Tansa Tenke Sandere WTO

TL Tenke Kuidadu ho Politika WTO

KDADALAK: Iha loron 25 Novembru 2020, Governu liu husi Konsellu Ministru (KM) aprova ona deliberasaun mandatu ba negosiasaun adezaun Timor-Leste (TL) ba Organizasaun Mundiál Komérsiu (OMK) ka Word Trade Organization (WTO). Proposta ne’e aprezenta husi Ministru Koordenadór Asuntu Ekonómiku (MKAE), Joaquim Amaral. 

Ho deliberasaun ida ne’e autoriza ona mandatu ba MKAE atu hala’o negosiasaun adezaun Timor-Leste nian ba organizasaun mundiál komérsiu. Ministru ne’ebé xefia sei hetan apoiu husi delegasaun membru reprezentante sira husi kada departamentu governu nian ne’ebé kompostu husi Prezidénsia Konsellu Ministru (PKM), Ministériu Finansa (MF), Ministériu Negósiu Estranjeiru no Kooperasaun (MNEK), Ministériu Saúde (MS), Ministériu Turizmu Komérsiu Indústria (MTKI), Ministériu Agrikultura Peska (MAP) nomós Ministériu Petróleu no Minerais.

Maske nune’e, desizaun governu atu adere ba WTO dezde iha primeiru governu nia ukun hetan kritika makas husi sosiedade sivíl, ate balun rekomenda katak, tuir loloos governu hanoin oinsá atu dezenvolve setór produtivu sira, nune’e bele hadi’a ekonomia povu iha rai laran, duke hanoin tam aba membru WTO mais ita rasik laiha produtu atu lori ba kompete iha merkadu internasional. 

Nu’udar nasaun ki’ik, Timor-Leste iha poténsia agrikultura, ne’e duni tenke tetu no hare ninia risku molok deside tama ba membru WTO, tanba daudauk ne’e Timor-Leste enfrenta hela menus produsaun, rai produtividade barak abandona, fini iha rai laran kuaze atu lakon no rekursu naturais la funsiona ho di’ak.

Bainhira Timor-Leste deside sai ona membru WTO konserteza tenke kumpre akordu hirak ne’ebé estabelese iha WTO nia laran, maibé hare ba kondisaun Timor-Leste ne’ebé tinan barak ona nunka iha mudansa ba setór produtivu sira konserteza sei hamosu problema boot iha futuru. 

Situasaun hirak ne’e hotu hatudu mai ita katak, bainhira Timor-Leste ansi tama ba membru WTO, ema barak sei mai investe no sei domina hotu setór estratéjika sira. 

Antes ne’e, iha tinan hirak liu ba koordenadór Rede HASATIL, Gil Boavida rekomenda ba governu di’ak liu deside labele tama ba membru organizasaun mundiál komérsiu ka WTO, maibé oinsá atu buka dezenvolve setór agrikultura, indústria no setór produtivu hirak seluk, inklui setór privadu sira iha rai laran.

Pontus lubuk ida maka deskreve iha akordu nia laran, liu-liu liga ba subsídiu ne’ebé iha sei la fo vantajen ba produsaun iha rai laran, tanba ho persentajen ne’ebé maka la hanesan, Ezemplu, iha rai laran ne’e subsídiu 30% maibé iha rai li’ur redús ba 24% entaun ita labele asesu livre ba produtu ne’ebé ita iha.

Problema seluk ita laiha produtu potensiál ne’ebé bele asesu ba merkadu no dala ruma ita avansa ho produtu ne’ebé orgániku tanba iha akordu dehan di’ak mais iha implementasaun dala ruma falla tanba la tuir buat ne’ebé maka ita aseita hamutuk.

Iha dada lia badak ne’ebé media KDADALAK hala’o ho reprezentante organizasaun Serikat Petani Indonezia (SPI), Zainal Arifin Fuad tinan hirak liu ba hatete, polítika merkadu livre ne’ebé hetan apoiu husi organizasaun mundiál komérsiu hanesan WTO nu’udar inimigu ida ba agrikultór sira, ne’e duni agrikultór tenke konsiente no kuidadu ho polítika hirak ne’e tanba bele fó ameasa ba produsaun iha rai laran.

Iha Indonézia governu halo hela lei ida hodi hamenus importasaun husi rai li’ur, liu-liu na’an tanba agrikultór sira konsege prodús ona ai-han, modo no na’an. Maski nune’e, WTO lakohi no ezije nafatin ba governu Indonézia tenke loke sira nian merkadu, hodi nune’e sasán husi nasaun seluk bele tama tanba Indonézia asina ona akordu hodi sai membru WTO.

Dala ruma ita iha na’an barak modo no ai han lokál seluk ho kualidade di’ak, maibé la folin iha merkadu tanba impaktu husi sistema merkadu livre ne’ebé fó espasu ba nasaun seluk hodi hatama nafatin sira nia sasán.

Atu antisipa situasaun hirak ne’e labele akontese, ukun nain sira tenke rona ideas husi parte seluk no buka hatene mós esperiénsia ne’ebé akontese ona husi nasaun seluk. Aleinde ne’e, ita mós presiza hatene lala’ok polítika merkadu livre, tanba polítika ida ne’e la’ós de’it WTO maka promove, maibé bele mós husi Asia Pasífiku, China, Amerika no Australia ne’ebé bele fó ameasa ba agrikultór sira nia moris.

Mariano Ferreira, peskizadór husi La’o Hamutuk deklara, bainhira Timor-Leste sai ona membru WTO, signifika konkorda ho regulamentu tomak ne’ebé maka iha. Ne’e duni, kuandu hakarak fó subsídiu ba toos nain sira tenke liu husi konkordánsia ida no dala ruma sira bele deside to’o de’it tinan ida ka rua, labele to’o tinan naruk ho razaun katak bele hamate fali produtór ka agrikultór husi nasaun seluk.

Ida ne’e maka sai problema no la fasil. Tanba, se karik governu la halo tuir sira nia hanoin, dala ruma subsídiu ba agrikultór sira bele hapara, entaun nasaun seluk bele lori ita nia governu ba iha Tribunál ne’ebé WTO rasik iha hodi akuza katak, “tanbasá ita iha ona konkordánsia hodi fó subsídiu ba to’os na’in sira, maibé ita boot sira fa’an fali produtu ba nasaun seluk ho folin baratu.” 

Situasaun hanesan ne’e akontese ona ba nasaun balun iha America Latina, Canada no Brazil. Iha nasaun bo’ot balun sira nia setór agrikultura dezenvolve ho di’ak, maibé maioria produtu hirak ne’e nain ba kompañia, entaun toos nain sira sai atan tanba sira kuda fó ba kompañia depois kompañia selu sira.

Ezemplu iha Indonézia, toos nain sira kuda plantasaun barak, maibé ida ne’e nain ba kompañia internasional sira ne’ebé tama ona iha ne’ebá depois maka join ho kompañia lokál sira no ikus mai agrikultór no povu sira maka sai vítima, tanba povu la hatene situasaun hirak ne’e, piór liu governu tau taxa ho folin bo’ot, depois selu taxa labele sira faan tiha rai.

Nu’udar nasaun foun Timor-Leste tenke kuidadu ho situasaun hirak ne’e, tanba realidade hatudu Timor-Leste seidauk sai membru WTO no seidauk tama ba ASEAN mós ema hahú domina ona ita nia ekonomia. Ita bele hare rasik loja no kompañia barak iha Dili laran agora Xina, Australia no Indonézia maka domina, entaun oinsá se karik ita sai tan membru. 

Timor-Leste seidauk sai membru ba WTO mós ita exporta ona kafé ba nasaun seluk, ida ne’e realidade no governu mós labele bosok. Ita nia instituisaun ne’e frazil tebes, tanba lider polítiku sira hanoin de’it maka buat ne’ebé aas, la hare ba realidade, sira hanoin de’it maka kaer ona ukun entaun bele halo buat oin-oin hodi fó sofre ba povu. 

Ha’u la konkorda argumentu husi governu ne’ebé dehan, fasil ba Timor-Leste atu halo esportasaun bainhira tama ba membru WTO, tanba iha buat balun ne’ebé ita presiza kuidadu, ne’e duni argumentu governu nian ne’e ladún válidu. Sai membru WTO ninia di’ak maka bele vizita turista ho visa livre ba buat hotu. 

Tuir loloos hanesan Timor-Leste bele sai hanesan observadór iha konferénsia hirak ne’ebé maka organizasaun mundiál komérsiu ka WTO organiza no ita ba la’ós atu fó idea ka opsaun mais ba hare de’it hodi hetan esperiénsia husi nasaun seluk, nune’e mai dezenvolve fali ita nia rai no ita nia setór produtivu sira, depois ita hare forte ona hafoin bele halo adesaun.

Iha Orsamentu Jerál Estadu 2020 nian, governu ko’alia hodi tau osan dollar millaun 2 ba tuir expo Dubai. Ida ne’e parte husi programa balun atu promove ita nia prezensa hodi hatudu ba mundu katak ita mós bele tuir expo hirak ne’e, maibé hare ba realidade iha rai laran seidauk iha preparasaun di’ak.

“Se ita ba tuir expo iha Dubai, depois lori ita nia produtu hanesan kafé no mina nuu hodi ba hatudu no bainhira kompañia internasional sira husu kada fulan rua ka tolu tenke haruka tonelada 20 ka 30, ida ne’e ita iha kondisaun ka la’e.”

Timor-Leste lalika hanoin atu sai membru WTO lai, ita presiza prepara kondisaun iha rai laran, hadi’a ita nia ekonomia, polítika no dezenvolve setór produtivu, inklui setór báziku sira no bainhira ita forte ona iha dezenvolvimentu hirak ne’e, entaun ita bele kompete ona ho kampaña ka nasaun seluk ne’ebé hakarak mai investe. (**)


Print  

Related Articles