Tansá Estadu Timor-Leste Tenke Sadere  ba WTO?

Tansá Estadu Timor-Leste Tenke Sadere ba WTO?

KDADALAK: Word Trade Organization (WTO) nu’udar Organizasaun Mundial Komérsiu (OMK) ne’ebé estabelese husi nasaun riku sira iha kontinente Europeia, Amerika no ASEAN. WTO harii iha loron 1 Janeiru 1995 ho objetivu prinsipal ida katak “asegura komérsiu bele la’o di’ak, iha serteza, justu no livre.”

Funsaun prinsipál organizasaun mundiál Komérsiu maka administra, kriasaun no implementasaun akordu entre país membru sira. Akordu primeiru no boot liu hotu maka akordu Jerál kona ba Tarefas no Komérsiu (General Agreement on Tariffs and Trade – GATT) ne’ebé asina husi nasaun 23 iha tinan 1947. 

Nasaun barak maka sai ona membru ba organizasaun mundiál komérsiu ho razaun katak, bele asesu ba iha merkadu internasional no fasil tebes ba nasaun iha mundu bele asesu ba sira nia esportasaun. Razaun seluk, garantia katak produtu no kompañia sira sei hetan oportunidade hanesan no sei tuir organizasaun mundiál komérsiu nia regra kuandu sira serbisu iha nasaun membru seluk, nune’e mós bele asesu ba mekanizmu rezolusaun disputa ne’ebé justu. 

Relasiona ho asuntu ne’e, mosu hanoin balun katak nasaun ki’ik sira hanesan Timor-Leste ne’ebé nia merkadu iha rai laran ladún bo’ot no hakarak hetan asesu ba merkadu internasionál hodi haburas no diversifika ekonomia rai laran importante tebes ba Timor-Leste atu sai membru organizasaun mundiál komérsiu ka WTO. 

Tuir deklarasaun Ministru Koordenador Asuntu Ekonomia (MKAE), Joaquim Amaral ne’ebé publika iha media Indonézia nian balun katak, importante ba Timor-Leste atu adere ba organizasaun mundiál komérsiu hodi nune’e bele dudu prosesu dezenvolvimentu no diversifikasaun ekonomia rai laran. 

“Nasaun membru sira deklara ona apoiu ba esforsu ne’ebé maka parte relevante sira husi Timor-Leste halo. Tanba, estadu Timor-Leste ho kometimentu atu hala’o reformasaun ba estrutura, legislativu no polítika tuir regulamentu organizasaun mundiál komérsiu.”

Publikasaun iha pájina ministériu Finansas sita katak, importante ba Timor-Leste sai membru Organizasaun Mundial Komérsiu tanba ita avansadu ona iha liberalizasaun komérsiu, maibé seidauk goza previlegius, protesaun no benefísiu ne’ebé Organizasaun Mundiál komérsiu oferese. 

Timor-Leste iha ona tarefa uniformál ne’ebé ki’ik tebes (2.5%) ho esepsaun mínimu no laiha kuota. Nune’e, sai membru Organizasaun Mundial komérsiu sei fó garantia ba Timor-Leste atu goza asesu ba merkadu ne’ebé daudaun ne’e limitadu no sei sa’e as liu tan. Sai membru Organizasaun Mundial Komérsiu sei fó mós importánsia kona ba normas no standar importasaun ne’ebé tama rai-laran tenke halo tuir, mekanizmu atu rezolve disputa ne’ebé mosu ho nasaun membru seluk no sei oferese asisténsia téknika atu fó tulun iha aspetu komérsiu ne’ebé Organizasaun Mundial komérsiu oferese.

Kestaun ne’ebé importante liu maka, sai membru Organizasaun Mundial Komérsiu presiza hatudu sinál klaru no kometimentu atu dezenvolve no implementa polítika komérsiu ne’ebé komprensivu no modernu. Tanba, prosesu sai membru Organizasaun Mundial komérsiu presiza mós esforsu no asaun Timor-Leste nian ho lalais bazeia ba kometimentu atu kria regulamentu, lei no ambiente estruturadu ba komérsiu tuir standar internasionál.

Maski Timor-Leste hahú hala’o ona negosiasaun formal atu adere ba organizasaun mundiál komérsiu, maibé mosu preokupasaun balun katak Timor-Leste presiza tetu molok deside sai membru ba organizasaun refere, tanba nasaun ne’ebé sai ona membru tenke kumpre akordu no regulamentu ne’ebé iha. 

Aleinde ida ne’e, organizasaun refere mai ho nia polítika ida oinsá bele domina ita nia merkadu, setór produtivu nomós super indústria husi rai ida ba rai seluk, nune’e bele diversifika tan sira nia rikusoin para hetan lukru ba sira nia an.

WTO mós iha membru ne’ebé mai husi kompañia bo’ot sira maka hanesan, kompañia Trans Internasional no Nasional ne’ebé koñesidu iha mundu kona-ba prodús adubu kímiku, fini no pestisida. Sira mós halo direitu ba paternizasaun (hak paten), ne’e duni bainhira ita atu uza sira nia sasán ka fini ruma tenke husu lisensa, se la’e sira bele komplain.

Perspetiva husi sosiedade sivíl balun katak, bainhira governu deside tama duni ba membru organizasaun mundiál komérsiu (WTO) iha tempu agora, Timor – Leste sei hasoru problema bo’ot iha futuru, tanba polítika ida ne’e sei investe problema ba nasaun no jerasaun tuir mai. Ne’e duni, sujere ba Governu di’ak liu labele preokupa atu tama ba organizasaun mundiál komérsiu, maibé oinsá atu fokus hodi dezenvolve setór importante sira maka hanesan, Agrikultura, Kooperativa, Indústria no setór produtivu hirak seluk, inklui dezenvolve mós setór privadu sira iha rai laran oinsá bele prepara an hodi kompete iha merkadu.

Tuir loloos Governu tenke hanoin hodi dezenvolve area produtivu sira, nune’e bele hadi’a ekonomia iha rai laran, hahú husi suku ida ba suku seluk, husi munisipiu ida ba munisipiu seluk, la’os hanoin maka tama ba organizasaun mundiál komérsiu ne’ebé ita rasik la hatene hun no abut husi polítika organizasaun nian.

Realidade hatudu iha tinan sanulu resin sia (19) nia laran, Timor – Leste seidauk sai membru ba organizasaun mundiál komérsiu mós, Timor-Leste nia ekonomia ema hahú domina ona, sasán ka produtu importasaun husi rai li’ur hahú dudu sees produsaun lokál iha rai laran, piór liu tan kuaze fatin estratéjiku hirak iha kapitál Dili to’o munisipiu ema estranjeiru (Xineza) maka uza hodi loke loja no super Merkadu.

Indikasaun hirak ne’e hatudu, Timor – Leste seidauk preparadu atu tama ba membru organizasaun mundiál komérsiu, intermus rekursu humanus no produtu ne’ebé maka ita iha, tanba to’o ohin loron ita seidauk sente rezultadu husi produtu ruma ne’ebé atu lori ba kompete ho rai seluk iha merkadu Internasional. Ne’e duni, se governu ho ambisaun hakarak tama ba membru WTO iha tempu agora, entaun saida maka ita atu lori ba kompete.? 

Hanoin seluk fali dehan, tansá governu la halo investimentu hodi harii indústria iha rai laran, nune’e bele diversifika produtu sira, liu-liu kafé ne’ebé durante ne’e ita esporta ba rai liur labele ona ho kulit ka musan, maibé oinsá ita bele esporta kafé ho modelu hanesan neskafe (bahan jadi), nune’e ita nia kafé bele hetan folin di’ak iha merkadu, tanba se ita esporta nafatin (bahan mentah) hanesan agora, konserteza ema sosa ho folin baratu depois sira lori ba prosesa no dezenvolve tiha mai fa’an fali ho folin boot.  

Polítika husi organizasaun mundiál komérsiu ka WTO deskreve mós regulamentu balun, liu-liu agreement kona ba setór agrikultura nian ne’ebé hateten, bainhira nasaun membru ida nia produsaun iha rai laran hakarak hetan inisiativa sira prontu apoiu, maibé produsaun hirak ne’e sira mak sei sosa. 

Klaru katak, ninia impaktu direitamente sei akontese privatizasaun makas no setór agrikultura sei dependente ba kompañia hirak ne’ebé nu’udar membru WTO ne’ebé maka durante ne’e prodús fini, pestisida kímiku, adubu kímiku no buat seluk tan hodi fó ameasa ba produsaun agrikultura iha rai laran. 

Deklarasaun husi ukun balun dehan, bainhira Timor-Leste tama organizasaun mundiál komérsiu, sei hafasil ita nia dalan ba prosesu esportasaun, maibé sosiedade sivíl balun deskorda ho deklarasaun ida ne’e, tanba esperiénsia husi nasaun balun hatudu ona katak, polítika ida ne’e fó espasu ba kampaña boot husi nasaun riku sira hanesan trans internasional ne’ebé investe kona-ba setór agrikultura hodi prodús fini, pestisida kímiku no adubu kímiku.

TL Seidauk Iha Produtu Potensiál

Bainhira Timor-Leste deside sai ona membru WTO konserteza tenke kumpre akordu hirak ne’ebé estabelese iha WTO nia laran, maibé hare ba situasaun agrikultura iha Timor-Leste sei hamosu problema boot iha futuru, tanba Timor-Leste laiha produtu potensiál ne’ebé atu lori kompete ho nasaun seluk.

Nu’udar nasaun ki’ik, Timor-Leste iha poténsia agrikultura ne’e duni tenke hare ninia risku no tenke tetu halo didi’ak molok deside tama ba membru WTO, tanba daudauk ne’e Timor-Leste enfrenta hela menus produsaun, rai produtividade barak maka abandona, fini iha rai laran kuaze atu lakon, rekursu naturais la funsiona ho di’ak.

Situasaun hirak ne’e hotu hatudu mai ita katak, bainhira Timor-Leste ansi tama ba membru WTO ema barak sei mai investe no halo akordu ida ho estadu hodi reforma rai hirak ne’e hotu hodi benefisia sira nia an. 

Bainhira sira estabelese akordu ho estadu hodi reforma rai produtividade hirak ne’e, entaun povu agrikultór sira laiha rai atu halo produsaun. “Ita ta’uk maka akontese hanesan iha Indonézia, ema foti hotu rai produtivu, depois haruka sira nia ema mai servisu iha ne’ebá hodi halo produsaun no lori ba faan fali iha merkadu,”

Indonézia sai membru WTO hahú iha loron, 24 Fevereiru 1950. Durante sai membru WTO benefísiu ne’ebé Indonézia hetan maka livre husi mafia komérsiu, dumping no diskriminasaun. Maibé, problema ne’ebé sira hasoru maka empreza multinasional husi rai li’ur domina fali setór komérsiu ne’ebé estratéjia no ida ne’e sai ameasa ba ezisténsia setór privadu sira iha rai laran.

Relasiona ho kestaun ne’e, governu Indonézia hamosu mós polítika ida atu salva produtu husi rai laran, maibé iha prosesu mediasaun Indonesia labele kompete tanba antes ne’e asina ona akordu.

Hare ba esperiénsia hirak ne’e iha dadalia ho media KDADALAK, Mariano Ferreira husi Organizasaun La’o Hamutuk iha ninia pontu de vista hateten, Timor-Leste iha situasaun ida ne’ebé frazil tebes intermus dezenvolvimentu, tanba realidade hatudu setór produtivu barak maka seidauk dezenvolve ho di’ak no seidauk sai prioridade governu nian, liu-liu setór agrikultura, Turizmu, Kooperativa, inklui setór produtivu hirak ne’ebé bele ajuda povu nia moris.

Problema seluk fali sistema báziku ka setór sosiál hanesan Edukasaun no Saúde foin maka hahú dezenvolve no to’o agora eskola públiku barak enfrenta hela problema infrastrutura, inklui eskola públiku iha kapitál Dili, tanba laiha kondisaun ba estudante sira atu aprende, livru ba labarik sira mínimu tebes, piór liu tan eskola balun to’o ohin loron laiha biblioteka. 

Aleinde ne’e, Timor-Leste agora daudauk iha situasaun inserteza polítika nia laran, hahú kedas husi tinan 2017 to’o agora, ita nia situasaun polítika la normal. Hare husi situasaun hirak ne’e hotu hatudu katak, intermu preparasaun Timor-Leste seidauk iha kondisaun ne’ebé natoon atu adere ba organizasaun mundiál komérsiu ka WTO, ne’e duni hanesan sosiedade sivíl La’o Hamutuk sempre preokupa ho asuntu ida ne’e.

Ho realidade hirak ne’e La’o Hamutuk sujere ba Governu, liu husi Ministériu Koordenador Asuntu Ekonomia (MKAE) no organizasaun hirak ne’ebé servisu hamutuk atu fokus ka fó prioridade hodi hadi’a sistema internal iha rai laran, hadi’a dezenvolvimentu, hadi’a problema báziku ne’ebé akontese no rezolve problema sosiál hirak seluk. Bainhira kondisaun hirak ne’e responde hotu ona, hafoin maka Timor-Leste bele halo adesaun ba membru WTO tanba ita preparadu ona. 

Mariano klarifika, bainhira Timor-Leste sai ona membru ba WTO, kritériu ida maka tenke ajusta ita nia lei no polítika tuir WTO nian, labele kontradís fali ho sira nia polítika no lei. Ezemplu, iha lei procurement nian, se governu Timor-Leste loke tender ruma, kompañia husi nasaun seluk hanesan, Amerika, Inglaterra no Indonézia bele mai tuir tenderizasaun, ita labele taka dalan ba sira mais tenke loke oportunidade no vantajen ne’ebé hanesan ba kompañia sira husi rai li’ur. 

Bainhira ita taka dalan ba sira, dala ruma sira bele uza fali lei hirak ne’e hodi mengugat ita iha Tribunál ne’ebé hare kona ba prosesu hirak ne’e.

La’o Hamutuk konsidera deklarasaun husi ukun na’in balun ne’ebé dehan, se karik Timor-Leste tama ba WTO sei garante asesu ba merkadu justu, ida ne’e hanesan propaganda de’it hodi bosok públiku, tanba kona-ba akordu merkadu livre nian (free trade agreement) ita tenke ajusta ho polítika no lei WTO nian.

Bainhira ita loke merkadu ba investor sira husi rai li’ur (Indonézia) atu mai investe, konserteza ita mós tenke loke oportunidade hanesan ba membru WTO husi nasaun seluk hodi tama mai halo investimentu. Aleinde ne’e, kompañia iha Timor-Leste mós tenke servisu makas hodi kompete ho kompañia husi rai li’ur, se la’e ita nafatin sai penontong depois kompañia husi nasaun seluk maka domina ita nia merkadu no ekonomia.

“Ha’u la lembra didi’ak ona, maibé iha akordu balun sita katak, nasaun hotu ne’ebé hakarak sai membru WTO tenke hakruk ba lei ne’ebé WTO rasik prodús ona no nasaun ne’e tenke asina akordu refere, ne’e duni hanesan sosiedade sivíl ami sei duvida, tanba ita seidauk preparadu no presiza servisu makas liu tan, tanba i setór privadu iha rai laran hare husi entermus kapitál sei depende ba projetu governu liu husi Orsamentu Jerál Estadu (OJE), tanba sira seidauk iha kapitál rasik atu halo konstrusaun ba projetu boot ruma depois hein governu halo pagamentu,” informa Mariano.  

Situasaun hirak ne’e hotu hatudu katak ita nia setór privadu rasik seidauk preparadu atu bele kompete ho setór privadu sira husi nasaun seluk, entaun ida ne’e hanesan problema ida no la loos kuandu ita dehan polítika WTO ne’e atu garante merkadu justu.

Nia klarifika, bainhira ko’alia kona ba merkadu justu konserteza ita bele faan ita produtu ba sira no sira mós bele faan sira nia produtu mai ita, parte rua hetan hotu lukru, ida ne’e maka ita bele ko’alia merkadu ne’ebé justu, maibé se ida ne’ebé maka ho modal boot, matenek, iha skill no teknolojia ne’ebé avansadu kompara ho ita nia setór privadu sira ne’ebé papan nama de’it seidauk metin, ida ne’e ita atu dehan justu hanusá.

Nu’udar akademista, Antero Benedito da Silva iha ninia intervensaun hateten, asuntu ida ne’e (WTO) presiza iha diskusaun nivel sosiedade sivíl, akademista, inklui governu. Maibé, nasionalmente ita laiha debates ne’ebé profunda, tanba ohin loron movimentu anti globalizasaun transforma ona ba kestaun hirak hanesan luta iha kontestu ambientál. 

WTO nu’udar orgaun prinsipal ida ba liberalizasaun ekonomia iha mundu, maibé liberalizasaun ne’e ita ko’alia kona ba promosaun valores kapitalizmu nian, hanesan ita hatene kona ba ‘Uruguay Round’ ne’ebé fó apoiu ba North American Free Trade Agreement (NAFTA) ne’ebé involve nasaun Canada, Estadus Unidus Amerika no Mexico hodi hala’o koordenasaun ba atividade ekonomia, inklui relasaun komunikasaun, atividade kultura no sidadania, atividade sosial no saúde. 

Movimentu anti globalizasaun ne’e sei iha, maibé espekulasaun ba WTO ne’e ladún mosu iha ativista sira nia luta ba tinan hirak ikus ne’e. 

Tansá maka nasaun sira hakarak sai membru ba organizasaun ida ne’e.? Ha’u hanoin nasaun ida-idak bele espekula ninia razaun, maibé jerálmente sira nia prinsipiu hanesan de’it kuandu tama iha WTO, signifika nasaun ne’e liberaliza ninia ekonomia no ida ne’e hanesan kritéria ida, tantu esplísita no implísita sira husu kuandu nasaun ne’ebé aseita atu sai membru ba WTO.

Pontu seluk ne’ebé ita presiza hare maka WTO ne’e parseria ho organizasaun ne’ebé ema bolu ho naran International Financial Institution (IFI) ne’ebé refere ba instituisaun twins’ genes instituisaun kaduak hanesan Banku Mundial ka Fund Monetary International (FMI).  Instituisaun ne’e oinsá maka operasionaliza no oferese ideas ba movimentu kapitalizmu nu’udar sistema ekonomia ida ne’ebé ho krize esperiénsia maibé nia nafatin influénsia nasaun barak. 

“Timor-Leste ninia ekonomia agora daudauk liberaliza tiha ona, ne’e duni labele hakfodak kuandu Timor-Leste atu sai membru WTO. Tanba, iha ita nia konstituisaun artigu 38 ko’alia kedas kona ba ajente ekonomia 3 maka hanesan, setór privadu, estatal no ajénsia ekonomia kooperativa ne’ebé nia formatu ba ekonomia komunitária,” deklara Antero Benedito ba media KDADALAK semana foin lalais.

Iha tinan hirak ikus ne’e, governu sempre pronunsia kona ba kreximentu ekonómiku, maibé se kreximentu ekonómiku ne’e governu prodús beibeik ona ba setór privadu, konserteza Timor-Leste inklina ona iha ekonomia liberal ne’ebé agora daudauk operasionaliza hela iha Timor, ne’e duni laiha kontradisaun ruma bainhira Timor-Leste atu sai membru WTO. 

Kestaun agora maka prioridade ba Timor-Leste ka la’e.? hanoin ba momentu ida ne’e, ita laiha kapasidade atu kompete no intelektualmente ita laiha ema ne’ebé peritu hodi halo debates no estudu nasionál kona-ba asuntu refere. Timor-Leste sempre iha tendénsia ba kestaun hirak ne’e, maibé ita hakarak retifika lei barak no piór liu tan ita hetan presaun uitoan husi organizasaun internasional no ajénsia sira mai influénsia, ita rame-rame halo retifikasaun, maske buat hirak ne’e iha implikasaun ba utilizasaun rekursu umanu no ita nia finansiamentu nasionál. 

Klaru katak Timor-Leste seidauk iha kondisaun ba asuntu ida ne’e, depois poténsia ida ne’ebé governu sempre artikula katak ita iha kafé Timór, ne’e duni presiza luta hodi tama ba WTO, maibé buat hirak ne’e hotu hanesan artikulasaun no ida ne’e iha prinsipiu WTO nian ema bolu hak paten ka intellectual property right hanesan regime legal ida iha WTO ne’ebé bele fó dalan ba nasaun membru sira, se kuandu nain ba buat ruma ida ne’e bele sai sira nian, ne’e duni ema seluk karik uza, ezemplu kafé Timor kuandu ema seluk kuda kafé iha fatin seluk tenke husu lisensa ba Timor-Leste tanba Timor maka nain, ida ne’e maka durante ne’e governu hanoin.

Seluk maka agora daudauk UNESCO hala’o hela buat ne’ebé bolu naran patrimóniu umanidade ba Tais, ida ne’e governu ho NGO sira artikula ka la’e.? Tais ne’e Timor maka na’in, ida ne’e iha lei WTO iha ka la’e, tanba dehan se nasaun sira seluk maka hakarak prodús tais tenke husu lisensa ba Timor, tanba ida ne’e propriedade no direitu intelektual povu Timor nian. 

Kestaun hirak ne’e maka sai arenas debate entre ema sira ne’ebé anti kapitalizmu ho ema sira ne’ebé pro-kapitalizmu. Tanba parte ba konseitu kapitalizmu nian iha tendénsia ba paternizasaun no hakarak sai nain ba propriedade inkluindu buat hirak ne’e. 

“Ha’u hanoin iha buat barak kona-ba property intellectual right ne’ebé ema uza hodi paterniza buat ne’ebé direitu popular nasaun sira nian. Iha prinsipiu WTO legalmente uza sistema ida ne’e hodi hadau rikusoin nasaun sira nian, tanba ne’e maka ema sira ne’ebé eskerda sempre hare katak presiza iha movimentu hodi kontra instituisaun ida ne’e nia ezisténsia,” esklarese Antero.

Problema seluk ita laiha kontrola ba peskiza hirak ne’ebé la’o ona iha Timor-Leste, ita la hatene karik ema balun sei kontinua halo peskiza kona-ba ita nia rai ka la’e, ida de’it mós ita la kontrola no se de’it maka tama iha Timor ba fatin ne’ebé de’it konforme sira nia hakarak, entaun koñesimentu Timor nian ema na’ok barak ona.

Relasiona ho situasaun hirak ne’e, hanoin katak argumentu ne’ebé governu hato’o ladún válidu no seidauk iha emerjénsia ba asuntu ida ne’e, tanba prioridade liu maka ita presiza auto-sufisiénsia alimentar nasionál, maibé to’o agora governu la konsege responde situasaun ida ne’e, depois ita hakarak atu exporta saida.

Ezemplu, exporta mina, hanesan Ajénsia internasional balun apoiu maluk sira iha Baucau ne’ebé prodús mina uza kami, maibé mina ne’e atu ita han de’it la to’o no dala barak ita sosa fali mina bimoli importadu. Seluk fali maka fós, ita nia produsaun daudauk ne’e la to’o hodi responde nesesidade nasionál no tanbasá maka folin fós lokál sa’e? inklui batar ne’ebé prodús laiha sirkulasaun horizontal husi komunidade ida ba komunidade seluk, situasaun ne’e to’o agora laiha governu ida maka konsege atu hare.

Importante NGO hotu-hotu tenke promove debates, tanba durante ne’e laiha debate no asaun ruma husi movimentu sosiál kona ba ezisténsia banku mundiál iha Timor-Leste, ezisténsia fundu umanitaria internasional ninia intervensaun iha nasaun hirak ne’ebé terseiru mundu ka nasaun hirak ne’ebé iha esperiénsia krize hanesan iha Portugal ne’ebé iha tinan hirak liu ba to’o agora sei iha problema finanseiru entaun sira tenke empresta osan ba banku mundiál.

Debate hirak hanesan ne’e maka ONG sira iha Timor la halo, tanba foku barak liu kona ba problema agrikultór rural, asuntu jéneru, asuntu direitus umanus mais ladún iha diskusaun kona ba kestaun fundamental ne’ebé liga ba sistema kapitalizmu internasional. Nune’e mós, iha governu nia laran mós ladún laiha koñesimentu natoon ba aspetu polítiku iha instituisaun internasional ne’ebé NGO presiza halo. 

Aproveita situasaun Covid-19 ne’e hodi fó prioridade ba auto-sufisiénsia alimentar nasionál, liu husi mobiliza populasaun para halo servisu, aprende husi situasaun ne’e hodi aumenta ita nia rezilensia iha kapasidade produsaun alimentar. (**)


Print  

Related Articles