak, tanba foer ita bele fase hodi uza fila-fali. Ne’e duni, espera katak OXFAM ho KSI kontinua fó tulun ba komunidade sira iha situasaun difisil ida ne’e.

Entretantu Pesoal Apoiu Administrasaun Suku (PAAS) Vaviquina, Antonio Afónso haktuir, jeralmente iha suku Vaviquina komunidade sira kontinua kumpri regra ne’ebé fó sai husi Ministeriu Saude, ne’e duni ho apoiu hirak ne’e komunidade sira bele utiliza nafatin, ezemplu iha sede suku ita hatur nafatin balde fase liman nian no ema ne’ebé atu ba trata dokumentus tenke uza maskra.

“Antes ne’e OXFAM ho KSI fó ona apoiu, maibé relasiona ho inkontru avaliasaun ne’ebé iha, ami kontinua husu atu aumenta, ne’e duni agora dadauk sira lori tan balde 74, maskra 2520, sabaun 1100 no hand sanitizer 138,” deklara PAAS Vaviquina.

Nia parte agradase ba apoiu ne’ebé oferese husi OXFAM no Kdadalak Sulimutuk Institute (KSI), tanba ho apoiu hirak bele tulun komunidade suku Vaviquina hodi preve an husi Covid-19. 

Nune’e mós, Xefe Suku Maubaralisa, Rui Manuel hateten, iha fulan hirak liu ba ekipa husi KSI no OXFAM mai hala’o sorumutu reflesaun ida ho benefisariu sira, entaun momentu ne’ebá mosu rekomendasaun husu atu kontinua fó apoiu, ne’e duni ohin apoiu hirak ne’e kontinua lori mai iha suku Maubaralisa.

“Maski apoiu ne’e ho numeru ki’ik, maibé bele tulun ami nia komunidade, hodi prevene an husi surtu Covid-19, tanba agora dadauk Munisipiu Liquiça mós aplika ona serka sanitaria.

Material hirak ne’ebé apoiu ba Suku Maubaralisa maka hanesan, maskra 402, hand sanitaizer 22, sabaun 180 no balde 10.

 

Related Articles

Kontaktu Ami

Avenida Fatumeta (Besik Eskola Primaria)
Fatumeta
Surikmas
Dili
Timor-Leste

Email: info@kdadalak.org.tl 
Telp:

Galeria

No Albums